Псалтыр 98 псалом

Псалтыр
Пераклад Чарняўскага 2017 → Пераклад Антонія Бокуна

 
 

Псальм. Спявайце Госпаду новую песню, бо ўчыніў Ён цуды. Паратунак у правіцы Яго і ў руцэ святой Яго.
 
Псальм. Сьпявайце ГОСПАДУ новы сьпеў, бо Ён цуды ўчыніў! Правіца Ягоная і рамяно сьвятасьці Ягонай здабылі перамогу Яму.

Госпад абвясціў Сваё збаўленне, на віду паганаў аб’явіў Ён Сваю справядлівасць.
 
ГОСПАД зьявіў збаўленьне Сваё, перад вачыма народаў адкрыў праведнасьць Сваю.

Успомніў Ён пра міласэрнасць Сваю і пра праўду Сваю для дома Ізраэля. Убачаць усе канцы свету збаўленне Бога нашага.
 
Узгадаў пра міласэрнасьць Сваю і вернасьць Сваю для дому Ізраіля. Усе канцы зямлі ўбачылі збаўленьне Бога нашага.

Услаўляй гучна Бога, уся зямля, выбягайце, радуйцеся і грайце псальмы.
 
Усклікай ГОСПАДУ, уся зямля! Цешцеся, і радуйцеся, і выслаўляйце!

Грайце Госпаду на цытры, на цытры і з гукамі псальма.
 
Выслаўляйце ГОСПАДА на гусьлях, на гусьлях і галосным сьпяваньнем!

На срэбных трубах і пад гукі рога спявайце гучна славу перад абліччам Госпада Валадара.
 
На трубах і гукам рогу ўсклікайце перад абліччам Валадара ГОСПАДА!

Хай шуміць мора і ўсё, што яго запаўняе, увесь сусвет і тыя, што ў ім пражываюць.
 
Няхай мора гудзе і ўсё, што ў ім, сусьвет і ўсё, што жыве ў ім!

Хай рэкі плешчуць у далоні і разам радуюцца горы
 
Няхай пляскаюць у далоні рэкі, і горы радуюцца разам [з імі]

перад Госпадам, бо прыходзіць Ён судзіць зямлю. Ён будзе судзіць сусвет па справядлівасці і народы — па праўдзе.
 
перад абліччам ГОСПАДА, бо Ён ідзе судзіць зямлю. Сусьвет Ён будзе судзіць паводле праведнасьці і народы — паводле справядлівасьці.