Псалтыр 149 псалом

Псалтыр
Пераклад Чарняўскага 2017 → Пераклад Антонія Бокуна

 
 

Алілуя. Спявайце Госпаду песню новую, хвала Яму [гучыць] на зборы святых.
 
Альлелюя! Сьпявайце ГОСПАДУ новы сьпеў; хвала Яму ў царкве багабойных!

Хай узвесяліцца Ізраэль з Тым, Хто стварыў яго, і сыны Сіёна хай узрадуюцца з Валадарствам сваім.
 
Весяліся, Ізраілю, у Творцы тваім; радуйцеся, сыны Сыёну, у Валадару вашым!

Хай хваляць імя Яго ў хоры, з бубнам і цытрай спяваюць псальмы Яму,
 
Хвалеце імя Ягонае карагодамі, на бубнах і на гусьлях выслаўляйце Яго!

бо Госпад спагадны да народа Свайго і ўганаруе Ён пакорных збаўленнем.
 
Бо даспадобы ГОСПАДУ народ Ягоны; уцісканым Ён зьявіць збаўленьне.

Хай цешацца святыя славаю, хай весяляцца на ложах сваіх [застольных].
 
Будуць цешыцца багабойныя ў славе [Ягонай], будуць весяліцца на ложках сваіх.

Праслаўленні Бога — у глотках іх, і мячы абасечныя — у руках іх,
 
Праслаўленьне Богу няхай будзе ў вуснах іхніх, а меч двусечны — у руцэ іхняй,

каб учыніць помсту над паганамі, пакаранне над народамі,
 
каб зьдзейсьніць помсту над паганамі, кару над народамі,

каб у путы вязаць цароў, а князёў іх [вязаць] жалезнымі ланцугамі,
 
каб вязаць валадароў іхніх ланцугамі, і шляхту іхнюю — кайданамі жалезнымі,

каб споўніўся на іх напісаны прысуд: гэта хвала ўсім святым Яго. Алілуя.
 
каб учыніць для іх суд, як напісана. Гэткая велічнасьць для ўсіх багабойных Ягоных! Альлелюя!