Псалтыр 85 псалом

Псалтыр
Пераклад Чарняўскага 2017 → Пераклад Антонія Бокуна

 
 

Кіраўніку хору. Сыноў Корэ. Псальм.
 
Кіраўніку хору. Сыноў Караха. Псальм.

Спагадным быў Ты, Госпадзе, у Тваёй зямлі, перавярнуў Ты паланенне Якубава.
 
Ты зьявіў ласку, ГОСПАДЗЕ, для зямлі Тваёй, Ты вярнуў палон Якуба.

Адпусціў Ты несправядлівасць народа Твайго, дараваў усе грахі іх.
 
Ты дараваў віну народу Твайго, Ты пакрыў усе грахі іхнія. (Сэлях)

Спыніў Ты ўвесь гнеў Твой, адступіўся ад абурэння раздражнёнасці Тваёй.
 
Ты стрымаў усю лютасьць Тваю, адвярнуў жар гневу Твайго.

Навярні нас, Божа, збаўленне наша, і адвядзі гнеў Твой ад нас.
 
Вярні нас, Божа збаўленьня нашага, і спыні абурэньне Тваё на нас.

Ці ж вечна будзеш гневацца на нас, ці ж прадоўжыш гнеў Твой з пакалення ў пакаленне?
 
Няўжо вечна будзеш гневацца на нас і гнеў Твой працягнеш з пакаленьня ў пакаленьне?

Няўжо Ты, навярнуўшы, не ажывіш нас і народ Твой не ўзвесяліцца з Табою?
 
Няўжо не павернешся, каб ажывіць нас, каб народ Твой узрадаваўся ў Табе?

Госпадзе, пакажы нам Тваю міласэрнасць і дай нам Тваё збаўленне.
 
Дай нам убачыць, ГОСПАДЗЕ, міласэрнасьць Тваю, і збаўленьне Тваё дай нам!

Паслухаю, што кажа Госпад Бог, бо, напэўна, вясціць Ён мір народу Свайму, і святым Сваім, і тым, якія ўсім сэрцам навяртаюцца да Яго.
 
Паслухаю, што кажа Бог ГОСПАД, бо Ён кажа пра супакой для народу Свайго і для багабойных Сваіх, і няхай не зьвяртаюцца яны да глупоты. (Сэлях)

Сапраўды блізкае збаўленне Яго для тых, што шануюць Яго, каб пасялілася слава на зямлі нашай.
 
Вось, блізка збаўленьне Ягонае для тых, што баяцца Яго, каб слава [Божая] пасялілася на зямлі нашай.

Міласэрнасць і праўда спаткаюцца паміж сабою, справядлівасць і мір пацалуюцца.
 
Міласэрнасьць і праўда сустрэнуцца, праведнасьць і супакой пацалуюцца.

Вернасць узнікне з зямлі, а справядлівасць прагляне з неба.
 
Праўда ўзыйдзе з зямлі, і праведнасьць з неба глядзець будзе.

Бо Госпад дасць добразычлівасць, а зямля наша дасць плод свой.
 
І ГОСПАД дасьць даброцьце, і зямля наша дасьць ураджай свой.

Справядлівасць пойдзе перад Ім, і паставіць на дарозе крокі свае.
 
Праведнасьць будзе ісьці перад абліччам Яго і будзе стаяць на шляху крокаў Ягоных.