Псалтыр 148 псалом
Псалтыр
Пераклад Чарняўскага 2017 → Пераклад Антонія Бокуна
Алілуя. Хваліце Госпада з нябёсаў, хваліце Яго на вышынях.
Альлелюя! Хвалеце ГОСПАДА з неба, хвалеце Яго на вышынях!
Хваліце Яго, усе анёлы Яго, хваліце Яго, усе магуцці Яго.
Хвалеце Яго, усе анёлы Ягоныя! Хвалеце Яго, усе войскі Ягоныя!
Хваліце Яго, сонца і месяц, хваліце Яго, усе зоркі бліскучыя.
Хвалеце Яго, сонца і месяц, хвалеце Яго, усе зоркі ясныя!
Хваліце Яго, нябёсы нябёсаў, і ўсе воды, якія над небам.
Хвалеце Яго, нябёсы нябёсаў, і вы, воды, што па-над нябёсамі!
Хваліце імя Госпада, бо загадаў Ён, і ўсё было створана;
Няхай яны хваляць імя ГОСПАДА, бо Ён загадаў, і былі створаныя,
устанавіў Ён гэта навечна і на векі вечныя, паклаў загад, і не зменіць [яго].
і паставіў іх на вякі вечныя; даў ім пастанову, і не пераступяць яе.
Хваліце Госпада з зямлі, марскія драконы і ўсе бяздонні,
Хвалеце ГОСПАДА з зямлі, цмокі і ўсе бяздоньні,
агонь, град, снег, імгла, вецер навальнічны, які спаўняе слова Яго,
агонь і град, сьнег і туман, вецер бурны, які дзее паводле слова Ягонага,
горы і ўсе ўзгоркі, дрэвы пладовыя і ўсе кедры,
горы і ўзгоркі ўсе, дрэвы пладовыя і кедры ўсе,
дзікія звяры і ўсякая жывёла, паўзуны і птушкі крылатыя.
зьвяры і ўся скаціна, паўзуны і птаства крылатае,
Цары зямныя і ўсе народы, князі і ўсе суддзі зямлі,
валадары зямныя і ўсе народы, князі і ўсе судзьдзі зямлі,
юнакі і дзяўчаты, старыя з падлеткамі
юнакі разам з дзяўчатамі, старыя і маладыя.
хай славяць імя Госпада, бо ўзвысілася імя аднаго Яго. Веліч Яго вышэй за неба і зямлю,
Няхай яны хваляць імя ГОСПАДА, бо толькі Ягонае імя ўзьвялічанае, слава Ягоная над зямлёю і небам!
і ўзвысіў Ён рог народа Свайго. Песнь хвалы ўсім святым Яго, сынам Ізраэля, народа, які Яму блізкі. Алілуя.
Ён узьняў рог народу Свайго. Хвала Яму ад усіх багабойных Ягоных, ад сыноў Ізраіля, ад народу, блізкага Яму! Альлелюя!