Псалтыр 148 псалом

Псалтыр
Пераклад Чарняўскага 2017 → Пераклад Яна Станкевіча

 
 

Алілуя. Хваліце Госпада з нябёсаў, хваліце Яго на вышынях.
 
Галілуя! Хваліце СПАДАРА зь нябёсаў, хваліце Яго на вышынях.

Хваліце Яго, усе анёлы Яго, хваліце Яго, усе магуцці Яго.
 
Хваліце Яго, усі ангілаве Ягоныя; хваліце Яго, усі войскі Ягоныя;

Хваліце Яго, сонца і месяц, хваліце Яго, усе зоркі бліскучыя.
 
Хваліце Яго, сонца й месяц; хваліце Яго, усі ясныя гвезды;

Хваліце Яго, нябёсы нябёсаў, і ўсе воды, якія над небам.
 
Хваліце Яго, нябёсы нябёс і воды, што над нябёсамі.

Хваліце імя Госпада, бо загадаў Ён, і ўсё было створана;
 
Хай хваляць імя СПАДАРОВА, бо Ён расказаў, і стварыліся яны;

устанавіў Ён гэта навечна і на векі вечныя, паклаў загад, і не зменіць [яго].
 
Ён устанавіў іх на векі а векі; даў права, ад каторага яны не адступяць.

Хваліце Госпада з зямлі, марскія драконы і ўсе бяздонні,
 
Хваліце СПАДАРА ізь зямлі, морскія дзіўствы і ўсі глыбіні,

агонь, град, снег, імгла, вецер навальнічны, які спаўняе слова Яго,
 
Цяпло й град, сьнег і туман, буйны вецер, выпаўняючы слова Ягонае,

горы і ўсе ўзгоркі, дрэвы пладовыя і ўсе кедры,
 
Горы а ўзгоркі, пладовыя дзервы і ўсі кедры,

дзікія звяры і ўсякая жывёла, паўзуны і птушкі крылатыя.
 
Дзікія зьвяры й увесь статак, паўзуны й птушкі крылатыя,

Цары зямныя і ўсе народы, князі і ўсе суддзі зямлі,
 
Каралёве земныя і ўсі люды, князі і ўсі судзьдзі земныя,

юнакі і дзяўчаты, старыя з падлеткамі
 
Дзяцюкі й таксама дзяўчаты, старыя з малцамі.

хай славяць імя Госпада, бо ўзвысілася імя аднаго Яго. Веліч Яго вышэй за неба і зямлю,
 
Хай хваляць імя СПАДАРОВА, бо ўзьнята імя Ягонае адзінае, вялічча Ягонае на зямлі й на небе.

і ўзвысіў Ён рог народа Свайго. Песнь хвалы ўсім святым Яго, сынам Ізраэля, народа, які Яму блізкі. Алілуя.
 
Ён узвышыў рог люду Свайго, хвалу ўсіх дабрачэсьлівых Сваіх, сыноў Ізраельскіх, люду блізкога Сабе. Галілуя!