Псалтыр 103 псалом

Псалтыр
Пераклад Чарняўскага 2017 → Пераклад Яна Станкевіча

 
 

Давідаў. Дабраславі, душа мая, Госпада, і ўсё, што ёсць ува мне, — імя святое Яго.
 
Давідава. Дабраслаў, душа мая, СПАДАРА, і ўвесь нутр мой — сьвятое імя Ягонае;

Дабраславі, душа мая, Госпада ды не забывай пра ўсе даброцці Яго.
 
Дабраслаў, душа мая, СПАДАРА і не забудзься ўсіх дабрадзействаў Ягоных;

Ён адпускае ўсе твае правіннасці, Ён лечыць усе кволасці твае.
 
Каторы даруе ўсі бяспраўі твае, Каторы леча ўсі хваробы твае,

Ён адкупае душу тваю ад загубы, Ён вянчае цябе міласэрнасцю і літасцю;
 
Каторы адкупляе жыцьцё твае ад зьнішчэньня, Каторы карануе цябе ласкаю а спагадлівасьцяй,

Ён напаўняе дабротамі пры жыцці цябе, аднаўляецца, як у арла, маладосць твая.
 
Каторы сыце дабром век твой і, як арліную, аднаўляе маладосьць тваю.

Госпад, што чыніць справядлівасць і суд для ўсіх, хто церпіць крыўду,
 
Дзее справядлівасьць СПАДАР і суды ўсім уцісьненым.

Ён даў Майсею спазнаць шляхі Свае, сынам Ізраэля — справы Свае.
 
Ён паведаміў Масею дарогі Свае, сыном Ізраеля — учынкі Свае.

Літасцівы і спагадны Госпад, доўгацярплівы і вельмі міласэрны.
 
СПАДАР спагадлівы а ласкучынюшчы, памальны да гневу а вельмі міласэрны;

Не бясконца Ён сварыцца ды не вечна будзе гневацца.
 
Ня будзе заўсёды гневацца ані сердаваць вечна.

Не адгаджае нам паводле грахоў нашых і не помсціць нам за правіннасці нашыя.
 
Ня подле грахоў нашых зрабіў нам ані подле бяспраўяў вашых адплаціў нам;

Бо, наколькі ўзвышаецца неба над зямлёю, настолькі перавышае міласэрнасць Яго страх Яго.
 
Бо як высака неба над зямлёю, так дужая ласка Ягоная да тых, што баяцца Яго.

Як далёкі ўсход ад захаду, так аддаляе Ён ад нас грахі нашы.
 
Як далёкі ўсход ад захаду, так здаліў ад нас выступы нашы.

Як бацька літуецца над сынамі, так Госпад злітаваўся над тымі, што шануюць Яго.
 
Як айцец спагадае дзяцём, спагадае СПАДАР тым, што баяцца Яго;

Бо Ён спазнаў стварэнне наша, успомніў, што мы — пыл.
 
Бо Ён ведае ўхармаваньне нашае, помне, што пыл мы.

Быццам трава дні людскія, чалавек цвіце, як краска палявая,
 
Людзіна — як трава, дні ейныя; як кветка палявая, так яна квіціць;

ледзь павее на яе вецер, і ўжо няма яе, і месца яе невядомае.
 
Бо павее вецер на яе, і яе няма, і месца ейнага не пазнаюць.

А міласэрнасць жа Госпадава спрадвеку па век над тымі, што шануюць Яго, а справядлівасць Яго — для сыноў сынавых.
 
Але міласэрдзе СПАДАРОВА ад веку да веку да тых, што баяцца Яго, і справядлівасьць Ягоная да сыноў сыноў,

Для тых, якія трымаюцца запавету Яго і памятаюць прыказанні Яго, каб спаўняць іх.
 
Да такіх, што дзяржаць змову Ягоную, і да тых, што памятуюць прызначаньні Ягоныя, каб паўніць іх.

Госпад у небе падрыхтаваў пасад Свой, і валадарыць Ён над усім светам.
 
СПАДАР на нябёсах прыгатаваў пасад Свой, і гаспадарства Ягонае ўсе радзе.

Дабраслаўляйце Госпада, усе анёлы Яго, моцныя магуццем, робячы па слове Яго на паслухмянасць голасу мовы Яго.
 
Дабраслаўце СПАДАРА, ангілы Ягоныя, дужыя сілаю, поўнячыя слова Ягонае, каб слухаць гуку слова Ягонага!

Дабраслаўляйце Госпада, усе магуцці Яго, слугі Яго, якія выконваеце волю Яго.
 
Дабраслаўце СПАДАРА, усі войскі Ягоныя, службіты Ягоныя, што поўніце волю Ягоную!

Дабраслаўляйце Госпада, усе справы Яго, і ў кожным месцы Яго валадарання дабраславі, душа мая, Госпада!
 
Дабраслаўце СПАДАРА, усі творы Ягоныя, на ўсіх месцах дзяржавы Ягонае! Дабраслаў, душа мая, СПАДАРА!