Псалтыр 115 псалом

Псалтыр
Пераклад Чарняўскага 2017 → Пераклад Яна Станкевіча

 
 

Не нам, Госпадзе, не нам, але імю Свайму дай хвалу за Тваю міласэрнасць і за Тваю праўду.
 
Ня нам, СПАДАРУ, ня нам, але імені Свайму дай чэсьць, дзеля міласэрдзя Свайго, дзеля праўды Свае.

Чаму мелі б казаць паганы: «Дзе ж Бог іх?»
 
Нашто пагане кажуць: «Ідзе ж цяпер Бог іхны?»

Бог наш на небе, усё, што захацеў, зрабіў.
 
Але Бог наш на нябёсах, усе, што Ён зыча, робе.

Ідалы іх срэбра і золата, стварэнне людскіх рук.
 
Балваны іхныя срэбныя а залатыя, работа рук людзкіх.

Вусны маюць, ды не гавораць, вочы маюць, ды не бачаць.
 
Вусны ў іх, але ня гукаюць; вочы ў іх, але ня бачаць;

Вушы маюць, ды не чуюць, ноздры маюць, ды не адчуваюць паху.
 
Вушы ў іх, але ня чуюць; нос у іх, але ня нюхаюць;

Рукі маюць, ды не ўспрымаюць на дотык, ногі маюць, ды не ходзяць; горлам сваім не пададуць голасу.
 
Рукі ў іх, але ня шчупаюць; ногі ў іх, але ня ходзяць; і ня гучаць грытанкаю сваёю.

Будуць падобныя да іх тыя, што майструюць іх [балванаў], і ўсе, што вераць у іх.
 
Падобнымі да іх хай стануць тыя, што вырабляюць іх, кажны, што спадзяецца на іх.

Дом Ізраэля мае надзею ў Госпадзе: Ён іх успамога і абарона.
 
Ізраелю! спадзявайся на СПАДАРА: помач ім а шчыт іхны Ён.

Дом Аарона мае надзею ў Госпадзе: Ён іх успамога і абарона.
 
Доме Ааронаў! спадзявайцеся на СПАДАРА: помач ім а шчыт іхны Ён.

Тыя, што шануюць Госпада, ускладаюць надзею на Госпада: Ён іх успамога і абарона.
 
Вы, што баіцеся СПАДАРА, спадзявайцеся на СПАДАРА: помач ім а шчыт іхны Ён.

Госпад памятаў пра нас і будзе дабраслаўляць нас: будзе дабраслаўляць Ён дом Ізраэля, будзе дабраслаўляць Ён дом Аарона,
 
СПАДАР памятуе нас, будзе дабраславіць, будзе дабраславіць дом Ізраеляў, будзе дабраславіць дом Ааронаў,

будзе дабраслаўляць Ён усіх, хто шануюць Госпада, — як малых, так і вялікіх.
 
Падабраславе тых, што баяцца СПАДАРА, малых і вялікіх.

Хай Госпад памнажае вас, вас і сыноў вашых.
 
Хай дадасьць СПАДАР вам, вам а дзяцём вашым.

Дабраславёныя вы Богам, Які стварыў неба і зямлю.
 
Дабраславёныя вы СПАДАРОМ, Каторы ўчыніў нябёсы й зямлю.

Нябёсы, нябёсы — у Бога, зямлю ж даў для сыноў чалавечых.
 
Нябёсы — нябёсы СПАДАРОВЫ, а зямлю Ён аддаў сыном людзкім.

Не мёртвыя хваліць будуць Цябе, Госпадзе, ані ўсе тыя, што сыходзяць у маўчанне,
 
Мертвыя ня хваляць ЯГ ані зыходзячыя да маўчаньня;

а мы, жывыя, дабраслаўляем Госпада з гэтага [часу], цяпер і вечна.
 
Але мы будзем дабраславіць ЯГ адгэтуль аж на векі. Галілуя.