Псалтыр 2 псалом
Псалтыр
Пераклад Чарняўскага 2017 → Пераклад Яна Станкевіча
Чаму бунтуюцца плямёны і народы задумваюць марнае?
Нашто бунтуюцца народы, і люды задумляюць пустое?
Узнімаюцца цары зямлі і князі збіраюцца супольна супраць Госпада і супраць Намашчэнца Яго:
Паўстаюць каралі земныя, і начэльнікі радзяцца разам супроці СПАДАРА а супроці памазанца Ягонага:
«Парвём кайданы іх, і ярмо іх скінем з сябе!»
«Разарвем зялезьзі іхныя і ськінем ізь сябе путы іхныя».
Той, што жыве ў нябёсах, пасмяецца з іх, Госпад паздзекуецца з іх,
Сядзячы на нябёсах усьміхаецца, Спадар насьміхаецца зь іх.
а потым скажа ім у гневе Сваім і ярасцю Сваёй узрушыць іх:
Тады кажа Ён ім у гневе Сваім і шпарчынёю Сваёю палохае іх:
«Гэта Я паставіў Валадара Свайго на Сіёне, на святой гары Маёй!
«Гэта ж Я памазаў Караля Свайго на Сыёне — гары сьвятой Сваёй».
Абвяшчу прысуд Госпадаў. Бо Ён сказаў мне: “Ты — сын Мой, Я сёння нарадзіў цябе.
Я азнаймлю праз уставу: СПАДАР сказаў Імне: «Сын мой Ты, Я сядні нарадзіў Цябе.
Прасі Мяне, і Я дам табе ў спадчыну народы і на ўласнасць Табе зямныя прасторы.
Прасі ў Мяне, Я дам народы на спадак Табе і за дзяржаву Тваю — канцы зямлі.
Валадарыць будзеш імі кіем жалезным, нібы глінянае начынне скрышыш іх”».
Ты разаб’еш іх зялезным кіям і, як судзьдзё ганчарова, растаўчэш іх».
А цяпер, цары, зразумейце, уцяміце [тыя], што выносіце прысуд на зямлі:
Дык цяперака, каралі, будзьце кемныя; вучыцеся, судзьдзі зямлі!
Служыце Госпаду са страхам і радуйцеся Яму з дрыжаннем,
Служыце СПАДАРУ з боязьняю і цешчася з дрыжэньням.
Ушануйце Сына, каб не загневаўся і каб не папрападалі ў дарозе, калі ўзгарыцца неўзабаве гнеў Яго. Шчасныя ўсе, якія цвёрда спадзяюцца на Яго.
Цалуйце Сына, каб Ён не загневаўся, і вы ня згубілі дарогі; бо ўзгарыцца неўзабаве гнеў Ягоны. Шчасьлівыя ўсі, што ўцякаюць да Яго.
