Псалтыр 37 псалом

Псалтыр
Пераклад Чарняўскага 2017 → Пераклад Яна Станкевіча

 
 

АЛЕФ. Давідаў. Не зайздросць ліхадзеям і не наследуй тым, што робяць несправядлівасць.
 
Давідава. Ня злуйся на ліхадзеяў, не завідуй крыўднікам;

Бо высахнуць і ападуць яны хутка, як сена і быццам зялёная трава.
 
Бо, як траву, іх уборзьдзе скосяць, і, як зялёнае зельле, яны зьвянуць.

БЭТ. Спадзявайся на Бога і рабі дабро, і будзеш жыць на зямлі і даглядацца вераю.
 
Спадзявайся на СПАДАРА й рабі дабро; жыві на зямлі й жывіся вернасьцю.

Знайдзі радасць у Госпадзе, і дасць Ён табе тое, чаго патрабуе сэрца тваё.
 
І любуйся ў СПАДАРУ, і Ён дасьць табе жаданьні сэрца твайго.

ГІМЭЛЬ. Даручы Госпаду свой шлях і спадзявайся на Яго, і Ён здзейсніць.
 
Узвалі на СПАДАРА дарогу сваю, і спадзявайся на Яго, і Ён зьдзее,

І выявіць Ён, быццам зару, справядлівасць тваю, а суд твой — бы поўдзень.
 
І вывядзе, як сьвятліню, справядлівасьць тваю, і суд твой, як паўдня.

ДАЛЕТ. Скарыся ў Госпадзе і ўскладзі на Яго ўсю надзею; не зайздросць таму, хто мае шанец на шляху сваім, чалавеку, які чыніць падкопы.
 
Будзь ціхі перад СПАДАРОМ і чакай Яго. Не квяліся з дасьпяваючага на дарозе сваёй, з чалавека, злосныя замеры дзеючага.

ГЭ. Перастань гневацца і апануй абурэнне, не будзь зайздросны да таго, што вядзе да ліха.
 
Узьдзержуйся ад гневу і пакінь абурэньне, не квяліся; гэта адно да благога.

бо тыя, што чыняць ліха, будуць знішчаны, а хто спадзяецца на Госпада — зямлю ўспадкаеміць.
 
Бо нягодныя будуць адцяты, а спадзяючыя СПАДАРА адзяржаць зямлю.

ВАЎ. Яшчэ нямнога і не будзе грэшніка; глянеш на месца яго — і не знойдзеш яго.
 
Яшчэ крыху, і няма нягодных; і ўглядайся на месца ягонае, і — няма яго.

А вось пакорныя ўспадкаемяць зямлю і адчуюць асалоду ў бязмежнасці супакою.
 
Але лагодным спадзець зямля і будуць любавацца вялікім супакоям.

ДЗАЙН. Настаўляе пастку грэшнік на справядлівага і скрыгоча супраць яго зубамі сваімі.
 
Нягодны задумляе супроці справядлівага і скрыгоча на яго зубамі сваімі;

Але Госпад смяецца з яго, бо Ён ведае заўтрашні дзень яго.
 
Спадар сьмяецца зь нягоднага, бо Ён бача, што прыходзе дзень ягоны.

ГЭТ. Вымаюць грэшнікі меч з похваў, нацягваюць лук свой, каб пасцінаць беднага і няшчаснага, каб знішчыць тых, што ідуць правільным шляхам.
 
Меч агаляюць нягодныя і напінаюць лукі свае, каб паваліць убогага а галечу, зарэзаць тых, што ходзяць нацянькі.

Меч іх уваткнецца ў іх жа сэрца, а лукі іх паломяцца.
 
Меч іхны ўвыйдзе ў собскае сэрца іхнае, і лукі іхныя зломяцца.

Лепшая дробязь у справядлівага, чым вялікі дастатак у грэшнікаў.
 
Валей малое ў справядлівага, чымся багацьце ў шмат нягодных;

Бо рамёны грэшнікаў саслабеюць, а справядлівым Госпад надасць сілу.
 
Бо плечы нягодных зломяцца, але СПАДАР падпірае справядлівых.

ЁД. Вызначыў Госпад дні беззаганных, і спадчына іх будзе навечна.
 
СПАДАР ведае дні беззаганных, і спадак іхны на векі будзе трываць.

Не пасаромеюцца яны ў ліхую часіну і ў дні голаду будуць насычаны.
 
Не засаромяцца яны ў благім часе і ў дні галадові будуць насычаныя.

КАФ. Бо грэшнікі згінуць, і ворагі Госпада змарнеюць, бы зяленіва палёў, змарнеюць, нібыта дым.
 
Але нягодныя загінуць, непрыяцелі СПАДАРОВЫ, як сытыя авечкі, шчэзнуць, як дым, яны шчэзнуць.

ЛЯМЭД. Грэшнік пазычае, але не вяртае, а справядлівы шкадуе і аддае.
 
Пазычае нягодны і не аддаець, але справядлівы робе ласку і даець.

Бо дабраславёныя Яго ўспадкаемяць зямлю, а праклятыя Ім будуць знішчаны.
 
Бо дабраславёныя Ім адзяржаць зямлю, праклятыя Ім будуць выгублены.

МЭМ. Крок чалавека спасіляецца Госпадам, і ахвотна пойдзе той шляхам Яго.
 
Ад СПАДАРА сігні людзіны ўстаноўлены, і дарозе ейнай Ён прыяе.

Калі ж паваліцца ён, то не паб’ецца, бо Госпад падставіць руку Сваю.
 
Як яна паваліцца, яна ня зрынецца стрым галаву, бо СПАДАР падпора рукі ейнае.

НУН. Быў я малады і састарэў, і не бачыў я, каб справядлівы быў пакінуты і каб дзеці яго прасілі хлеба.
 
Малады я быў, і застараўся, і ня бачыў я справядлівага пакіненага ані насеньня ягонага просячага хлеба.

Цэлы дзень чыніць Ён міласэрнасць і пазычае, і дзеці яго ў дабраславенні будуць.
 
Ён цэлы дзень робе ласку і пазычае, і насеньне ягонае ё дабраславенствам.

САМЭК. Ухіляйся ад ліха і рабі дабро, і будзеш ты жыць у вяках.
 
Адхінайся ад ліха, і рабі дабро, і жыві на векі;

Бо Госпад любіць справядлівасць і не пакіне сваіх святых. АЙН. А несправядлівыя загінуць навечна, і нашчадкі бязбожнікаў будуць знішчаны.
 
Бо СПАДАР любе суд, Ён не пакіне дабрачэсьлівых сваіх, навекі захаваюцца; але насеньне бязбожных выгубіцца.

А справядлівыя ўспадкаемяць зямлю і век будуць жыць на ёй.
 
Справядлівым спадзець зямля; і яны будуць жыць на векі на ёй.

ФЭ. Вусны справядлівага спяваюць праўду і язык яго гаворыць тое, што правільна.
 
Вусны справядлівага выказуюць мудрасьць, і язык ягоны гукае праз права;

Закон Бога яго ў сэрцы яго, і не хістаюцца яго ногі.
 
Закон Бога ягонага ў сэрцу ягоным, і ступы ягоныя не пакаўзнуцца.

САДЭ. Сочыць грэшнік за справядлівым і імкнецца забіць яго.
 
Цікуе бязбожны на справядлівага, ён шукае яго забіць.

Але Госпад не пакіне яго ў руках таго, не асудзіць яго, калі тыя будуць асуджаны.
 
СПАДАР не пакіне яго ў руццэ ягонай і не абвінуе яго на судзе ягоным.

КОФ. Чакай Госпада і пільнуй шлях Яго, і Ён узвысіць цябе, каб атрымаў ты ў спадчыну зямлю; калі будуць знішчаны грэшнікі, ты ўбачыш.
 
Спадзявайся на СПАДАРА і глядзі дарогі Ягонай, — і Ён падыйме цябе, каб тэ’ спала зямля; на адцяцьце бязбожных ты будзеш глядзець.

РЭС. Бачыў я бязбожніка, які надзімаўся ад пыхі і ўзвышаўся, быццам кедр зялёны,
 
Я бачыў бязбожніка неміласьціўнага, што шырыўся, як мясцовае зялёнае дзерва;

і я прайшоў міма, і вось не было ўжо яго; і шукаў я яго, а ён не знайшоўся.
 
І я прайшоў, і гля, яго няма; я шукаў яго, і не знайшоў.

СІН. Назірай за бязгрэшным і глядзі на справядлівага, бо будучыня належыць чалавеку міратворцу.
 
Зважай на беззаганнага і глядзі на пасьцівага, бо канец такой людзіне ё супакой.

А несправядлівыя згінуць разам, будучыня бязбожнікаў будзе знішчана.
 
Але выступнікі будуць супоўна зьнішчаны, канец нягодных адцяты.

ТАЎ. Збаўленне справядлівых у Госпада; і Ён абаронца ў час бяды.
 
Спасеньне справядлівых ад СПАДАРА; Ён горад іхны ў часе бяды.

І ўспамагае ім Госпад, і вызваляе іх, і вырывае іх ад бязбожных, і збаўляе іх, бо яны хінуцца да Яго.
 
І памагае ім СПАДАР, і вывальняе іх; Ён вывальняе іх ад бязбожных і выбаўляе іх, бо яны здаюцца на Яго.