Псалтыр 97 псалом

Псалтыр
Пераклад Чарняўскага 2017 → Пераклад Яна Станкевіча

 
 

Госпад заваладарыў! Хай радуецца зямля, хай весяляцца шматлікія астравы.
 
СПАДАР гаспадарствуе; хай зямля цешыцца; хай вяселяцца шмат абтокаў.

Аблокі і туман — навокал Яго; справядлівасць і закон — гэта падмурак Яго пасаду.
 
Булак а туман навокал Яго; справядлівасьць а суд подам пасаду Ягонага.

Агонь ідзе перад Ім і паліць наўкола Яго непрыяцеляў.
 
Цяпло йдзець перад Ім і пале навокал варагоў Ягоных.

Маланкі Яго асвятляюць сусвет: бачыць і трымціць зямля.
 
Асьвячае маланьня Ягоная сьвет; бачыла а дрыжэла зямля.

Горы, як воск, растапляюцца перад Госпадам, перад Госпадам сусвету.
 
Горы, як воск, таялі перад відам СПАДАРА, перад відам Спадара ўсяе зямлі.

Нябёсы вяшчаюць справядлівасць Яго, а ўсе народы бачаць Яго хвалу.
 
Агалашайце, нябёсы, справядлівасьць Ягоную, і ўсі люды пабачаць чэсьць Ягоную.

Хай пасаромяцца ўсе, што пакланяюцца ідалам і што выхваляюцца балванамі сваімі. Пакланіцеся Яму, усе анёлы Яго.
 
Хай засаромяцца ўсі, што служаць выразаным, што хваляцца балванамі. Кланяйцеся яму ўсі багі.

Чуе гэта і весяліцца Сіён, і радуюцца гарады Юды дзеля прысудаў Тваіх, Госпадзе.
 
Пачуў і разьвесяліўся Сыён, і цешыліся дачкі Юдзіны із судоў Тваіх, СПАДАРУ;

Бо ты, Госпадзе, праслаўлены на ўвесь свет, надзвычайна ўзвышаешся Ты над усімі багамі.
 
Бо Ты, СПАДАРУ, высокі над усёю зямлёю, надта ўзьняўся над усімі багамі.

Любіць Госпад тых, што ненавідзяць ліха; сцеражэ Ён душы святых, — з рукі грэшніка вызваліць іх.
 
Любячыя СПАДАРА! ненавідзьце ліха. Ён крые душы дабрачэсьлівых Сваіх; з рукі нягодных вывальняе іх.

Для справядлівага ззяе святло, і для праўдзівых сэрцам — радасць.
 
Сьвятліня насяецца справядліваму й пасьцівым сэрцам — весялосьць.

Цешцеся, справядлівыя, у Госпадзе, і вызнавайце памяць святасці Яго.
 
Цешчася ў СПАДАРУ, справядлівыя, і дзякуйце за сьведам’е сьвятасьці Ягонае.