Псалтыр 91 псалом
Псалтыр
Пераклад Сабілы і Малахава → Пераклад Антонія Бокуна
Хто жыве ў сховішчы Найвышэйшага, той прабывае ў засені Ўсемагутнага.
Той, які жыве пад заслонай Найвышэйшага і пад ценем Усемагутнага,
Я скажу Ягове: «(Ты) сховішча маё і цытадэль мая, Бог мой.» На Яго я спадзяюся.
кажа да ГОСПАДА: «Ты — прыстанішча маё і цьвярдыня мая, Бог мой, на Якога я спадзяюся».
Сапраўды, Ён выратуе цябе ад сеці лаўца, ад губіцельнага мору.
Бо Ён выратуе цябе ад пасткі птушкалова, ад пошасьці сьмяротнай.
Крылом Сваім Ён засьціць цябе, і пад крыльлем Ягоным ты знойдзеш прытулак. Шчыт і аслона ёсьць Праўда Ягоная.
Пер’ем Сваім закрые цябе, і пад крыламі Ягонымі будзеш мець надзею; праўда Ягоная — шчыт і заслона.
Ты ня будзеш баяцца страху ноччу, ні стралы, што ўдзень ляціць,
Не спалохаешся страху ўначы, ані стралы, якая ўдзень ляціць,
ні мору, што ў цемры бадзяецца, ні пошасьці, што пустошыць у полудзень.
ані пошасьці, якая ў цемры прыходзіць, ані заразы, якая сярод белага дня пустошыць.
Падзе́ подле цябе тысяча і дзесяць тысячаў праваруч ад цябе; але да цябе гэта ня наблізіцца.
Тысяча побач з табой упадзе і дзесяць тысячаў праваруч ад цябе, а да цябе яна не падыйдзе.
Толькі вачыма тваімі глядзець будзеш і ўбачыш расплату з бязбожнікамі.
Толькі вачыма тваімі глядзець будзеш і ўбачыш з бязбожнымі расплату.
Сапраўды, Ты, Ягова, мой прытулак. (Чалавек, шчасьлівы ты, што) Найвышэйшага ты выбраў прытулкам сваім.
За тое, што ты ГОСПАДА, прыбежышча сваё, і Найвышэйшага выбраў за сялібу сабе,
Ня сустрэне цябе ліха, і ніякая пляга ня наблізіцца да жытла твайго,
не спаткае цябе злое, і пакараньне не наблізіцца да намёту твайго.
бо Ён Ангелам Сваім дасьць загад пра Цябе сьцерагчы Цябе на ўсіх шляхах Тваіх.
Бо Ён анёлам Сваім загадае пра цябе, каб захоўвалі цябе на ўсіх шляхах тваіх.
На руках яны панясуць Цябе, каб Ты ня выцяўся аб камень Нагою Тваёй.
На руках панясуць цябе, каб не спатыкнуўся аб камень нагою тваёю.
На льва і гадзюку ты наступіш. Маладога льва і дракона ты растопчаш.
Па ільвах і гадзюках хадзіць будзеш, львянятаў і цмокаў патопчаш.
За тое, што ён у любві прыляпіўся да Мяне, Я выратую яго, Я ўзьніму яго на нядасягальную вышыню, бо ён ведае Імя Маё.
«За тое, што ён Мяне ўзьлюбіў, збаўлю яго; узвышу яго, бо імя Маё ведае.
Ён будзе гука́ць Мяне, і Я адкажу яму. Я буду зь ім у час ліха. Я вызвалю яго і ўслаўлю яго.
Будзе клікаць Мяне, і Я адкажу яму; у бядзе Я буду з ім, выратую яго і ўшаную яго.
Я насычу яго даўжынёй дзён (ягоных) і дам яму ўбачыць збаўленьне Маё.
Доўгімі днямі насычу яго і дам убачыць збаўленьне Маё».
