Псалтыр 96 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Спявайце Госпаду новую песню, спявай Госпаду, уся зямля.
 
Сьпявайце Госпаду новую песьню, сьпявайце Госпаду у землі!

Спявайце Госпаду, дабраслаўляйце імя Яго, абвяшчайце з дня ў дзень Яго збаўленне.
 
Сьпявайце Госпаду, багаслаўце Імя Яго! Абвяшчайце з дня на дзень збаўленьне Ягонае.

Абвяшчайце між паганамі хвалу Яго, сярод усіх народаў — цуды Яго.
 
Апавядайце між паганамі славу Яго, між усімі пародамі цуды Яго.

Бо вялікі ёсць Госпад, і годны хвалы бязмежнай, варты ўшанавання больш за ўсіх багоў.
 
Вялікі Госпад і вельмі годны хвалы, страшней Ён за ўсіх чыста багоў!

Бо ўсе паганскія багі — марнасць, Госпад жа стварыў нябёсы.
 
Нішто — ўсе багі народаў, а Госпад нябёсы стварыў.

Велічнасць і прыгажосць перад абліччам Яго, магутнасць і аздоба — у свяцілішчы Яго.
 
Бліскучасьць і маестат перад абліччам Яго, магутнасьць і краса ў сьвятыні Ягонай.

Прыносьце Госпаду, сем’і народаў, прыносьце Госпаду хвалу і магутнасць,
 
Аддайце Госпаду плямёны народаў; аддайце Госпаду магутнасьць і славу!

Прыносьце Госпаду хвалу імя Яго. Прыносьце ахвяры і ўваходзьце ў дзядзінец Яго.
 
Аддайце Госпаду славу Імяні Яго; нясеце ахвяру, ды ідзеце ў падворкі Ягоныя.

Пакланіцеся Госпаду са святой урачыстасцю. Трымці перад абліччам Яго, уся зямля.
 
пакланіцеся ніцма перад Госпадам у сьвяточнай адзежы. Задрыжы перад Ім уся зямля!

Кажыце сярод народаў: Госпад заваладарыў, бо Ён выправіў сусвет, які не пахіснецца; будзе судзіць Ён народы па справядлівасці.
 
Скажыце паганам: ”Госпад валадарыць (царуе)! Ён умацаваў сусьвет, каб не пахіснуўся. І будзе судзіць народы па праўдзе.

Хай весяляцца нябёсы і радуецца зямля, хай шуміць мора і ўсё, што яго запаўняе.
 
Няхай узрадуюцца нябёсы і увесяліцца зямля; няхай зайграе мора і ўся паўната ягона!

Хай цешацца палі і ўсё, што на іх. Тады ўзрадуюцца ўсе лясныя дрэвы,
 
Хай усьцешыцца поле і ўвесь уражай, каб усе дрэвы лясныя зашумелі ад радасьці! —

перад абліччам Госпада, бо Ён прыходзіць, бо Ён прыходзіць судзіць зямлю. Будзе Ён судзіць сусвет справядліва і народы паводле Сваёй праўды.
 
Перад абліччам Госпада, бо Ён надыходзіць, бо Ён прыходзіць судзіці зямлю. Ён будзе судзіць сусьвет па справядлівасьці і народы праўды ў праўдзе сваей.