Псалтыр 41 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Кіраўніку хору. Псальм Давідаў.
 
Кіраўніку хору. Псальм Давідавы.

Шчасны той, хто спачувае няшчаснаму. У дзень ліхі вызваліць яго Госпад.
 
Багаслаўлёны, хто зважае на беднага і мізэрнага: у дзень няшчасьця Госпад выбавіць яго.

Госпад ухавае яго і ажывіць яго, і шчасным зробіць яго на зямлі, не аддасць яго на волю непрыяцеляў яго.
 
Няхай Госпад яго сьцеражэ і дае яму жыцьцё і шчасьце на зямлі.(б) О, (Госпад), не дасьць яго ў лютасьць ворагаў ягоных!

Госпад прынясе яму ўспамогу на ложа пакуты яго; Ты перавернеш яго пасцель у немачы яго.
 
Госпад яго ўзмацуе на ложы нядужным: “Ты зусім адменіш пасьцель у хваробе яго.”

Кажу я: «Госпадзе, пашкадуй мяне, ацалі душу маю, бо зграшыў я Табе!»
 
Я сказаў: “Госпадзе, будзь мне міласэрны! аздараві душу маю, бо я саграшыў супраць Цябе”.

Непрыяцелі мае ліха кажуць пра мяне: «Калі ж памрэ ён і калі прападзе імя яго?»
 
Мае ворагі абмаўляюць мяне і кажуць: “Калі ж ён памрэ і шчэзьне імя яго?”.

І калі хто прыходзіць наведаць мяне, то кажа ўсякія недарэчнасці. Сэрца яго збірае сабе правіннасці, і, выйшаўшы вонкі, ён пачынае плявузгаць.
 
А хто наведвае мяне, гаворыць пустое: сэрца ягонае — поўнае злосьці, а за вочы зьневажае мяне.

Поруч усе непрыяцелі мае шэпчуць супраць мяне, яны задумваюць усякае ліха супраць мяне:
 
У зайздрасьці ўсе ненавісьнікі шэпчуць супраць мяне: выдумліваюць на мяне ліхое — шкоднае мне.

«Сурокі прычапілася да яго», або: «Той, хто хворы залёг, той не здолее падняцца».
 
(Кажуць): “Пякельная пошасьць пала на яго, калі заляжа, дык не паўстаць яму болей!”.

Але нават чалавек, з якім я жыў у супакоі, якому я давяраў, які есць хлеб мой, пяту падняў супраць мяне.
 
Нават і прыяцель, якому я давяраў, які еў мой хлеб, падняў пяту на мяне.

Ты ж, Госпадзе, злітуйся з мяне і абудзі мяне, і аддам я ім.
 
Але Ты, Госпадзе, зжалься нада мною і падыймі мяне, каб я ім, такім людзям, аддзячыў.

Па тым пазнаю я, што Ты спагадаеш мне, калі не будзе смяяцца непрыяцель мой з мяне.
 
І з таго я ведаць буду, што Ты мне прыхільны, калі мой вораг ня будзе больш мець перамогі нада мною.

Ты падтрымаў мяне дзеля бязвіннасці і паставіў мяне перад Табою навек.
 
І я, якога Ты падтрымаў, астануся незакрануты і Ты мяне паставіш перад сваім Абліччам навекі.

Дабраславёны Госпад, Бог Ізраэля, ад веку і аж да веку. Хай жа будзе, хай будзе.
 
Будзь пахвалены, Госпадзе Божа Ізраіля, ад веку і аж навекі! Аман, аман!