Псалтыр 30 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Псальм. Песня на ўрачыстасць пасвячэння святыні. Давідаў.
 
Псальм Давідавы. Песьня на асьвячэньне храму.(а)

Буду ўзвялічваць Цябе, Госпадзе, бо Ты выцягнуў мяне і не даў ворагам маім пацяшацца з мяне.
 
Славіць Цябе буду, Госпадзе: Ты вызваліў мяне і ня даў маім ворагам цешыцца нада мною.

Госпадзе, Божа мой, я ўсклікаў да Цябе, і Ты аздаравіў мяне.
 
Госпадзе, Божа мой, да Цябе я клікаў, а Ты вылячыў мяне.

Госпадзе, Ты вывеў з пекла душу маю, ажывіў мяне, каб не сышоў я ў магілу.
 
Госпадзе, Ты вывеў душу маю з пекла, ажыўляючы мяне між тых, што сходзяць у магілу.

Спявайце псальмы Госпаду, святыя Яго, і падзяку складайце на ўспамін святасці Яго,
 
Радуйцеся ў Госпадзе тыя, што любіце Яго: выхваляйце памяць сьвятасьці Яго!

бо гнеў Яго — на імгненне, і жыццё — у зычлівасці Яго. Увечары трывае плач, а на золаку — радасць.
 
Бо гнеў ягоны трывае хвіліну, а ласкавасьць — на ўсё жыцьцё: увечары плач завітае, а на раніцы — крык радасьці!

А я сказаў у бестурботнасці маёй: «Не пахіснуся навек».
 
А я сказаў у сваім шчасьці: “Нішто не захістае мяне навекі!”.

Госпадзе, у зычлівасці Тваёй Ты аздобіў цнотай мяне, Ты схаваў аблічча Тваё, і я ўстрывожыўся.
 
Госпадзе, Ты ласкай сваей мяне ўмацаваў на горах непарушных: як ты хаваеш сваё аблічча, я трывожуся.

Да Цябе я, Госпадзе, клікаў і да Бога майго звяртаўся.
 
Да Цябе, Госпадзе, я клічу: — у Бога майго я прасіў ласкі.

Што за карысць з крыві маёй ды ад сыходу майго ў парахненне? Ці ж пыл будзе вызнаваць Цябе, ці ж будзе праўду Тваю абвяшчаць?
 
Якая табе карысьць у крыві маей, што зыйду ў магілу? Ці ж пыл будзе хваліць Цябе і абвяшчаць праўду тваю?

Пачуў Госпад і злітаваўся нада мною, Госпад стаўся памочнікам маім.
 
Пачуй Госпадзе і зжалься нада мною! Госпадзе, будзь мне успамогай.

Ты замяніў нараканне маё ў скокі, парваў зрэб’е маё і радасцю падперазаў мяне,
 
І Ты зьмяніў журбу маю ў танец (у радасьць): Ты зьняў зь мяне пакутны мяшок (лахман) і апрануў мяне радасьцяй.

каб спявала Табе хвала мая і не маўчала. Госпадзе, Божа мой, вечна буду праслаўляць Цябе.
 
Так душа мая не змоўкла, і сьпяваць будзе маё сэрца. Госпадзе, Божа мой, выхваляць Цябе буду навекі!