Псалтыр 84 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Кіраўніку хору. Паводле «Выціскальняў». Сыноў Корэ. Псальм.
 
Кіраўніку хору — Сыноў Корэ — Псальм.

Якія ж мілыя паселішчы Твае, Госпадзе магуццяў!
 
Як пажаданыя твае сялібы, о Госпадзе Сілаў!

Тужыць і рвецца душа мая ў палац Госпада, сэрца маё і цела маё ўзрадаваліся Богу жывому.
 
Зьнемагае душа мая і уздыхае да панадворкаў Госпада; маё сэрца і маё цела весяліцца ў Богу жывым.

Нават верабей знаходзіць сабе дом і ластаўка гняздо сабе, каб уладкаваць птушанят сваіх: ахвярнікі Твае, Госпадзе магуццяў, Валадару мой і Божа мой!
 
Нават верабей знайшоў сабе прыпынак і ластаўка гняздо сабе, дзе птушанят сваіх укладае: (а я) твае алтары, госпадзе Сілаў, — Ты мой Цар і мой Божа!

Шчасныя тыя, што жывуць у доме Тваім: век будуць яны славіць Цябе.
 
Шчасьлівыя жыхары твайго дому, — бязупынна Цябе выхваляюць.

Шчасны той чалавек, у якога ёсць успамога ад Цябе; размясціў ён у душы нябесныя шляхі:
 
Шчасьлівыя людзі, якіх сіла ёсць у Табе, якія сьцерагуць у сэрцы сьцежкі (к Табе).

Праходзячы сухой лагчынаю, яны робяць яе крыніцаю, бо ранні дождж дабраславеннем зросіць яе.
 
Праходзячы далінаю сьлёзаў (сухою?), яны робяць яе месцам крынічным і першы дождж акрывае яе бласлаўленнем.

Пойдуць яны з сілы ў сілу, убачыцца [імі] Бог багоў на Сіёне.
 
Гэтак ідуць яны ад узвышэньня да ўзвышэньня, і Бог ім пакажацца ў Сыёне.

Госпадзе, Божа магуццяў, выслухай малітву маю; прыхіні вуха, Божа Якубаў.
 
Госпадзе, Божа Сілаў! выслухай малітву маю; нахілі вуха, Божа Якубавы!

Глянь, Божа, наш абаронца, ды глянь на аблічча намашчэнца Твайго!
 
Божа, наш шчыце! Пабач і паўзірайся на аблічча памазанца твайго!

Бо мілейшы адзін дзень у палатцы Тваёй за тысячу! Хачу лепш стаяць на парозе дома Бога майго, чым жыць у палатках грэшнікаў.
 
Бо адзін дзень на панадворках тваіх ідзе за тысячу і я выбраў: парог дому Бога майго лепш як палатка бязбожніка.

Бо Госпад Бог ёсць сонца і шчыт; ласку і славу дасць Госпад; Ён не забярэ дабра ў тых, што жывуць у бязвіннасці.
 
Бо Бог ёсць абарона і шчыт: Ён дае шчасьце і славу; не адмовіць Госпад дабра ўсім, што ходзяць у дасканаласьці.

Госпадзе магуццяў, шчасны той чалавек, які ўскладае надзею на Цябе!
 
Госпадзе Сілау! Шчасьлівы чалавек, што на Цябе спадзяецца!