Псалтыр 108 псалом

Псалтыр
Пераклад Чарняўскага 2017 → Пераклад Язэпа Германовіча

 
 

Песня. Псальм. Давідаў.
 
Песьня. Псальм Давідавы.

Прыгатавана сэрца маё, Божа, прыгатавана сэрца маё, буду спяваць і граць псальмы. Добра, хвала мая!
 
Сэрца маё гатовае, о Божа! хачу я сьпяваці і іграці! Паўстань, мая слава!

Прабудзіся, гуслі і цытра, абуджу я зараніцу.
 
Збудзіся, арфа і гусьлі! Я збуджу сьвітаньне!

Буду вызнаваць Цябе, Госпадзе, між народамі, буду Табе граць псальмы сярод людзей,
 
Буду славіць Цябе між народамі, Госпадзе і сьпяваці Табе між паганамі!

бо міласэрнасць Твая вялікая аж да нябёсаў і аж да воблакаў праўда Твая.
 
Вышэй за нябёсы любоў твая і праўда твая да аблокаў.

Падыміся над нябёсамі, Божа, і над ўсёй зямлёю — слава Твая.
 
О, Божа, узьніміся панад небам і хай слава твая будзе над усею зямлёю!

Каб вызваліліся ўмілаваныя Твае, дай збаўленне правіцай Тваёй і выслухай мяне.
 
Каб твае улюбленыя былі свабонымі; успамажы правіцаю тваею і выслухай нас!

Прамовіў Бог у святыні Сваёй: «Узрадуюся і падзялю Сіхэм і памераю лагчыну Сукот;
 
Бог казаў у сьвятыні сваей: “Буду цешыцца і падзялю Я Сіхем і разьмераю даліну Сукат.

мой Галаад і мой Манасэс, і Эфраім — цвярдыня галавы маёй, Юда — скіпетр мой.
 
Мой ёсьць Галяад і мой Манасса, Эфраім — цьвярдыня маей галавы, Юда — бэрла улады маей!

Моаб — конаўка для абмывання Майго, над Ідумеяй узнясу чаравік мой, над Філістэяй усклікаць буду».
 
Моаб — мая судзіна умывальная; на Эдом Я кіну мой сандал; над Фівіістыяй буду Я пераможцай.

Хто давядзе мяне ў абаронны горад? Хто давядзе мяне аж да Ідумеі?
 
Хто увядзе Мяне у места умацаванае? Хто Мяне давядзе аж да Эдому?

Хіба Ты, Божа, Які адпіхнуў нас? Ці ўжо не выйдзеш, Божа, з нашымі сіламі?
 
Ці-ж мы будзем адкінуты, о Божа? Ці-ж Ты больш ня выйдзеш з нашымі войскамі?

Дай нам успамогу ад прыгнёту, бо марны ратунак людскі.
 
Дай нам успамогу падчас уціску!, дарэмная ёсьць падмога людзкая!

З Богам праявім магуцце, і Ён стопча нашых непрыяцеляў.
 
З Богам мы сілу пакажам і Ён патопча нашых праціўнікаў!