Лукаша 3 разьдзел

 

 

У пятнаццаты ж год гаспадараньня Тыбэрыя кесара (і) гаспадаруючага Понція Пілата (у) Юдэі, і зьяўляючагася чацьвертаўладнікам Галілеі — Гірада, Піліпа ж, брата ягонага — зьяўляючагася чацьвертаўладнікам Ітурэі і Траханіцкай краіны, і Лісанія зьяўляючагася чацьвертаўладнікам (у) Абілінэі;

 

І у пятнаццаты ж год панавання кесара Тыберыя, калі Понці Пілат быў намеснкам Іудзеі, Піліп жа, яго брат, быў чацвёртаўладнікам Ітурэі і Траханіцкай зямлі, а Лісані чацвёртаўладнікам Авілінеі,

пры архірэях Ганьне і Каяхве было Слова Божае да Яана, Захаравага сына, у пустэльні.

 

пры першасвятары Ганне і Каіяфе, было Божае слова да Іаана, сына Захарыевага, у пустэльні.

І (ён) прайшоў па ўсёй ваколіцы Ярдану, абвяшчаючы хрышчэньне пакаяньня дзеля дараваньня грахоў,

 

І ён прайшоў усё наваколле Іярдана, абвяшчаючы хрышчэнне пакаяння дзеля адпушчэння грахоў,

як напісана ў кнізе слоў Гісаі прарока, які кажа: голас крычачага ў пустэльні: прыгатуйце шлях Госпада, простымі зрабіце сьцежкі Яму;

 

як напісана у кнізе слоў прарока Ісаі: «Голас прапаведніка ў пустэльні «Падрыхтуйце дарогу Госпаду, выраўняйце сцежкі Яму;

кожны дол няхай напоўніцца, і кожная гара і ўзгорак няхай панізіцца, і крывулі стануць простымі, і няроўныя дарогі (стануць) гладкімі;

 

кожны дол хай напоўніцца, кожная гара і пагорак панізіцца, а што крывое, няхай выпрастаецца, а дарогі выбоістыя стануць гладкімі;

і ўбачыць кожнае цела збаўленьне Божае.

 

І ўбачыць кожнае стварэнне збавенне Божае».

І вось казаў (ён) людзям, якія прыходзілі хрысьціцца ад яго: спародзьзе яхідзінавае! хто нахіліў вас уцякаць ад надыходзячага гневу?

 

Дык казаў натоўпам, што выходзілі хрысціцца ў яго: «Гадзючыя выпладкі хто падвучыў вас уцякаць ад будучага гневу?

Зрабіце ж плады годныя пакаяньня, і ня думайце гаварыць самі сабе: ба́цьку маем Абрагама, бо кажу вам, што Бог можа з каменьняў гэтых стварыць дзяцей Абрагаму.

 

Стварыце ж годныя плады пакаяння і не спрабуйце казаць самім сабе: «Бацька наш Аўраам». Бо кажу вам, што Бог можа з гэтага Камення ўзняць дзяцей Аўрааму.

Бо ўжо і сякера каля караня дрэваў ляжыць; усякае дрэва, якое плоду добрага ня прыносіць, сьсякаецца й кіда́ецца ў вагонь.

 

Бо ўжо і сякера прыкладзена да кораня дрэў: кожнае ж дрэва, што добрага плоду не родзіць, будзе высечана і ўкнута ў агонь».

І пыталіся ў яго людзі, кажучы: што ж (нам) рабіць?

 

І натоўпы пыталіся ў яго; кажучы: «Што ж нам рабіць?»

Адказаўшы ж (ён) ім гаворыць: хто мае дзьве адзежыны, той няхай дасьць таму, хто ня мае, і, хто мае ежу, няхай робіць гэтаксама.

 

Ён жа ў адказ ім казаў: «Хто мае дзве кашулі, няхай падзеліцца з тым, хто не мае, і хто мае харч, няхай тое самае зробіць.»

Прыйшлі ж і мытнікі ахрысьціцца і сказалі яму: настаўнік! што на́м рабіць?

 

Прыйшлі ж і мытнікі хрысціцца і сказалі яму: «Настаўніку, што нам рабіць?»

Ён жа адказаў ім: нічога большага за загаданае вам ня спаганяйце.

 

А ён ім сказаў: «Не патрабуйце больш, чым вызначана вам.»

Пыталіся ў яго таксама і жаўнеры, кажучы: а нам што рабіць? І сказаў ім: ні ў ко́га ня вымагайце грошы і ня паклёпнічайце, і будзьце задаволены сваёй платай.

 

Пыталіся ж у яго і воіны, кажучы: «А нам што рабіць?» і сказаў ім: «Нікому не чыніце гвалту, не абвінавачвайце фальшыва і задавальняйцеся платаю сваёю».

Калі ж народ мучыўся думкай, і разважалі ўсе ў сэрцах сваіх пра Яана, ці ня Хрыстос ён,

 

калі ж народ чакаў і ўсе разважалі ў сэрцах сваіх пра Іаана, ці не Хрыстос ён сам,

адказаў Яан усім, кажучы: я сапраўды хрышчу вас вадою. Але ідзе Дужэйшы за мяне, у Якога я ня варты разьвязаць рамень абутку Ягонага; Ён будзе хрысьціць вас Духам Сьвятым і агнём;

 

адказаў Іаан, кажучы ім: «Я вадою хрышчу вас; а ідзе Мацнейшы за мяне, у Якога я няварты развязаць рамень Яго сандаляў; Ён вас будзе хрысіцць Святым Духам і агнём;

і гархва Ягоная ў Руцэ Ягонай, і (Ён) ачысьціць гумно Сваё і зьбярэ пшаніцу ў сьвіран Свой, а мяккіну спаліць агнём няпагасным.

 

Яго веялка ў руць Яго, каб пільна перачысціць Свой ток і сабраць пшаніцу ў сваю клець, а мякіну спаліць незгасальным агнём».

І вось, і многае другое, навучаючы, дабравесьціў (ён) народу.

 

Ды і шмат іншаму навучаў, абвяшчаючы Добрую Навіну народу.

Гірад жа чацьвертаўладнік, дакараны ім за Гірадзіяду, жонку брата ягонага Піліпа, і за ўсё, што Гірад зрабіў благога,

 

А Ірад, чацвёртаўладнік, выкрываны ім за Ірадыяду, жонку свайго брата, і за усё, што ён зрабіў ліхога,

дадаў да ўсяго і тое, што пасадзіў Яана ў вязьніцу.

 

дадаў да ўсяго і тое, што замкнуў Іаана ў цямніцу.

І сталася, як хрысьціўся ўвесь народ, і Ісус ахрысьціўшыся маліўся, адчынілася неба,

 

І было: калі хрысціўся ўвесь народ і Ісус, ахрысціўшыся, маліўся, расчынілася неба,

і зыйшоў на Яго Дух Сьвяты ў цялесным выглядзе, як галуб, і быў голас зь неба, ка́жучы: Ты Сын Мой улюблены, Цябе (Я) упадабаў!

 

і зышоў Святы Дух у цялесным выглядзе, як галубка, на яго і голас з неба пачуўся: «Ты Мой Сын улюбёны, у Табе знайшоў Я задавальненне».

І Сам Ісус быў гадоў каля трыццаці, пачынаючы (Сваё служэньне), і быў, як думалі, Сын Язэпаў, Íліяў,

 

А Сам Ісус, распачынаючы, меў гадоў з трыццаць, быў, як думал, сын Іосіфаў, Іліеў,

Маттатаў, Ле́віяў, Ме́льхіяў, Яанаў, Язэпаў,

 

Матфатаў, Левіеў Мелхіеў, Іанаеў, Іосіфаў,

Маттаціяў, Амо́саў, Навумаў, Ясьлімаў, Нагеяў,

 

Маттафіеў, Амосаў, Навумаў, Есліеў, Наггееў,

Маатаў, Маттаціяў, Самеяў, Язэпаў, Юдаў,

 

Маафаў, Маттафіеў, Семеіеў, Іосіхаў, Іадаеў,

Яананаў, Рысаяў, Зараба́бэляў, Салятыілаў, Нірыяў,

 

Іаананаў, Рысаеў, Дзарававелеў, Салафіілаў, Нірыеў,

Мэльхіяў, Адзіяў, Касамаў, Ялмадамаў, Іраў,

 

Мелхіеў, Аддыеў, Касамаў, Елмаданаў, Іраў,

Ясіяў, Яліязэраў, Іярымаў, Маттатаў, Ле́віяў,

 

Ісусаў, Еліезераў, Іарымаў, Матфатаў, Левіеў,

Сымонаў, Юдаў, Язэпаў, Яананаў, Яліякімаў,

 

Сімяонаў, Юдаў, Іосіфаў, Іанамаў, Еліакімаў,

Мэлеаяў, Маінанаў, Маттатаяў, Натанаў, Давідаў,

 

Мелеаеў, Меннаеў, Маттафаеў, Нафанаў, Давідаў,

Ясеяў, Абідаў, Баозаў, Салмонаў, Наасонаў,

 

Іессееў, Авідаў, Воасаў, Салаў, Наассонаў

Амінадабаў, Арамаў, Ясромаў, Хварэсаў, Юдаў,

 

Амінадаваў, Адмінаў, Арніеў, Эсромаў, Фарэсаў, Юдаў,

Якубаў, Ісагакаў, Абрагамаў, Тараў, Нахораў,

 

Якаулеў, Ісаакаў, Аўраамаў, Фарыеў, Нахораў,

Сэрухаў, Рагабаў, Хвалекаў, Ябераў, Салаў,

 

Серухаў, Рагаваў, Фалекаў, Эвераў, Салаў,

Каінанаў, Архваксадаў, Сэмаў, Нояў, Ламехаў,

 

Каінанаў, Арфаксадаў, Сімаў, Ноеў, Ламехаў,

Матусалаў, Янохаў, Ярэдаў, Малеляіляў, Каінанаў,

 

Мафусалаў, Енохаў, Іарэтаў, Малелеілаў, Каінанаў,

Яносаў, Сэтаў, Адамаў, Божы.

 

Еносаў, Сіфаў, Адамаў, Божы.