Людие Ізраилевы приняша землю Ханаоню и розделиша ю, племени же Леввиеву не дали межи собою доли. Калефъ, сынъ Ефониинъ от племеня Іюдина, просилъ во Исуса Навина, абы далъ ему градъ Хевронъ, понеже обещалъ былъ ему Моисей.
1 Тым суть владели сынове Ізраилевы в земли Ханаанъ,a юже далъ былъ имъ Елиазар-жрець и Исусъ, сын Навин, и князи племенъ по поколениех Ізраилевых,
2 жребием вся деляще, якоже повелел был Господь Моисею, девятеру поколению и полуплемени Манасиину,
3 понеже двема поколениема и половици далъ былъ Моисей за Иорданомъ достоание, кроме сыновъ Леввиевыхъ,
4 ониже части земли не приняли суть межи братиею своею, но на ихъ место въступили сынове Иосифовы, во два поколения суще розделены — Манасей и Ефраимъ. А нижъ суть взяли сынове Левиевы иное доли на земли, толико грады къ пребыванию и посады градовъ къ корменію скоту и говядъ своихъ.
5 Яко бо приказалъ былъ Господь Богъ Моисеови, тако учинили суть сынове Ізраилевы и розделили суть землю.
6 И приступили суть сынове Іюдины в Галгалех ко Исусу, и глагола к нему Калефъ, сынъ Ефониинъ, Ценизеанинъ: «Веси, еже молъвил ест Господь Богъ к Моисею, рабу своему, о мне и о тобе в Кадес-Варни.
7 Во четырдесяти и в пяти летехъ был есмъ, егда по. сылалъ мя Моисей, мужъ Божий, с Кадес-Варни, абыхъ огледелъ землю, и возвестихъ ему, елико же видехъ по правде.
8 Братия пакъ моя, еже ходиша со мною, застрашиша серца людей. Азъ же последовахъ Господа, Бога моего.b
9 Протожъ клялся ми ест Моисей в той день, глаголя: “Земля, по нейже ходили суть нозе твое, будеть достояние твое и сыновъ твоихъ во веки, понеже последовал еси Господа, Бога твоего”.
10 И се продолъжилъ ест Господь Богъ животъ мой даже до днешнего дня, яко и обещалъ мне. Вже тому четырдесятъ и пять летъ естъ, яко глаголал Господь Богъ к Моисею, егда ходиша сынове Ізраилевы по пустыни.c Днесь у восмидесяти и в пяти летехъ есми
11 и так еще есмъ дужъ, яко и на тотъ часъ, егда посылал мя Моисей выгледати земли. Тыхъ часовъ сила и по днесь еще пребываеть со мною тако к воеванию, яко и к хожению.
12 Сего ради дай ми гору тую, юже ми обещалъ Господь, а ты самъ то слышалъ, на нейже Енахимъ пребываеть и грады великие ограженые, и будеть Господь Богъ со мною, и выкореню их, якоже ми приреклъ».
13 И благославил ест Исусъ Калефа, и далъ ему Хевронъ в достоание.d
14 От того ж пакъ часу былъ ест Хевронъ Калефовъ, сына Ефониина, Цен[из]еанина, даже до днешнего дня, понеже последовалъ естъ Господа, Бога Ізраилева.
15 Имя же Хеврону первей слыло ест Кариаф-Арбе; Адамe найболший посреди Енахимъ ту положенъ естъ, и земля престала ест от битовъ.
a Лічбы, 34.
b Лічбы, 33[:2].
c Лічбы, 14[:33].
d Ісуса, сына Сіраха, 46[:11].
e Адам (Вульгата: Adam; ЦСБ: Митрополь).
Знайшлі памылку ў тэксце? Вылучыце яе і націсніце:
Ctrl + Enter
Книги Исуса Навина, 14 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.