Навина 3 Навина 3 разьдзел

¹ Тогда Исусъ, въставъ вночи, повелелъ рушитися войску. И воздвигшеся от Сехима, приидоша до Іордана той и вси сыны Ізраилевы, и пребыша ту за три дни.

² И егда было по трехъ днехъ, ходили суть кликунове посреди становъ

³ и вопиали къ людем, глаголюще: «Егда узрите Кивотъ Господа, Бога вашего, и жерцевъ левгитскаго роду, несущихъ Кивотъ, вы теже въстаньте и пойдите воследъ Кивота.

⁴ И да будеть розделение межи вами и Кивотомъ Господьнимъ вдолжъ якобы два тысеща ступневъ, абы есте толико могли здалека видети Кивотъ Господень и знати путь, имже имаете ити за Кивотомъ Господьнимъ, понеже тымъ путемъ есте первей не ходили. И гледите, да не приближитеся къ Кивоту».

⁵ И рече Исусъ к людемъ: «Посвятите себе,a за утра бо учинить Господь Богъ дивные речи посреде васъ».

⁶ И рече паки к жерцемъ: «Возмите Кивотъ Заветаb Господьня и идите пред людми». Они же наполнили суть приказание его, и взявши кивот Господень, идоша пред людьми.c

⁷ И рече Господь ко Исусу Навину: «Днесь почну тя возвышати пред всеми людми Ізраилевыми, абы познали, иже яко былъ есми с Моисеомъ, тако буду и с тобою.d

⁸ Ты пакъ заповежъ жерцемъ, несущимъ Кивотъ Завета, и ирци к нимъ: Егда вниидете въ часть воды реки Іордана, стойте ж в ней».

⁹ И рече потомъ Исусъ ко всем сыномъ Ізраилевым, глаголя: «Приступите семо и слыште словы Господа, Бога вашего». И паки рече имъ:

¹⁰ «По сем познаете, яко Господь Бог живый посреди васъ естъ, и Той погубить предъ лицемъ нашим Хананея и Еувея, и Ферезея, и Ергисея, и Евусея, и Аморея.

¹¹ И се Кивот Завета Господа, Бога всея земли, грядеть пред вами чересъ Іорданъ.

¹² Сего для выберите з себе дванадесеть мужевъ, по единому от каждого поколения Ізраилева,

¹³ и будеть, егда жерци, иже несуть Кивотъ Завета Господа, Бога Ізраилева и всея земли, стануть у воде Іорданской, вода, иже нанизу естъ, сплынеть доловъ и не будеть, вода пакъ, иже зверху течеть, у водномъe собрании станеть».

¹⁴ Тогда изыдоша людие из становъ своих, абы шли черезъ Іорданъ, жерци же, несущии Кивотъ Завета Господьня, идяху пред ними.

¹⁵ И егда вошли суть жерци во Иорданъ и ногы свое омочили во краю воды іорданское, — Іорданъ пакъ в ты часы был ся розводнилъ, яко бе время жатвы,f

¹⁶ и даже до верху горъ стали суть воды, иже зверху плынули на едино место и яко муры высокии воздвигошеся, тако, иже видены могли быти з места поодаль, иже словеть Едомъ, даже до места Сартанъ, — тая пак вода, иже была нанизу, стекла и плынула до моря въ пустыню, иже словеть море Мертвое, аже ее ничего не остало.

¹⁷ Людие же идоша чересъ Іорданъ, и жерци, иже несяху Кивот Завета Господьня, стояли суть на сухой земле посреди Іордана, подкасавшися, а люди вси идяху посуху черес Іордан.g