Навина 20 Навина 20 разьдзел

¹ Глаголал же естъ Господь ко Исусу, и рече:

² «Молви сыномъ Ізраилевымъ и ирци к ним: Отделите места утекающих, о нихже глаголах вамъ Моисеомъ, рабом своимъ,

³ абы утеклъ до них всякъ, убивый человека нехотяйa, да бы моглъ увойти от гневу ближнихъ его, онже бы ся мстилъ крови его.

⁴ И егда бы ко единому от градов сихъ прибежалъ, то станеть предъ враты градовыми и молвити будеть со старейшинами града того тыи речи, еже бы его невинна быти указывали, и тако приимуть и и дадуть ему место ко пребыванию.

⁵ И егда бы мститель крови убитого гонилъ и, да не выдають в руце его, понеже нехотя убилъ ближнего своего, а ниже можеть довести на него, яко предъ двема или пред трема днема не прияаше ему.

⁶ И тако пребывати будеть убийца во граде томъ, поколе не станеть на суде, выводячи ся с вины тое, и поки бы не умерлъ жрець великий, онже бы былъ того часу: тогда да навратится убийца и вниидеть во градъ до дому своего, с негоже былъ утеклъ».

⁷ И уставили суть грады — Цедесъ в Галилеи, на горе Нефталимле, и Сихемъ, на горе Ефраимле, и Кариат-Арбе, то естъ Хеврон, на горе Іюдине,

⁸ и за Иорданомъ, противъ усходу солнц,а по стране Ерихона; и уставили суть Гозор, еже лежить в поляхъ пустыхъ, во племени Рувинове, и Рамотъ в Галааде — от племеня Гадова, и Гавълонъ во Васане — от племеня Манасиина.

⁹ Сии грады уставлены беша всемъ сыномъ Ізраилевымъ и приходомъ, иже пребываху посреде ихъ, абы утекали до нихъ всякъ, иже бы человека з нехотения забилъ, и абы не умерлъ от того, онже бы хотелъ приателя своего мстити, доколе бы не сталъ предъ судьми,b выводячися с того.