Навина 9 Навина 9 разьдзел

¹ Внегда же услышали суть словеса сия вси цари, иже беша за Иорданом на горах и на ровнинахъ, и в затоках морских, и еже по брегу моря Великого, и тии теже, иже жили подле горы Ливанское, — Ефейстии, Хананейстии, Аморейстии, Ферезейстии, Еввейстии, Еввузейстииa —

² съехалися вкупу, абы билися со Исусомъ и с людми Ізраилевыми единомыслено и единодушно.

³ Живущие пакъ во граде Гаваоне, слышавши сее, еже учинилъ Исусъ граду Ерихону и граду Гай,

⁴ хитре помыслили о собе, набрали с собою стравы и сумы старыи возложиша на ослы, и мехи винныи кожаныи, содраныи и залапленыи;

⁵ чеботы теже велми старыи, еже на знамя старости заплатами были сшиваны, и облеклися в ризы ветхи содраны. Хлебовъ теже набрали с собою твердыхъ и на кусы здробленых,

⁶ и шли суть ко Исусу, онже тогда пребываше с людми Ізраилевыми у станехъ на месте Галгала. И пришедши, рекоша к нему и ко всемъ людемъ Ізраилевымъ: «З далекое земли пришли есмо, хотячи с вами покой имети».

⁷ Тогда отвещаша мужи Ізраилевы: «Не можем с вами смолвы учинити, естъли же живете на земли той, которая намъ имат дана быти розделена по жребиехъ».

⁸ Они же рекоша ко Исусу: «Раби твои есмо». И рече к нимъ Исусъ: «Кто есте вы и откуду приидосте?»

⁹ Реша к нему: «От земли велми далекое пришли есмо, раби твои, во имя Господа, Бога твоего, слышахомъ убо славу силы Его,

¹⁰ вся, яже учинилъ ест во Египте і двема царема Аморейским, еже беша предъ Іоръданомъ, — Сеону, царю Езвонеску, і Огу, царю Васанску, еже живяше во Астарофе.

¹¹ Сего для рекоша нам старейшины наши і вси живущие в земли нашей: “Наберите собе стравы на путь далекий, ізыйдите на стретение имъ і ирците: раби ваши есмо, уделайте с нами миръ”.

¹² Сие хлебы, еже узяхом с собою, егда хотехомъ ити к вамъ, были теплы, и се вже ствердеша велми и здробишеся.

¹³ До меховъ теже кожаных новыхъ налили есмо вина, и се вже розпукалися и розодралися. Ризы теже, еже имамы на собе, и обув всем подралася путя для далекого и в ничтоже пременишес[я]».

¹⁴ И приняша от брашна их, устен же Господьних не воспросиша.

¹⁵ И учинил естъ Исусъ с ними миръ, и завеща завет, абы побиты не были.b Князи теже людстии присегаше имъ.

¹⁶ Потомъ пакъ на третий день по смолве той услышали суть, иже живуть близко их, а иже въ их землю скоро войти имають.

¹⁷ И егда гнулися сут з войском сынове Ізраилевы, вниидоша на третий день во грады их, иже сими имены называхуся: Гаваонъ и Кафира, и Верофъ, и Кариаф-Аримъ.

¹⁸ И не погубиша ихъ, понеже присягли были имъ князи людстии во имя Господа, Бога Ізраилева. Сего ради ропташа вси людие на князей.

¹⁹ Они же отвещали суть: «Присягли есмо имъ во имя Господа, Бога Ізраилева, а протожъ не можемъ доткнутися ихъ.

²⁰ Но сие да учиним имъ, да имають животъ, абы гневъ Божий не возъбудился на насъ, естъли же имъ не здержимо присяги, еже присягахомъ во имя Господа, Бога Ізраилева.

²¹ Но да будуть тымъ обычаемъ жыви: да служат всему войску Ізраилеву, дрова на нихъ да рубают и воду да носять». И егда сее они вкупе глаголаша,

²² позвалъ естъ Исусъ, сынъ Навин, Гаваонитянъ, и рече имъ: «Почто прельстисте насъ, глаголюще, иже “велми далеко живемы от васъ”? А се живете посреди нас?

²³ Сего ради злоречени будете и не загинеть з роду вашего, онже бы дровъ не рубалъ и воды не носилъ до дому Господа, Бога моего».

²⁴ Отвещаша же мужи Гаваонитяне ко Исусу, глаголюще: «Поведано естъ нам, рабомъ твоимъ, яко обещалъ былъ Господь, Богъ твой, Моисею, рабу своему, дати вамъ всю землю сию и погубити пред лицемъ вашимъ всехъ живущихъ на ней. Того для бояхомся вельми и мыслихомъ о собе, якобы есмо соблюли животъ свой. Вашею боязнию суще к тому приправлены, сию раду собе измыслихомъ.

²⁵ Ныне же в рукахъ твоихъ есмо: все, еже тобе добро и справедливо ся видить, учини с нами».

²⁶ И учинилъ естъ тако Исусъ, якоже рече, и избавилъ ихъ з руку сыновъ Ізраилевыхъ, абы не побили ихъ.

²⁷ И возложилъ естъ и установилъ имъ Исусъ в той день, абы служили всему войску Ізраилеву и олтарю Божию, рубати дрова и воду носити, даже до днешнего дня, на месте томъ, еже бы избралъ собе Господь Богъ.