Судьи 6 Судьи 6 разьдзел

¹ Учинили же суть опять сынове Ізраилевы злая предъ лицемъ Божиимъ,a и предалъ естъ ихъ в руце Мадиамляномъ за седмъ лет.

² И обижены суть велми от них тако, иже зделали были собе сынове Ізраилевы пещеры, и перекопы, и грады твердыи, абы ся могли боронити имъ.

³ И бысть пакъ, егда насеяша житъ на полех людие Ізраилевы, приехаша Мадиамляне и Амалехитяне и инии мнозии народове от востоку солнца и положишеся полки своими,

⁴ и все жито, еже бе еще зелено в земли Ізраилеве, попалили и сказили даже до града Газы, ничего к поживению не оставили — ани воловъ, ани овець, ани ослов,

⁵ понеже были сами ис стады и с станы своими пришли, якобы множество усеници, и положилися, и все зказили до конца, было бо вельми великое множество людей и велблюдов. И куды шли или постановилися, все сказили.

⁶ И тако понижены были и стиснены вельми вси людие Ізраилевы от Мадиамлянъ,

⁷ и возпиша к Господу, жадающе помочи.

⁸ Онъ же послал к нимъ мужа пророка, и рече имъ: «Сие глаголеть Господь, Бог Ізраилев: Азъ изведохъ васъ ізъ Египта, из дому работы,

⁹ и от всехъ враговъ ваших избавих васъ и погубих е предъ лицем вашим, и дахъ вамъ землю их

¹⁰ и рекохъ: Азъ есмъ Господь, Богъ вашъ, не бойтеся боговъ их, в нихже земли пребываете. И не хотели есте послушати гласа Моего».

¹¹ В то жъ время прииде ангел Господень и сяде под дубомъ, иже былъ въ Ефре; местом же тымъ владяше Іоасъ, отець челяди Езрины. И егда сынъ его Гедеонъ веялъ жито на гумне, поспешая, абы утеклъ предъ Мадиамляны,

¹² явися ему ангелъ Божий и рече: «Господь с тобою, мужу пресилный!»

¹³ Отвеща Гедеонъ: «Молю ти ся, господине мой, егда бы былъ Господь с нами, не пришли бы на нас вси речи сие злые. Игде суть ныне чудеса Его, якоже отцеве наши поведаша намъ, глаголюще: Изъ Египта вывелъ естъ нас Господь, Богъ нашъ? Се, вже ныне опустилъ насъ и предалъ в руце Мадиамляномъ».

¹⁴ И возрелъ естъ на Гедеона ангелъ Господень, и рече: «Иди в сей силе твоей и збавиши людей Ізраилевыхъ от руку Мадиамскихъb. А ведай тое, яко послах тя».

¹⁵ Отвеща же Гедеонъ и рече: «Молю ти ся, господине мой, чимъ я могу избавити людей Ізраилевыхъ? Се, племя мое найпоследнейшее естъ въ поколении Манасиине, и азъ найменший есмъ в доме отца моего».

¹⁶ Тогда рече к нему Господь: «Азъ буду с тобою, и поразиши Мадиамлян, яко единаго мужа».

¹⁷ И отвеща Гедеонъ: «Естъли же знайдохъ ласку предъ очима Твоима, дай ми знамя, да познаю, яко Ты еси, иже глаголеши со мною.

¹⁸ И не отходи отселе, дондеже ся навращу к Тобе и принесу жертву и положу пред Тобою». Той же рече: «Иди, се, Азъ пожду тебе».

¹⁹ Тогда иде Гедеон и увари козля, и напече хлебов пресныхъ с муки, и вложи мясо в кошъ, и юху влил в горнець, и принесе все то под дубъ, и пода Ему.

²⁰ И рече к нему ангелъ Божий: «Возми мясо и хлебы и наклади на оную скалу, и юху на верхъ вылий». И егда учинил ест тако,

²¹ простре ангелъ Господень жезлъ, иже имеаше в руце своей, и доткнулся концем мяса и хлебов — изыйде огнь ис скалы и спалил мясо и хлебы пресные. Потомъ и ангел Божий змизалъ от очию его.

²² Видя же сие Гедеонъ, яко ангелъ Божий былъ, рече: «Увы мне, Господи, Боже мой, понеже видехъ ангела Твоего лицемъ в лице!»

²³ И рече к нему Господь: «Миръ тобе! Не бойся, не умреши».

²⁴ И вделалъ естъ ту Гедеонъ олтарь Господу Богу, и прозвалъ и Миръ Господень — даже и до днешнего дня.

²⁵ Егда былъ Гедеонъ въ Ефре, еже прилежить к дому Ездрину, в ту нощь рече Господь к нему: «Возми тельца едина отца твоего и иного телца седми летъ, и сказиши требникъ кумира Вааля, иже естъ отца твоего, и гай, еже ест около требника того, посечеши,

²⁶ и учиниши олтарь Господу, Богу твоему, на верху скалы сее, на нейже первее жертву положилъ еси; и возмеши втораго телца, и принесеши всесозжение на дровахъ тыхъ, еже в гаи посекалъ еси».

²⁷ Тогда понялъ с собою Гедеонъ десеть мужей от отрокъ своихъ и учинилъ естъ, якоже былъ ему росказал Господь. Але, боячися челяди отца своего и людей места того, не учинилъ сего въдень, но вночи все наполнилъ.

²⁸ И егда рано въсташа людие места того, узреша требникъ скаженый кумира Вааля и гай, еже былъ около требника, посеканый, и телца едина, положена на олтари, иже бе новоучиненъ.

²⁹ И рекоша единъ ко другому: «И кто естъ, учинивый сее?»c И егда пытахуся на уделавшего дело тое, поведено естъ имъ, яко Гедеонъ, сынъ Іоасовъ, сее все учинилъ.

³⁰ И рекоша ко Іоасу: «Выдай намъ сына своего, да умреть, понеже сказилъ естъ требникъ Ваалевъ и гай посекалъ».

³¹ Им же отвеща Іоасъ: «Еда ли есте вы мстители Ваалевы, яко о него претеся? Кто естъ врагъ его, да умреть прежде дня заутрейшего: понеже богъ естъ, да помстится самъ над тымъ, онже требникъ его сказилъ и раскопалъ».

³² И от того дня прозваша Гедеона Еровааль прото, иже реклъ естъ Іоасъ, отець его: «Нехай ся самъ помстить Вааль над тымъ, онже требникъ его раскопал».

³³ Того часу людие Мадиамстии, и Амалехитяне, и вси, живущие на выходъ солнца, собралися суть вкупу и, прешедши Іордан, положишеся з войскомъ своимъ в долине Езраилеве.

³⁴ Духъ пак Господень укрепи Гедеона, и затрубил у трубу, и созвалъ домъ Авиезеровъ, абы шли с нимъ.

³⁵ И розослал послы по всему поколению Манасиину, тии же идоша воследъ его; и иные теже послы послал ест к поколению Асерову, и Зевулоню, и Нефталимлю, ониже вси пришли ему на помощь.

³⁶ Тогда рече Гедеон к Господу Богу: «Понеже избавити хощеши людей Ізраилевыхъ рукою моею, якоже реклъ еси,

³⁷ се полагаю руно сее волняное на тоце: будеть ли роса толико на самом руне, а по всей земли около сухо, по томъ познаю, иже рукою моею избавиши людей Ізраилевых, якоже реклъ еси».

³⁸ И бысть тако, иже вночи въставъ Гедеонъ и руно выжалъ, и сосудъ росы наполнилъ.

³⁹ И рече паки к Господу: «Да не гневается ярость Твоя на мя, естли же еще испытаю единого знамения на руне: молю Ти ся, да будеть руно сухо и земля вся росою скроплена».

⁴⁰ И сотвори Господь тако в ту нощъ, яко жадал Гедеонъ, и было ест руно сухо, а роса по всей земли.