Выслоўяў Саламонавых 2 разьдзел

Кніга выслоўяў Саламонавых
Пераклад Чарняўскага 2017 → Пераклад Леаніда Галяка

 
 

Сыне мой, калі прымеш размовы мае і схаваеш у сябе запаветы мае,
 
Сын мой, калі прыймаеш словы мае і захаваеш у сабе мае запаветы,

накіроўваючы вуха сваё да мудрасці, схіляючы сэрца сваё да пазнання разважлівасці,
 
так што вуха тваё зробіцца ўважным да мудрасьці і схіліш сэрца сваё да раздумываньня;

бо калі прызавеш мудрасць і ўручыш голас свой разважлівасці,
 
калі будзеш клікаць веду і паклічаш розум;

калі шукаць яе будзеш, як грошы, ды адшукваць яе будзеш, як скарб, —
 
калі будзеш шукаць яго, як серабра, і рабіць пошукі, як за скарбам, —

тады зразумееш страх Госпадаў і знойдзеш пазнанне Бога,
 
дык тады зразумееш страх Госпада і знойдзеш веду аб Бозе.

бо Госпад дае мудрасць, і з вуснаў Яго — веды і разважлівасць.
 
Бо Бог дае мудрасьць; з Ягоных вуснаў веда і розум.

Ён запасе мудрасць для справядлівых і будзе шчытом для тых, хто ходзіць простым шляхам,
 
Ён заховывае для справядлівых праўдзівую мудрасьць; Ён зьяўляецца шчытом для тых, што ходзяць бяззаганна;

захоўваючы сцежкі справядлівасці і пільнуючы дарогі святых.
 
Ён аховывае шляхі праўды і сьцеражэ сьцежкі Сваіх сьвятых.

Тады зразумееш справядлівасць, прыказанне і закон і ўсякую добрую сцежку,
 
Тады ты зразумееш справядлівасьць, і суд, і праўду, і кожную добрую сьцежку.

бо ўвойдзе мудрасць у сэрца тваё, і веды спадабаюцца душы тваёй.
 
Калі ўвойдзе мудрасьць у сэрца тваё і веда будзе прыемнай тваёй душы,

Сумленне будзе пільнаваць цябе, а растаропнасць уратуе цябе,
 
тады цябе будзе сьцерагчы асьцярожнасьць, а розум будзе аховываць цябе,

каб усцярогся ты ад дарогі ліхой і ад чалавека, які хлусіць,
 
каб уратаваць цябе ад благога шляху і ад чалавека, што маніць;

[пазбавіць ад тых,] хто пакідае дарогу простую, каб хадзіць па цёмных дарогах,
 
ад тых, што пакідаюць простыя сьцежкі, каб хадзіць шляхом цемры;

[ад тых,] хто весяліцца, калі робіць злачынства, і радуецца з найгоршых рэчаў:
 
ад тых, што радуюцца, робячы благое, што цешацца злой хітрасьцяй;

дарогі іх нясталыя, а крокі іх блудныя;
 
сьцежкі чыі крывыя і якія блукаюцца па сьцежках сваіх,

каб усцярогся ты ад чужой жонкі і ад чужой, якая змякчае свае размовы
 
каб уратаваць цябе ад жонкі іншага, ад чужой, што ласіцца лагоднымі словамі,

і якая пакінула правадыра маладосці сваёй і забылася на запавет Бога свайго.
 
якая пакінула правадыра свайго юнацтва і забыла запавет свайго Бога.

Бо дом яе нахіліўся да смерці, а шляхі яе — да пекла;
 
Дом яе вядзе да сьмерці і сьцежкі яе да памершых.

усе, што ідуць да яе, не вяртаюцца і не знаходзяць сцежак жыцця.
 
Ніхто з пасярод увайшоўшых да яе не вяртаецца і не трапляе на сьцежку жыцьця.

Такім чынам, хадзі шляхам добрых людзей і трымайся сцежак справядлівых людзей:
 
Дзеля гэтага хадзі шляхом добрых і трымайся сьцежак справядлівых,

бо той, хто справядлівы, будзе жыць на зямлі і сумленныя назаўсёды застануцца на ёй;
 
бо справядлівыя будуць жыць на зямлі і беззаганныя будуць трываць на ёй,

а бязбожнікі будуць сцёрты з зямлі і тыя, што дзейнічаюць несправядліва, будуць выкаранены з яе.
 
а бязбожныя будуць зьнішчаныя з зямлі, а вераломныя выкараненыя з яе.