Выслоўяў Саламонавых 11 разьдзел
Кніга выслоўяў Саламонавых
Пераклад Чарняўскага 2017 → Пераклад Леаніда Галяка
Агіднасць для Госпада — вага падманная, а дакладная вага — воля Яго.
Фалшывая вага агідная Госпаду, а правільныя адважнікі падабаюцца Яму.
Прыходзіць пыхлівасць — прыйдзе і ганьба; а ў пакорлівых — мудрасць.
За гордасьцяй прыходзіць ганьба, а з пакорнымі ёсьць мудрасьць.
Чыстасардэчнасць справядлівых будзе накіроўваць іх, а падкопы крывадушных загубяць іх.
Шчырасьць бяззаганных вядзе іх, а хітрасьць злачынцаў згубіць іх.
У дзень гневу не дапаможа багацце, а справядлівасць выратуе ад смерці.
Не паможа ў дзень гневу багацьце, але справядлівасьць збаўляе ад сьмерці.
Справядлівасць чыстасардэчнага будзе кіраваць яго дарогай, а бязбожнік загіне ў сваёй бязбожнасці.
Справядлівасьць бяззаганнага раўнуе яму дарогу, а бязбожны згіне ад сваёй бязбожнасьці.
Справядлівасць справядлівых вызваліць іх, а несправядлівыя будуць захоплены ўласнымі падкопамі.
Справядлівасьць шчырых збавіць іх, а хітрых ловіць іх злосьць.
Калі памрэ бязбожнік, ніякай надзеі ў яго больш не будзе; а чаканне багацця загіне.
Калі памірае бязбожны чалавек, гіне ягоная надзея, а чаканьне бяззаконных гіне.
Справядлівы будзе вызвалены ад беднасці, а на месца яго трапіць бязбожнік.
Справядлівы выбаўляецца з бяды, а замест яго трапляе бязбожны.
Крывадушнік вуснамі падманвае сябра свайго, а справядлівыя будуць вызвалены ведамі.
Аблуднік вуснамі губіць свайго бліжняга, а справядлівы збаўляецца прадбачлівасьцяй.
У час росквіту справядлівых радуецца горад, а ў час пагібелі бязбожнікаў будзе пахвала.
Са шчасьця справядлівых цешыцца места, а калі гінуць бязбожныя, бывае радасьць.
Дабраславеннем справядлівых узвысіцца горад, а вусны бязбожнікаў разбураць яго.
Багаслаўленьнем справядлівым уздымаецца места, а разбураецца вуснамі бязбожных.
Хто пагарджае сябрам сваім, той бедны на разважлівасць, а разважлівы чалавек будзе маўчаць.
Дурны пагарджае бліжнім сваім, а разумны чалавек маўчыць.
Хто ходзіць перашэптваючыся, выяўляе таемнае, а верны душою ўтоіць справу.
Хто абыходзячы абмаўляе, той адкрывае тайніцу, але чалавек вернага сэрца трымае ў тайніцы давераную справу.
Дзе няма парадку — народ загіне, а збаўленне там, дзе шматлікія парады.
Калі не стае дастатковае рады, народ занепадае, а дзе шмат райцаў, там дабрабыт.
Той будзе вынішчаны ліхам, хто за другога ручаецца; хто ненавідзіць паручыцеляў, той будзе агароджаны ад небяспекі.
Сам сабе шкодзіць той, хто паручаецца за чужога, а хто высьцерагаецца парукаў, той бязпечны.
Паслужлівая жанчына знойдзе славу, а дужыя набудуць багацце.
Чэсная жанчына набывае славу, а хто любіць працу набывае багацьце.
Міласэрны чыніць дабро душы сваёй, а бязлітасны мучыць самога сябе.
Міласэрны чалавек добра робіць сваёй душы, а жорсткі нішчыць сваё цела.
Бязбожнік робіць ілжывую справу, а для таго, хто сее справядлівасць, — пэўная ўзнагарода.
Бязбожны робіць памылковую справу, а хто сее праўду, мае пэўную ўзнагароду.
Надзейны чалавек рыхтуецца да справядлівасці, а прыхільнік ліха — да смерці.
Як справядлівасьць ёсьць да жыцьця, так той, хто імкнецца да благога, ёсьць да сьмерці.
Агіда для Госпада — сэрца крывадушнае, а ласка Яго — да тых, хто ходзіць прама.
Агідныя Госпаду хітрыя сэрцам, а падабаюцца яму беззаганныя.
Вядома, ліхі чалавек не будзе беспакараны, а нашчадкі справядлівых збавяцца.
Злосьнік, хаця возьме на дапамогу іншых, не застанецца бяз кары, а насеньне справядлівых захаваецца.
Залатое кольца ў лычы свінні — гэта прыгожая, але неразумная жанчына.
Жанчына прыгожая і дурная ёсьць як сьвіньня з пярсьцёнкам у носе.
Пажаданне справядлівых — толькі дабро, чаканне бязбожнікаў — абурэнне.
Пажаданьне справядлівых заўсёды да добрага, але чаканьне бязбожных — гнеў.
Адны дзеляцца ўласным і становяцца багацейшымі, а другія, што занадта беражлівыя, заўсёды ў беднасці.
Не адзін шчодры дае і яму яшчэ прыбывае, а іншы скупы больш чым трэба і аднак бяднее.
Будзе насычана душа, якая дабраслаўляе; і хто напоіць другіх, той сам таксама будзе напоены.
Шчодры чалавек бывае багацейшы і хто насычывае, будзе і сам насычаны.
Хто хавае сваё збожжа, той праклінаецца ў народзе, а на галаву тых, якія прадаюць збожжа, — дабраславенне.
Хто затрымлівае ў сябе збожжа, таго кляне народ, але багаславенства на галаве прадаючага.
Хто настойліва шукае дабра — шукае ласкі [Божай], а хто шукальнік ліха — да таго яно і прыйдзе.
Хто імкнецца да дабра, набывае ласку, а хто імкнецца да благога, да таго яно прыходзіць.
Хто спадзяецца на багацці свае, загіне, і, як зялёны ліст, будуць расці справядлівыя.
Хто палягае на сваім багацьці, той упадзе, а справядлівыя будуць зелянець, як парасткі.
Хто турбуе дом свой — атрымае вятры, а хто бязглузды — будзе слугою мудрага.
Хто робіць непарадак у сваім доме, атрымлівае ў спадчыне вецер, а дурны мусіць служыць мудраму.
Плод справядлівага — дрэва жыцця; і хто мудры — прыцягвае душы.
Плод справядлівых — дрэва жыцьця і мудры прыцягівае душы.
Калі справядліваму адплачваецца на зямлі, тым больш бязбожніку і грэшніку.
Калі справядліваму прыходзіць узнагарода на зямлі, дык пагатове бязбожнаму і грэшніку.
