Псалтыр 131 псалом
Псалтыр
Пераклад Васіля Сёмухі → Пераклад Чарняўскага 2012
Песьня ўзыходжаньня. Спамяні, Госпадзе, Давіда, і ўсе ягоныя пакуты:
Песня ўзыходжання. Госпадзе, памятай пра Давіда і пра ўсю пакорлівасць яго:
як ён прысягаў Госпаду, даваў зарок Моцнаму Якава;
бо прысягнуў ён Госпаду, даў абяцанне Магутнаму Якубаву:
«не ўвайду ў палатку дома майго, ня ўзыду на ложак мой;
«Не ўвайду ў шаты дому свайго, не ўздымуся на ложа пасцелі маёй,
ня дам сну вачам маім і павекам маім дрымоты,
не дам сну вачам маім і павекам маім,
пакуль не знайду месца Госпаду, жытлішча Моцнаму Якава».
пакуль не знайду месца для Госпада, палаткі для Магутнага Якубава».
Вось, мы чулі пра яго ў Эфраце, знайшлі яго на палях Ярыма.
Вось, пачулі мы пра той самы [каўчэг], вось, у Эфраце, знайшлі мы яго на палях Яар.
Пойдзем да жытлішча Ягонага, паклонімся падножжу ног Ягоных.
Увойдзем у палатку Яго, аддадзім паклон ля падножжа ног Яго.
Стань, Госпадзе, на месца пакою Твайго, Ты і каўчэг магутнасьці Тваёй.
Уздыміся, Госпадзе, да месца супачынку Твайго, Ты і каўчэг Тваёй моцы.
Сьвятары Твае апранаюцца ў праўду, і сьвятыя Твае ўзрадуюцца.
Хай святары Твае адзенуцца ў справядлівасць, а святыя Твае радуюцца.
Дзеля Давіда, раба Твайго, не адвярні аблічча памазанца Твайго.
Дзеля Давіда, паслугача Твайго, не адварочвай аблічча ад намашчэнца Твайго.
Прысягаў Гасподзь Давіду ў ісьціне, і не зрачэцца яе; «ад плоду ўлоньня твайго пасаджу на троне тваім.
Прысягнуў Госпад Давіду праўду, і не адступіць ад яе: «Ад плода сцёгнаў Тваіх пасаджу на пасад Твой.
Калі сыны твае будуць шанаваць запавет Мой і Мае сьведчаньні, якім Я іх навучу: дык і іхнія сыны вечна сядзецьмуць на троне тваім».
Калі сыны твае захаваюць запавет Мой і сведчанні Мае, якім навучу Я цябе, то і сыны іх вечна будуць сядзець на пасадзе тваім».
Бо выбраў Гасподзь Сіён; пажадаў яго жытлом Сабе.
Бо Госпад выбраў Сіён і пажадаў яго Сабе на паселішча:
«Гэта — спакой Мой навечна; тут пасялюся, бо Я пажадаў яго.
«Гэта спачынак Мой на векі вечныя; тут буду жыць, бо пажадаў яго.
Ежу ягоную дабраслаўляючы дабраслаўлю, убогіх ягоных накармлю хлебам;
Дабраслаўляючы, дабраслаўлю ежу яго, бедных яго накармлю хлебам.
сьвятароў ягоных апрану ў выратаваньне, і сьвятыя ягоныя радасьцю ўзрадуюцца.
Святароў яго адзену ў збаўленне, і святыя яго будуць вельмі радавацца.
Там згадую рог Давіду, пастаўлю сьветач памазанцу Майму.
Тут вырашчу рог Давіда, прыгатую светач для Майго Намашчэнца.
Ворагаў ягоных апрану ў сорам; а на ім будзе зьзяць вянок ягоны».
Непрыяцеляў яго пакрыю сорамам, а над ім будзе зіхацець вянец яго».
