Да Эфэсянаў 5 разьдзел
Пасланьне да Эфэсянаў
Пераклад Васіля Сёмухі → Пераклад Рыма-Каталіцкага Касцёла
Дык вось, сьледуйце Богу, як дзеці любасныя,
Дык вось, наследуйце Бога, як дзеці ўмілаваныя,
і жывеце ў любові, як і Хрыстос палюбіў нас і аддаў Сябе за нас у прынашэньне і ахвяру Богу, на пахошчы прыемныя.
і паступайце ў любові, як і Хрыстус палюбіў нас і аддаў сябе за нас як дар і ахвяру Богу на прыемны пах.
А распуста і ўсялякая нечысьць і любазьдзірства не павінны нават упамінацца ў вас, як гэта прыстойна сьвятым.
А распуста, і ўсялякая нячыстасць, і сквапнасць няхай нават не згадваюцца сярод вас, як гэта належыць святым.
Таксама і брыдкаслоўе і пустаслоўе і пакепства не да гонару вам; а наадварот, хай лепш будзе падзяка;
Таксама і непрыстойнасць, і пустаслоўе, і вульгарнасць нягожыя для вас. Наадварот, няхай лепш будзе падзяка.
бо ведайце, што ніякі распусьнік, альбо нячысты, альбо любазьдзірца, які ёсьць ідаласлужэнец, ня мецьме спадчыны ў Царстве Хрыста і Бога.
Вы павінны ведаць, што ніякі распуснік, або нячысты, ці сквапны, гэта значыць ідалапаклоннік, не мае спадчыны ў Валадарстве Хрыста і Бога.
Хай ніхто ня зводзіць вас пустымі словамі, бо за гэта прыходзіць гнеў Божы на сыноў бунтоўных:
Няхай ніхто не зводзіць вас марнымі словамі, бо праз гэта прыходзіць Божы гнеў на непаслухмяных сыноў.
дык жа ня будзьце супольнікамі іхнімі.
Не будзьце ж іх супольнікамі.
Вы былі колісь цемра, а цяпер — сьвятло ў Госпадзе: дык паводзьцеся, як дзеці сьвятла,
Калісьці вы былі цемрай, а цяпер вы святло ў Пану. Паступайце, як дзеці святла.
бо плод Духа — ва ўсякай даброці, праведнасьці і ісьціне.
Бо плод святла ёсць ва ўсялякай дабрыні, справядлівасці і праўдзе.
Шукайце таго, што да спадобы Богу,
Імкніцеся да таго, што даспадобы Пану.
і не бярэце ўдзелу ў бясплённых дзеях цемры, а яшчэ і выкрывайце,
Не бярыце ўдзел у бясплённых справах цемры, а лепш выкрывайце іх.
бо пра тое, што яны робяць таемна, сорамна і казаць.
Бо пра тое, што яны робяць патаемна, нават сорамна казаць.
А ўсё, што выкрываецца, выяўляецца ў сьвятле, бо ўсё, што робіцца яўным, ёсьць сьвятло.
А ўсё, што выкрываецца праз святло, становіцца яўным, бо ўсё, што становіцца яўным, ёсць святло.
Таму сказана: «устань, хто сьпіць, і ўваскрэсьні зь мёртвых, і асьветліць цябе Хрыстос!».
Таму сказана: «Прачніся, які спіш, і ўваскрэсні, і Хрыстус асветліць цябе».
Дык глядзеце, дзейце асьцярожна, не як неразумныя, а як мудрыя,
Глядзіце дакладна, як паступаеце, не як неразумныя, а як мудрыя.
цэнячы дорага час, бо дні — ліхія.
Выкарыстоўвайце час, бо дні ліхія.
Дык ня будзьце ж неразважныя, а спазнавайце, што ёсьць воля Божая.
Не будзьце ж неразважнымі, але пазнавайце, што ёсць воляй Пана.
І ня ўпівайцеся віном, ад якога бывае распуста; а напаўняйцеся Духам,
І не ўпівайцеся віном, ад якога бывае распуста, але напаўняйцеся Духам,
настаўляючы саміх сябе псальмамі і славаслоўем і духоўнымі сьпевамі, сьпяваючы і апяваючы ў сэрцах вашых Госпада,
настаўляючы саміх сябе псальмамі, гімнамі і духоўнымі песнямі, спяваючы і праслаўляючы Пана ў вашых сэрцах.
дзякуючы заўсёды за ўсё Богу і Айцу, у імя Госпада нашага Ісуса Хрыста,
Дзякуйце заўсёды за ўсё Богу і Айцу ў імя Пана нашага Езуса Хрыста.
слухаючыся адно аднаго ў страху Божым.
Падпарадкоўвайцеся адзін аднаму ў боязі Хрыстовай.
Жонкі, упакорвайцеся сваім мужам, як Госпаду,
Жонкі, падпарадкоўвайцеся сваім мужам, як Пану,
бо муж ёсьць галава жонкі, як і Хрыстос — галава Царквы, і Ён жа Збаўца цела.
бо муж — галава жонкі, як і Хрыстус — Галава Касцёла. Ён — Збаўца цела.
Але як Царква слухаецца Хрыста, так і жонкі сваіх мужоў ва ўсім.
Таму, як Касцёл падпарадкоўваецца Хрысту, так і жонкі падпарадкоўваюцца ва ўсім мужам.
Мужы, любеце сваіх жонак, як і Хрыстос палюбіў Царкву і аддаў Сябе за яе,
Мужы, любіце сваіх жонак, як і Хрыстус палюбіў Касцёл і аддаў сябе за яго,
каб асьвяціць яе, ачысьціўшы мыцьцём водным, праз слова;
каб асвяціць яго, ачысціўшы купеллю вады і словам,
каб прадставіць яе Сабе слаўнаю Царквою, бяз плямы, без заганы, або чаго-небудзь падобнага, а каб яна была сьвятая і беззаганная.
каб ён з’явіўся перад Ім слаўным Касцёлам, які не мае плямы, ці заганы, ці чаго-небудзь падобнага, і каб ён быў святы і беззаганны.
Так павінны мужы любіць сваіх жонак, як сваё цела: хто любіць сваю жонку, любіць самога сябе.
Так павінны мужы любіць сваіх жонак, як сваё цела. Хто любіць сваю жонку, любіць самога сябе.
Бо ніхто ніколі ня меў нянавісьці да сваёй плоці, а корміць і грэе яе, як і Гасподзь Царкву;
Бо ніхто ніколі не меў нянавісці да свайго цела, але корміць і даглядае яго, як і Хрыстус свой Касцёл,
бо мы часткі Цела Ягонага, ад плоці Ягонай і ад касьцей Ягоных.
бо мы члены Ягонага цела.
Таму «пакіне чалавек бацьку свайго і маці і прылепіцца да жонкі сваёй, і будуць двое адна плоць».
Таму пакіне мужчына бацьку свайго і маці і злучыцца са сваёй жонкай, і будуць двое адным целам.
Тайна гэтая вялікая; я кажу пра Хрыста і пра Царкву.
Вялікая таямніца гэтая, а кажу я ў дачыненні да Хрыста і да Касцёла!
Так кожны з вас хай любіць сваю жонку, як самога сябе; а жонка хай баіцца свайго мужа.
Дык няхай кожны з вас любіць сваю жонку так, як самога сябе, а жонка няхай паважае мужа.
