1 да Карынфянаў 16 разьдзел
Першае пасланьне да Карынфянаў
Пераклад Васіля Сёмухі → Пераклад Сабілы і Малахава
А зьбіраючы для сьвятых, рабеце так, як я ўстанавіў у цэрквах Галятыйскіх;
А што тычыць скла́дкі ахвяраваньняў для сьвятых, дык і вы паступайце так, як я пастанавіў цэрквам Галятыі.
у першы дзень тыдня кожны з вас хай адкладвае ў сябе і ашчаджае, колькі дазваляе яму дастатак, каб не рабіць збораў, калі я прыйду.
У першы дзень тыдня кожны з вас няхай адкладвае ў сябе, зьберагаючы тое, што можа, каб, калі я прыйду, дык тады ўжо ня рабіць складчыну ахвяраваньняў.
А як прыйду, дык, каго вы выбераце, тых пашлю зь пісьмамі, каб даставілі ваш дар у Ерусалім.
А як прыйду, дык тых, каго вы выбераце, я пашлю зь пісьмамі аднесьці ваш дар у Ярузалім;
А калі і мне прыстойна будзе выправіцца, дык яны са мною пойдуць.
а калі будзе прыстойна і мне пайсьці, дык пойдуць разам са мною.
Я прыйду да вас, калі прайду Македонію; бо я іду цераз Македонію.
А прыйду да вас, калі прайду праз Македонію, — бо праходжу Македонію.
А ў вас, можа стацца, пажыву, або і перазімую, каб вы мяне правялі, куды пайду.
У вас жа, магчыма, пажыву, або нават перазімую, каб вы мяне правялі, куды пайду.
Бо я не хачу бачыцца з вамі цяпер мімаходзь, а спадзяюся прабыць у вас колькі часу, калі Гасподзь дазволіць.
Бо я ня хачу цяпер убачыць вас мімаходам, але спадзяюся нейкі час застацца з вамі, калі Госпад дазволіць.
А ў Эфэсе я прабуду да Пяцідзясятніцы,
А ў Эхвесе прабуду аж да Пяцідзясятніцы,
бо мне адчынены вялікія і шырокія дзьверы, і праціўнікаў многа.
бо перада мною адчынены дзьверы шырокія і з напружанай працай, але і праціўнікаў шмат.
Калі ж прыйдзе да вас Цімафей, глядзеце, каб ён быў у вас убясьпечаны; бо ён чыніць справу Гасподнюю, як і я.
Калі ж прыйдзе Цімахвей, глядзіце, каб ён быў у вас у бясьпечнасьці, таму што ён робіць справу Госпада, як і я.
Таму хай ніхто ім не пагардзіць, а праводзьце яго зь мірам, каб ён прыйшоў да мяне; бо я чакаю яго з братамі.
Пагэтаму ніхто да яго ня мусіць паставіцца абыякава; але правядзіце яго ў міры, каб ён прыйшоў да мяне, таму што я разам з братамі чакаю яго.
А што да брата Апалоса, я вельмі прасіў яго, каб ён з братамі пайшоў да вас; але ён ніяк не хацеў ісьці сёньня, а прыйдзе, калі яму будзе спорна.
Што тычыць брата Апальлёса, я вельмі прасіў яго, каб ён прыйшоў да вас з братамі; але ў яго ня было ніякага жаданьня прыйсьці цяпер; але прыйдзе, калі будзе мець магчымасьць.
Чувайце, стойце ў веры, будзьце мужныя, цьвёрдыя;
Чувайце, стойце ў веры, будзьце мужнымі, цьвёрдымі.
усё ў вас няхай будзе зь любоўю.
Хай у вас усё робіцца з любоўю.
Прашу вас, браты, вы ведаеце, сямейства Сьцяпанавае, што яно ёсьць пачатак Ахаіі, і што яны прысьвяцілі сябе служэньню сьвятым;
Прашу ж вас, браты, — вы ведаеце дом Сьцяпана, што ён ёсьць пачатак Ахайі, і што яны прысьвяцілі сябе на служэньне сьвятым, —
будзьце ж і вы пачцівыя да такіх і да кожнага, хто пасабляе і працуе.
каб і вы былі пакорнымі гэтакім і кожнаму, хто дапамагае нам і працуе.
Я рады прыходу Сьцяпана, Фартуната і Ахаіка: яны бо адшкадавалі мне вашу адсутнасьць,
Я рады ад прыходу Сьцяпана і Хвартуната, і Ахаіка, таму што яны папоўнілі вашу адсутнасьць:
бо яны мой і ваш дух супакоілі. Шануйце такіх.
бо яны супакоілі мой і ваш дух. Дык паважайце гэтакіх.
Вітаюць вас цэрквы Асійскія; вітаюць вас рупліва ў Госпадзе Акіла і Прыскіла з хатняю іхняю царквою.
Прывітаюць вас цэрквы Азіі. Шчыра вітаюць вас Акіла і Прыскілла разам з царквою, якая ў іх доме.
Вітаюць вас, усе браты. Вітайце адзін аднаго сьвятым цалаваньнем.
Прывітаюць вас усе браты. Прывітайце адзін воднага сьвятым пацалункам.
Маё Паўлава вітаньне сваёю рукою.
Прывітаньне маёй рукою, Паўлавай.
Хто ня любіць Госпада Ісуса Хрыста, анафэма; маранафа.
Калі хто ня любіць Госпада Ісуса Хрыста няхай будзе ана́тэма. Маран ата!
Мілата Госпада нашага Ісуса Хрыста з вамі,
Багадаць Госпада Ісуса Хрыста з вамі;
і любоў мая з усімі вамі ў Хрысьце Ісусе. Амін.
Любоў мая з усімі вамі ў Хрысьце Ісусе. Амін.
