Леувитъ 16 Леувитъ 16 разьдзел

¹ Рече Господь к Моисею, внегда было по смерти дву сыновъ Аароновыхъ, ониже приношаху огнь чужий и погибоша:

² «Заповедай Аарону, брату своему, глаголя, да не входить на каждый часъ во Святыню, иже ест за завесою пред очищением, имже прикрита ест Скриня Завета, да не умрет, яко во облаце явлюся ему надъ очищениемъ.

³ Ащели же восхощеть вниити, сице первей да вчинить: да возметь телца за грехъ и овна во всесозжение,

⁴ и да облечется в ризы платняны и порты платняными да прикриеть тело срамоты своея, и поясомъ илнянымъ да ся опояшеть, и клобукъ платнян да возложить на главу свою, яко сии ризы святы сут, в няже да облечется, змывши первей тело свое.

⁵ И возметь от всего множества сынов Ізраилевых два козлы за грехъ и едина агнеца во всесозжение.

⁶ И внегда приносити будет телець, моляся о собе и о доме своем,

⁷ поставить два козлы пред Господемъ во дверех Храму Сведения

⁸ и вержеть на них жребие, который козелъ имать достатися Богу, а который выпущен быти.

⁹ И на негоже падеть жребий Божий, да зарежеть и и принесеть жерътву за грехъ.

¹⁰ Козла пакъ другаго, егоже имать выпустити, да поставить пред Господем живого, да бы вчинил молитву над нимъ и отпустил и во пустыню.

¹¹ Сие внегда по чину исправить, да поставить телца и, моляся о собе и о доме своемъ, зарежеть и.

¹² И возмя кадилницу, насыплеть до нея углия с требника, и набереть рукою фемиану добровоннаго и вниидеть внутрь, за завесу во Святыни,

¹³ и накладеть фимиану до кадилнице на углие, и дым от фимиану прикриеть очищение, еже естъ надъ Скринею Завета, да не умреть.

¹⁴ И возметь от крови тельца, и омочивъ перстъ свой, покропить седмижды предъ Господемъ противу очищению, на востокъ солнеца.

¹⁵ И егда зарежеть козла за грехъ людей, внесеть кров его за завесу, якоже повелено естъ от крови телчей, и да покропить ею противу молитовници,

¹⁶ и очистит Святыню от нечистотъ сыновъ Ізраилевыхъ и от безакония, и от всехъ греховъ их. По тому обычаю да вчинить во Храме Сведения, иже ест в нихъ посреде становъ жилищь их.

¹⁷ Всякий человекъ да не будеть тогда во Храме Сведения, егда входити начнет жрець во светая светыхъ помолитися о собе и о дому своемъ и о всемъ множестве сыновъ Ізраилевыхъ, дондеже выйдеть из храму.

¹⁸ А внегда приидеть ко олтарю, иже естъ предъ Господемъ, молитися будеть о собе, и возмя кровь козлю и тельчу, вылиеть на роги олтаря в суда вооколо

¹⁹ и покропить перстомъ седмъкрать, и да очистить и освятить и от нечистотъ сыновъ Израилевыхъ.

²⁰ И егда вычистить Святыню и олтарь, и храмъ, потомъ да поставить козла живого,

²¹ и возложив на главу его руце обе, да исповесть вся безакония сыновъ Ізраилевыхъ и все неправды и грехи ихъ, о нихже помолився над главою того козла, отпустить его живого во пустыню со человекомъ, к тому уготованымъ.

²² И внегда понесеть на собе козелъ все грехи их до земли пустое и пустять и в пустыни,

²³ возвратится Ааронъ до Храму Сведения и съвлечеть с себе ризы, в няже ся былъ облекъ, входяй во Святыню Святых, и положив их ту,

²⁴ омыет тело свое на месте святом и облечется во одежду свою; и вшедъ, приносити будеть всесозжение и помолится о собе и о людехъ.

²⁵ Лой пакъ, иже приношашеся за грехъ, возложить на требникъ и спалить.

²⁶ И человек той, онже отводил козла во пустыню, умыеть тело свое водою и спереть ризы свое, и по томъ вниидеть у полки.

²⁷ Телца пакъ и козла, еже приношены суть за грехъ, ихже кровь вношена естъ во светая светыхъ на выполнение очищения, да вынесуть вонъ ис полковъ и сожгуть на огни мяса их и коже, и лайна.

²⁸ И вси, еже жечи е будуть, да омыють тела свое водою и сперуть ризи, а тако вниидуть в полки.

²⁹ И будеть вамъ сее в закон вечный. Месеца теже седмаго, во десятый день его, покорите душе ваше и никакова дела вчините в день той, буди тубылець или пакъ гость, иже у васъ естъ:

³⁰ в той день будеть очищение ваше, ото всехъ греховъ вашихъ пред Господемъ очиститеся,

³¹ празникъ убо покоя естъ, и смирите душе ваше молитвою вечною.

³² И будеть молитися за ня жрець помазаный, егоже руце посвящены суть и приступил ко службе по ряду в место отца своего; той да облечется в ризы платняныb и в ризы святы

³³ и очистит Святыню и олтарь, и Храмъ Сведения, и жерцев, и все множество людей.

³⁴ И будеть сее вамъ в закон вечный, да молитеся за сыны Ізраилевы и за вся безакония их единова в году». И вделал естъ тако, якоже повеле Богъ Моисееви.