Леувитъ 6 Леувитъ 6 разьдзел

¹ Глагола Господь Моисееви, и естъли же согрешит и, не бояся Бога, запрел бы рече:

² «Человекъ некому, что ему было зверено, или насилиемъ что кому отнял, или кривду вчинил,

³ или неякую речь знашолъ и запрел бы ю, к тому и присягу кривую вчинилъ, или иное что, к сим подобно, вделал, в немже бы грехъ был,

⁴ и будеть тое на него доведено, да вернеть все цело, еже несправедливе хотел скористити.

⁵ А над то да придасть пятую часть того человеку, емуже былъ шкоду учинил.

⁶ За грех пакъ свой да принесеть агнеца непорочна от стада и подасть и жерцу по цене и мере греха,

⁷ онже молитися будет за нь предъ Господем Богом, и отпустить ему все, еже чиняй согрешилъ».

⁸ Молвил же ест Господь к Моисееви, и рече:

⁹ «Заповежь Ааронови и сыномъ его, глаголя: сий естъ обычай и законъ жертвы всегосозжения, да горить на требнику всю нощъ даже до утра, огонь от того же требника да будет.

¹⁰ И облечется жрець в ризы лняны и в портки плотняны, и зграбив попелъ той, иже нагорелъ на требнице и положив и подле требника,

¹¹ свлечется с тыхъ ризъ; и облекся во одежду ину, вынесеть попелъ той вонъ с полковъ, и на месте чистомъ палити и будеть, даже в пылъ зъгмызети имать.

¹² Огонь пак всегда да горить на требнице, егоже оправовати будеть жрець, прикладая дровъ рано на каждый день, и возложивши на нь лой, палити будеть жертвы мирные.

¹³ Огонь сей естъ вечный, онже николи имат загаснути на требнице.

¹⁴ Сей пакъ естъ обычай и законъ жертвы сухое и мокрое, юже приносити будуть сынове Ааронови предъ Господемъ и предъ требникомъ.

¹⁵ Возметь жрець горсть крупъ пшеничныхъ, покропленыхъ олеемъ, и весь ладанъ, иже сверху положеный ест на крупахъ, и жечи тое будеть на требнице на паметь, воню благоухающую Господу.

¹⁶ А останокъ крупъ да ясть Ааронъ и сынове его без квасу; и ести е будуть на месте святом, во притворе Храму Сведения.

¹⁷ Сего деля не будуть их ести квашеныхъ, понеже частъ естъ от жертвы всихсозжения, святое святыхъ естъ по тому жъ, яко и треба за грехъ и за проступку.

¹⁸ Мужескъ полъ толико от племеня Ааронова ести будуть е, законъ выреченый и вечный будеть имъ ести от требъ Господьних посвященых; всякъ, доткнувыся их, посвятится».

¹⁹ И рече паки Господь к Моисееви, глаголя:

²⁰ «Сий естъ дар Аароновъ и сыновъ его, иже принести имають в день помазания своего: десятую часть меры ефинъ муки пшеничноеa да приносять приношением вечным, половину рано, а половину на вечеръ.

²¹ Тая же мука ув олеи спрежена будеть на скавраде; и приносити ю будеть горячу во благоухание Господу

²² жрець, иже на отцево место воступилъ по ряду, и созжеть ю всю на требнику.

²³ Всяку же требу жреческу на огни да сожгуть и ниже кто ясть от нея».

²⁴ И рече Господь Моисеови, глаголя:

²⁵ «Ирци Ааронови и сыномъ его: Сее естъ приношение, иже бываеть греха деля. На месте, игдеже приносять жертву всехсозжения, ту да приносят предъ Господемъ, понеже святая светыхъ ест.

²⁶ Жрець, иже приносить, да ясть ю на месте святом, во притворе храмове.

²⁷ Все, еже доткнется мясъ жертвы тое, посвящено будеть. Естъли же риза покроплена будеть кровию тою, то да исперется на месте святом.

²⁸ Горщокъ пакъ глиненый, в немже варено естъ тое мясо, розбитъ да будетъ; пакли же естъ сосудъ медяный, да вытруть и и змыють водою.

²⁹ Все мужеское поглавие от колена Ааронова да ядять мясо жертвы тое, яко светая светыхъ естъ;

³⁰ приношение пакъ, еже бываеть за грехъ, от негоже кровь вносится во Храмъ Сведения ко очищению во Святыни, да ся не ясть, но на огни да созжется.