Леувитъ 5 Леувитъ 5 разьдзел

¹ Человек естъли же согрешить и, пряся того, накриве бы присегал, а некто, о томъ ведя или то видя, - позваный на сведецство, а не поведилъ, понесеть грехъ его.

² Человекъ, онже доткнется чего нечистого или от зверя удавленаго, или мертвечины, или гадыни нечистое и запомнил бы нечистоты своея, виненъ будеть и согрешилъ естъ.

³ По тому же, естъли доткнется яковое нечистоты человечие или гнюсу, которим ся пригожаеть осквернити, и запомнил бы, а потомъ воспомянулъ и позналъ грехъ свой, змазанъ будеть имъ.

⁴ Человекъ, онже бы слюбил усты своими, да бы что учинилъ, доброго или злого, и не исполнилъ бы того, еже словомъ со клятвою вымолвилъ, и запомянул бы, а потомъ успомнилъ грехъ свой,

⁵ да покается

⁶ и принесеть за грехъ свой овъцуa или козу от стада, и помолится о немъ жрець и о гресе его.

⁷ Ащели же не возможеть принести овци или козы, то да принесет две горлице или двое голюбятъ Господу — едино за грех, а другое во всесозжение —

⁸ и дасть е жрецу, онже, едино возмя, приносити будеть за грехъ, и завернеть главу ему ко криломъ тако, абы у горла висела глава и сцела не была отторгнена,

⁹ и покропить кровию его стены требника всихъсозжения, и что останется от крови тое, тое да выцедить во стояло того ж требника, понеже за грехъ естъ.

¹⁰ Другую пакъ горлицу или голубя принесеть во всесозжение Господу, якоже обычай естъ. И помолится о немъ жрець и о гресе его, и отпустится ему.

¹¹ Естъли же рука его не будеть мочи знайти для убожства дву горлиць или дву голубятъ, то да принесеть за грехъ свой муки пшеничное десятую часть меры ефимъ, да не покропляеть ея олеем ани ладану воскладаеть на ню, понеже за грехъ естъ,

¹² и дасть ю жерцеви, онже, возмя полную горсть от нея, спалить на требнице на паметь его.

¹³ Жрець же, моливыйся за него и очищая и, останокъ муки тое возметь собе в даръ».

¹⁴ Рече Господь к Моисею, глаголя:

¹⁵ «Человекъ естъли же забывшися согрешить, преступуя посвященные обычае в тыхъ речахъ, еже Богу освящены суть, той да принесет за грехъ свой агнеца непосквернена от стада, егоже цена естъ купити два сикля по вазе светыни;

¹⁶ и убытокъ, еже учинилъ естъ во посвященыхъ Господу, да вернеть, и пятую часть над то навязки да дасть жерцу, той же помолится о немъ и о гресе его, приношая агнеца, и отпущенъ будеть ему.

¹⁷ Человекъ, онже бы согрешилъ не ведяй и вчинилъ что от тыхъ речей, еже заказуеть законъ Господень, и познавъ грехъ свой, иже сотвори,

¹⁸ да принесеть агнеца непорочна от стада ко жерцу по мере безакония своего; жрець пак молитися будеть за нимъ, яко не зная естъ сотворилъ грехъ той, и отпустится ему,

¹⁹ понеже соблазнился естъ и согрешилъ предъ Господемъ, Богомъ своимъ, не ведяй».