Пророкуеть Валаамъ о пришломъ царствии Ізраильскомъ и о пришествии Господа нашего Ісуса Христа, Онже имелъ народитися от племеня Яковлева.
1 Видевъ же Валаамъ, яко любо бе Богу, абы благословил Ізраиля, прото не хотяше по обычаю первому воспрошати волхованием, но обративши лице свое во пустыню.
2 И воздвигши очию своихъ, виде людей Ізраилевыхъ, живушихъ в шатрехъ по полкохъ своихъ. И внегда въступилъ в него духъ Божий,
3 нача притчу свою и рече: «Глаголеть Валаамъ, сынъ Вехоровъ, глаголеть человек, емуже затмилося око.
4 Рече послух словесъ Божиихъ, онже виде видение Божие, и откришеся очи его.
5 Се коль красны суть домы твоя, Якове, и пребытки твоя, Ізраилю!
6 Яко роздолия осеняющаяся и яко ограды при рекахъ, яко шатры, еже укрепилъ Господь, и яко кедры подле водъ!
7 Изыйдеть человекъ от племеня его и совладееть странами многими, вознесется надъ Агога царь его и розъмножится царство его.
8 Богъ выведе и изъ Египта, Егоже крепость подобна естъ еднорожцу. Пожреть страны врагъ своихъ и силу ихъ сокрушить, и врата ихъ устрелить стрелами своими.
9 Возлегъ, спалъ естъ, яко левъ, и яко лвица, еяже никто смееть обудити. Благославящеи тебе благословятся и кленущие тебе прокляти будуть!»
10 Тогда розгневался естъ Валакъ на Валаама, а сплесънувъ рукама и рече: «Позвалъ есми тебе, да бы злоречилъ врагомъ моимъ, ты пакъ вже утретее благословляеши имъ!
11 Навратися жъ воспять на место свое. Умыслилъ есми былъ славне честовати тя, но Богъ избавилъ естъ тебе даровъ тыхъ, еже наготовалъ есмъ тобе».
12 Отвеща Валаамъ к Валакови: «Еда ли не рекохъ посломъ твоимъ, ихже посылалъ еси ко мне, глаголя:
13 абы ми далъ Валакъ полонъ домъ свой злата и сребра, не возмогу пременити словесъ Господа, Бога моего, да быхъ что злого или доброго промолвилъ от серца своего, но все, еже повелить ми Господь Богъ, тое глаголати буду?
14 Ныне же отшедъ к людемъ моимъ, советъ дамъ тобе, что имають учинити людие твои людемъ симъ во последняя».
15 Потомъ опять начавъ притчу свою и рече: «Глаголеть Валаамъ, сынъ Веоровъ, глаголеть человекъ, егоже око затмилося естъ.
16 Рече послухачь словесъ Божиихъ, он же от научения Превышнего знаеть и з видения Вседержителя видить, он же егда падеть, отоврены имать очи.
17 Узрю его, но не нине; поглежу на него, но не зблизка. Восияеть звезда от Якова и повстанеть жезлъ от Ізраиля и побиеть князей Моавскихъ, и пленить всехъ сыновъ Сефовых.
18 И будеть Ідумея область его, достоание Сеирово достанется врагомъ его, люди же Ізраилевы мужне собе чинити будуть.
19 И востанеть князъ от Якова, онже сказить останки градовъ».
20 И егда узрел Амалеха, начавъ притчу свою и рече: «Початокъ погановъ Амалехъ, егоже останци скажены будуть».
21 Узревъ теже и Кинея, нача притчу свою и рече: «Крепко естъ селение твое, но бы пакъ на скале имелъ гнездо свое
22 и самъ былъ от роду Кинеева, яко не возможеши долго стояти, понеже Асуръ возметь тя».
23 И паки начавъ притчу свою и рече: «Внегда сотворить сие речи Господь,
24 приплавятся от Италии въ кораблехъ и пленять Асурянъ, и погубять людей Еврейскихъ, а потомъ и сами загинуть».
25 И востав, Валаамъ от[ъ]иде на место свое. Валакъ теже возвратился тымъ путемъ, имже былъ пришолъ.
Знайшлі памылку ў тэксце? Вылучыце яе і націсніце:
Ctrl + Enter
Книги Числа, 24 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.