Числа 12 Числа 12 разьдзел

¹ Тогда роптала ест Мария и для его Мурянинки,

² глаголюще: «Не толико к Ааронъ на Моисея жены самому Моисееви молвилъ ест Господь, но и с нами глаголал естъ». Сее егда услышал Богъ,

³ розгневался зело, былъ убо ест Моисей мужъ кротокъ велми паче всехъ людей, сущих на земли.

⁴ И скоро рече Господь Моисееви и Ааронови, и Марии: «Выйдите толико вы три ко Храму Сведения».

⁵ И внегда они вышли суть, сступилъ естъ Господь во столпе облачномъ и ста во дверехъ храмовыхъ, и возва Аарона и Марии. Они же егда приступили,

⁶ рече имъ: «Послушайте словесъ Моих: аще будет посреди вас кто пророкомъ Божиимъ, во видении явълюся ему или во сне буду глаголати к нему.

⁷ Не таковый ли пакъ рабъ Мой Моисей, онже во всем дому Моемъ найвернейший естъ?

⁸ Яко лицемъ к лицу глаголю к нему, явно же и не во уподоблении, и ни в притчах видить Бога. Сего ради како не стыдестеся роптати на раба Моего Моисея?»

⁹ Тогда, розгневавшися на нихъ, от[ъ]иде

¹⁰ и облакъ по томъ воздвижеся от Храму Божия. И се Мария, сестра Моисеева, прокажена бяже,a бела явися, яко снегъ. И внегда погледел на нее Ааронъ и узрелъ, ано по всемъ теле ея розлилося прокажение,

¹¹ и рече к Моисееви: «Молю ти ся, господине, не мсти над нами греха сего, яко не ведяще учинихом,

¹² да не будеть сия, яко мертвая и яко искидокъ, еже выверженъ бываеть с ложеснъ материных, се бо вже половина плоти ея сказилася естъ от вреда прокажения».

¹³ Тогда возопилъ естъ Моисей ко Господу, глаголя: «Господи Боже! Молю Ти ся, уздрави ю!»

¹⁴ Ему же отвеща Господь: «Егда бы отець ея плюнулъ ей на тварь, не имела ли бы ся за то стыдити принайменей за седмъ дней? Сего ради да отлучать ю вонъ с полковъ до седми дней, по томъ пакъ опять приведена будеть».

¹⁵ И тако выгнана естъ Мария вонъ с полковъ за седмъ дне. И людие вси Ізраилевы не рушилися суть нигде же з места того, дондеже очистена естъ Мария и паки приведена в полки к людемъ Ізраилевымъ.