Которие слюбы имели полнити мужи. Теже о слюбех девиць и женъ, которых не имели полнити.
1 Поведа же Моисей сыномъ Ізраилевымъ вся слова, еже повеле ему Господь.
2 И глаголалъ естъ ко княземъ поколеней сыновъ Ізраилевыхъ: «Сие слово, еже повеле вам молвити Господь.
3 Естъли же бы кто от мужей слюбилъ Господу или обрек ся под присягою, то не изрушит слова своего и ни изменит, но все, еже слюбил, да наполнит.
4 Естъли же девица слюбить Богу и заприсяжеть, сущи в доме отца своего и во младости своея,
5 аще увесть отець слюб ея и присягу, еюже завязала душу свою, и замолчить, повинна будеть дева та наполнити слюбъ свой, еже слюбила и заприсягла.
6 Пакли же бы отець, услышав слюбъ или присягу ея, и скоро супротивился тому, тогда и слюбъ, и присега ее зрушена будеть и не будет повинна къ наполнению слюбу своего, понеже отець ея супротивился ест тому.
7 Естъли же бы пакъ девица заручена мужу и нечто слюбила Богу и присягою потвердила,
8 а мужъ ея то слышал а скоро в той же день не бранил ея, то повинна будеть наполнити все, еже слюбила и заприсягла Богу.
9 Пакли же мужъ услышавъ и скоро отмолвялъ, и не хотелъ призволити ей к тому, то не будет повинна наполнити слюбу и присягу, еюже завязала душу свою, и зрушить и отпустить ей Господь Богъ.
10 Вдова пак и жена пущеница, елико же аще слюбуеть Богу, все да исполнить.
11 Жена, сущи в доме мужа своего, внегда бы слюбила и обрекла ся в нечемъa Богу,
12 а мужъ ея то слышал и не бранил бы ей, да наполнить еже слюбила естъ.
13 Пакли же, скоро услышавъ, запретить ей а не призволить к тому, не будеть повинна выполнити слюбу своего, понеже мужъ не призволилъ, и Господь отпустить ей.
14 Естъли бы жена слюбила и заприсягла, яко хощеть постом или иными терпениами смирити душу свою, на воли то будеть мужа ея, имат ли учинити чили ни.
15 Ащели же мужъ сие слышавъ и молчал а занедбал даже до другого дня, тогда еже слюбила да исполнит, понеже мужъ ея, егда слышал от нея, не забранял ей.
16 Естъли же пак по том дни, в онже ест слышал, будеть забраняти, понесеть сам грехъ ея».
17 Сий ест закон, еже установил Господь Моисеемъ межи мужем и женою и межи отцемъ и дщерою во юности ея в доме отцеве.
a Erratum: в нечемъ → невчемъ.
Знайшлі памылку ў тэксце? Вылучыце яе і націсніце:
Ctrl + Enter
Книги Числа, 30 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.