Числа 32 Числа 32 разьдзел

¹ Сынове пакъ Рувимови и Гадови имеаху множество скоту и говядъ яко бы без числа, и внегда видеша землю Азеръa и землю Галаадъ имеюще паствы добры,

² приидоша к Моисею и ко Елиазару-жерцу, и ко князем людей Ізраилевыхъ и рекоша:

³ «Астарот и Дивон, и Язеръ, и Немрам, и Езевон, и Елиаля, и Саван, и Невон, и Веон —

⁴ земли, еже предал ест Господь сыном Ізраилевым, — суть велми добры къ пасению скоту. Мы же, раби твои, имамы множество стадъ.

⁵ Того ради просимо тебе, господине, естли же знайдохом ласку пред тобою, дай намъ землю сию во одержание, да не идем далей за Іорданъ».

⁶ К ним же отвеща Моисей: «Еда ли братия ваша пойдуть к бою, а вы сядете ту?

⁷ Почто розвращаете мысли сыновъ Ізраилевых, да бы они для васъ не шли до земли, юже даеть имъ Господь?

⁸ Не по тому ли жъ учинили и отцеве ваши, егда посылах их от Кадис-Варнии, да бы согледали землю?

⁹ Они же, пришедши до долины Грозновы и сходивши всю землю и навратившися, розвратиша серца сынов Ізраилевых, да бы не входили в землю, от Бога даную имъ.

¹⁰ И раз[г]невася Богъ на всехъ, и закляся, глаголя:

¹¹ “Не узрять людие сие, вышедшие изъ Египта, от двацети летъ и вышей, земли, юже под присягою обещахъ Авраамови, Ісаакови и Яковови, понеже не хотеху послушати Мене,

¹² кроме Калефа, сына Ефониина, а Ісуса, сына Наувина, тии убо наполниша волю Мою”.

¹³ И прото, розгневавшися на людей Ізраилевыхъ, водил их по пустыни четыредесятъ летъ, дондеже не погибе весь родъ той, онже чинилъ злые дела предъ Господем Богом.

¹⁴ И се ныне еще вы востали есте на места отцев своихъ, приросткове и ускормни людей грешныхъ, хотяще розмножити гнев Божий на люди Ізраилевы.

¹⁵ Не восхощете ли последовати Его, Той погубить людей сихъ во пустыни, и вы будете винни смертию всех».

¹⁶ Тогда они приступивши ближей и рекоша: «Хлевы овцамъ уделаемъ и стайни говядомъ, и детем нашимъ грады соградимо,

¹⁷ мы же сами пойдемъ во зброи к бою предъ сынми Ізраилевыми, дондеже и воведемъ е на места ихъ. Дети наше толико и все имение, еже имамы, останеть во градехъ ограженыхъ для иноплеменникъ земли сее,

¹⁸ сами же не навратимся до домовъ наших, даже первей владети будуть сынове Ізраилевы достоаниемъ своимъ.

¹⁹ И ниже что иного хотимъ имети от васъ за Іорданемъ, но да имамы достоание свое к востоку солнеца».

²⁰ К ним же рече Моисей: «Естъли хощете учинити, якоже глаголете, и ити во зброи предъ Господемъ къ бою, —

²¹ и кажъдый мужъ от васъ боець да идеть со оружиемъ за Іорданъ предъ братиею своею, дондеже погубить Господь Богъ враги их,

²² и поддана будет имъ вся земля — тогда без вины будете пред Богом и предъ Ізраилем и приимете страны, ихже жадаете предъ Господемъ.

²³ Пакли же не учините тако, якоже глаголете, то согрешите предъ Богомъ и увесте грехъ свой, егда спостигнет васъ скоро.

²⁴ Сего ради уделайте грады детемъ вашимъ и хлевы овцамъ вашимъ, и стайни говядом вашимъ, и что слюбили есте, да наполните».

²⁵ И рекоша сынове Рувимови и Гадови к Моисею: «Раби твои есмо! Учинимъ все, еже повелить намъ господинъ нашъ.

²⁶ Жены наше и дети, и скотъ оставимо во градехъ Галаадъ

²⁷ мы же сами, раби твои, вси во зброи пойдемъ к бою камо же ты велиши».

²⁸ Тогда глагола Моисей ко Елиазаружерцу, и ко Ісусу, сыну Наувину, и ко княземъ поколеней Ізраилевыхъ

²⁹ и рече имъ: «Естъли же пойдуть с вами сынове Рувимови и сынове Гадови за Іорданъ во зброи к бою предъ Господем и землю приимете, то дайте имъ землю Галаадъ за вчастие, да владеють ею.

³⁰ Ащели же бы не восхотели ити с вами до земли Ханаани, то посполу вси да [п]ребываете».

³¹ Отвещали суть сынове Рувимови и сынове Гадови: «Якоже глаголалъ ест господинъ нашъ рабомъ своимъ, тако и учинимо.

³² Се мы ради пойдемы во зброи до земли Ханаани предъ Господемъ и вызнавамы, иже взяхом части свое за Іорданемъ».

³³ И далъ ест Моисей сыном Рувимовым и сыном Гадовымъ и полуплемени Манасиину, сына Іосифова, царство Сеона, царя Аморейска, и царство Ога, царя Васанска, и землю ихъ, и грады, еже беша в ней.

³⁴ Тогда сынове Гадови поделаша собе места Дивонъ, Астаротъ, Ароиръ,

³⁵ Рофъ-Софанъ, Язеръ, Гефанъ,

³⁶ Вет-Немрам и Веф-Аронъ, грады ограженные, и хлевы, и стайне скоту своему.

³⁷ Сынове пакъ Рувимови поделали суть грады Езевонъ, и Елиалю, и Кариафаимъ,

³⁸ и Навофъ, и Вал-Монъ, пременивши имъ имена, Савам теже, прозвавши иными имены грады, еже соделаша.

³⁹ Сынове же Махирови, сына Манасиина, шедши во Галаадъ и вывоеваша и, и забиша Аморея, живущего в немъ.

⁴⁰ И далъ естъ Моисей землю Галаадъ Махирови, сыну Манасиину, и живяше в ней.

⁴¹ Аиръ пакъ, сынъ Манасиевъ, отшедъ и здобывалъ естъ градовъ и селъ околичных, и назвалъ ихъ Айотъ-Аиръ, еже исказуется «села Аирова».

⁴² Новавъ теже, шедъ, добылъ естъ града Канафа и всехъ селъ его, и прозвалъ и именем своимъ — Новавъ.