Выслоўяў Саламонавых 10 разьдзел
Кніга выслоўяў Саламонавых
Пераклад Антонія Бокуна → Пераклад Чарняўскага 2012
Прыповесьці Салямона. Мудры сын — радасьць для бацькі, а дурны сын — смутак для маці.
Прыпавесці Саламонавы. Мудры сын — радасць бацьку, а бязглузды сын — гора для маці сваёй.
Не прыносяць карысьці скарбы бязбожныя, а праведнасьць ратуе ад сьмерці.
Ніяк не дапамогуць бязбожныя скарбы, а справядлівасць душу выратуе ад смерці.
Не дазволіць ГОСПАД галадаваць душы праведніка, але адкіне жаданьні бязбожнікаў.
Не пашкодзіць Госпад голадам справядліваму, а хцівасць бязбожнікаў знішчыць.
Лянівая рука робіць бедным, а рука працавітая ўзбагачае.
Лянівая рука ўтварае беднасць, а рука працавітых падрыхтоўвае багацце.
Хто летам зьбірае, той сын разважлівы, а хто сьпіць у жніво — сын ганебны.
Той сын мудры, хто збірае ў жніво, а хто храпе ўлетку — сын шалапутны.
Дабраславенствы — на галаве праведнага, а вусны бязбожнікаў хаваюць няправасьць.
Дабраславенні Госпадавы — на галаве справядлівага, а вусны бязбожнікаў хаваюць лютасць.
Памяць пра праведніка дабраслаўлёная, а імя бязбожнікаў спарахнее.
Памяць справядлівага будзе ў дабраславенні, а імя бязбожнікаў сатлее.
Мудры сэрцам прыймае прыказаньні, а той, хто мае вусны неразумныя, упадзе.
Мудры сэрцам прымае пастановы, а бязглузды загіне праз вусны.
Хто ходзіць беззаганна, той ходзіць бясьпечна, а хто крывіць шляхі свае, будзе выяўлены.
Хто ходзіць прама, той ходзіць вечна; а хто крывіць дарогі свае, будзе выкрыты.
Хто міргае вачыма, той робіць прыкрасьць, і той, хто мае вусны неразумныя, упадзе.
Хто міргае вокам, той прынясе боль, а бязглузды вуснамі загубіць.
Вусны праведніка — крыніца жыцьця, а вусны бязбожнікаў хаваюць няправасьць.
Вусны справядлівага — крыніца жыцця, а вусны бязбожнікаў хаваюць лютасць.
Нянавісьць выклікае сваркі, а любоў пакрывае ўсе правіны.
Нянавісць выклікае сваркі, а любоў пакрывае ўсе грахі.
У вуснах разумнага знаходзіцца мудрасьць, а кій — на сьпіне бязглуздага.
У вуснах мудрага знаходзіцца мудрасць, а розгі — на спіне таго, хто не мае сэрца.
Мудрыя захоўваюць веданьне, а вусны неразумнага вядуць да загубы.
Мудрыя зберагаюць веды, а вусны бязглуздага — блізкія да пагібелі.
Маёмасьць багатага — умацаваны горад для яго, загуба для бедных — галеча іхняя.
Маёмасць багатага — горад крэпасці яго; пагібель бедных — беднасць іх.
Праца праведніка вядзе да жыцьця, набытак бязбожніка — да грэху.
Праца справядлівага — на жыццё, а плады бязбожніка — на грэх.
На сьцежцы жыцьця той, хто прыймае настаўленьне, а хто адкідае дакараньне — блукае.
Хто беражэ настаўленне — ідзе да жыцця, а хто адхіляе папрокі — блукае.
Хто хавае нянавісьць, у таго вусны хлусьлівыя, а хто паклёп разносіць, той дурань.
Ілжывыя вусны хаваюць нянавісць, а хто зневажае — той неразумны.
У мностве словаў не пазьбегнеш грэху, а хто стрымлівае вусны свае, той разважлівы.
У шматслоўнасці не будзе недахопу ў грахах, а той, хто ўтрымлівае вусны свае, — самы разважлівы.
Язык праведніка — адборнае срэбра, а сэрца бязбожніка нічога ня вартае.
Мова справядлівага — адборнае срэбра; сэрца ж бязбожнікаў — нічога не вартае.
Вусны праведнага пасьвяць многіх, а бязглуздыя паміраюць ад нястачы розуму.
Вусны справядлівага павучаюць вельмі многіх; а той, хто бязглузды, памрэ ад беднасці сэрца.
Дабраславенства ад ГОСПАДА, яно ўзбагачае, і смутку з сабою не прыносіць.
Дабраславенне Госпада робіць людзей багатымі; і не будзе дабаўлена ім ніякага цяжару.
Радасьць для дурня — учынкі ганебныя, а чалавек разумны [радуецца] мудрасьці.
Быццам жартам бязглузды робіць злачынства, а мудрасць — для чалавека разважлівага.
Тое, чаго баіцца бязбожнік, прыйдзе на яго, а прагненьні праведных споўняцца.
Чаго баіцца грэшнік, тое і прыйдзе да яго, а жаданне справядлівага здзейсніцца.
Калі пранясецца віхура, ня будзе больш бязбожніка, а праведнік мае вечны падмурак.
Як праносіцца віхура — так знікне бязбожнік, а справядлівы — як вечны падмурак.
Як воцат для зубоў і як дым для вачэй, так гультай для тых, што яго пасылаюць.
Як укус для зубоў і дым для вачэй, так і гультай для тых, што яго паслалі.
Страх перад ГОСПАДАМ памнажае дні, а гады бязбожнікаў скароцяцца.
Страх Госпадаў дні памножыць, а гады бязбожнікаў скарацяцца.
Чаканьне праведнікаў — радасьць, а спадзяваньне бязбожнікаў загіне.
Чаканне справядлівых — радасць, а надзея бязбожнікаў загіне.
Шлях ГОСПАДАЎ — апора для беззаганных і загуба для злачынцаў.
Шлях Госпадаў — цвярдыня для чыстых сэрцам і пагібель для тых, хто робіць ліха.
Праведнік не пахісьнецца навекі, а бязбожнікі ня будуць жыць на зямлі.
Справядлівы не пахіснецца да веку, а грэшнікі не выжывуць на зямлі.
Вусны праведніка памнажаюць мудрасьць, а язык падступны будзе адсечаны.
Вусны справядлівага спараджаюць мудрасць, язык крывадушны будзе вырваны.
Вусны праведніка ведаюць, што даспадобы [Богу], а ў вуснах бязбожнікаў — падступнасьць.
Вусны справядлівага бачаць прыемнае, а вусны бязбожнікаў — дрэннае.
