Выслоўяў Саламонавых 21 разьдзел
Кніга выслоўяў Саламонавых
Пераклад Васіля Сёмухі → Пераклад Антонія Бокуна
Сэрца цара ў руках у Госпада, як патокі водаў: куды захоча, Ён кіруе яго.
Сэрца валадара ў руцэ ГОСПАДА, як ручаі водаў, Ён скіроўвае яго, куды хоча.
Усякі шлях чалавека просты ў вачах ягоных; а Гасподзь узважвае сэрцы.
Усе шляхі чалавека слушныя ў вачах ягоных, але ГОСПАД узважвае сэрцы.
Справядлівасьць і праўду чыніць — больш даспадобы Госпаду, чым ахвяра.
Праведнасьць і суд даспадобы ГОСПАДУ больш, чым ахвяра.
Гонар вачэй і пыха сэрца, сьветачы бязбожнікаў — грэх.
Узьнесеныя вочы і надзьмутае сэрца — баразна бязбожных, [і гэта] грэх.
Задумы руплівага вядуць да дастатку, а кожны сквапны церпіць нястачу.
Думкі руплівага [прыносяць] прыбытак, а кожнага нецярплівага — нястачу.
Набываньне скарбу ілжывым языком — мімалётная марнасьць тых, што шукаюць сьмерці.
Зьбіраньне скарбаў языком падманлівым — па́ра, што зьнікае, шуканьне сьмерці.
Гвалт бязбожных абернецца супроць іх, бо яны выракліся праўды.
Злачыннасьць бязбожнікаў зьвернецца на іх, бо яны грэбуюць чыніць суд [справядлівы].
Крывая дарога ў чалавека разбэшчанага; а хто чысты, у таго ўчынкі пабожныя.
Крывы шлях чалавека нягоднага, а справы чыстага — простыя.
Лепей жыць у закутку на даху, чым са сварліваю жонкай у прасторным доме.
Лепей жыць у куце на даху, чым са сварліваю жонкаю ў прасторным доме.
Душа бязбожніка прагне ліхаты: ня знойдзе літасьці ў вачах яго і сябар ягоны.
Душа бязбожніка жадае зла, ня знойдзе [ласкі] ў вачах ягоных бліжні яго.
Калі караюць блюзьнера, просты робіцца мудрым; і калі настаўляецца на розум мудры, дык ён набывае веды.
Калі караюць насьмешніка, неразумны стаецца мудрэйшым, і калі мудрага вучаць, ён здабывае веданьне.
Праведнік назірае за домам бязбожніка: як упадаюць бязбожныя ў няшчасьце.
Разважае праведнік пра дом бязбожніка, як гінуць бязбожнікі ў ліхоцьці сваім.
Хто затуляе вуха сваё ад ляманту беднага, той і сам будзе лямантаваць — і ня будзе пачуты.
Хто вушы свае затыкае на крык убогага, той сам будзе клікаць, але ня будзе адказу.
Дарунак таемны тушыць гнеў, а дарунак запазуху — моцную лютасьць.
Падарунак таемны тушыць гнеў, а гасьцінец у заўлоньне — вялікую ярасьць.
Чыніць правасудзьдзе — радасьць праведніку і страх тым, хто нясе зло.
Правасудзьдзе — радасьць для праведніка і загуба для злачынцаў.
Чалавек, які зьбіўся з дарогі розуму, спачне ў зборні мёртвых.
Чалавек, што зьбіваецца са шляху розуму, супачы́не ў грамадзе́ памёршых.
Хто любіць весялосьць — зьбедніцца; і хто любіць віно і масьці — не разбагацее.
Хто любіць весяліцца, будзе ў няста́чы, а хто любіць віно і алей, ня будзе багатым.
Выкупам будзе за праведнага бязбожны, і за пабожнага — хітры.
Вы́купам за праведніка [будзе] бязбожнік, а за правага — ліхадзей.
Лепей жыць у зямлі пустэльнай, чым з жонкаю сварліваю і сярдзітаю.
Лепш жыць у зямлі пустыннай, чым з жонкай гняўлівай і сварлівай.
Жаданы скарб і масьць — у доме ў мудрага; а неразумны чалавек распускае іх.
Прывабныя скарбы і алей у жытле мудрага, а бязглузды чалавек змарнуе іх.
Хто трымаецца праўды і ласкі, знойдзе жыцьцё, праўду і славу.
Хто імкнецца да праведнасьці і міласэрнасьці, знойдзе жыцьцё, праведнасьць і славу.
Мудры ўваходзіць у горад моцных і руйнуе цьвярдыню іхняй надзеі.
Мудры ўвойдзе ў горад магутных і зрыне моц, у якой яны мелі пэўнасьць.
Хто беражэ вусны свае і язык свой, той асланяе ад бяды душу сваю.
Хто захоўвае вусны свае і язык свой, захоўвае душу́ сваю ад бедаў.
Пыхлівы злодзей — блюзьнер імя яму — дзее ў запале пыхі.
Свавольны і дзёрзкі, называны блюзьнерам, робіць усё ў шале нахабства.
Прагнасьць гультая заб’е яго, бо рукі ў яго адмаўляюцца працаваць;
Жаданьне гультая заб’е яго, бо ру́кі ягоныя адмаўляюцца працаваць.
кожны дзень ён моцна прагне, а праведнік дае і не шкадуе.
Кожны дзень ён жадае і прагне, а праведнік дае і не шкадуе.
Ахвяра бязбожных — агіднасьць, асабліва калі з хітрасьцю прыносяць яе.
Ахвяра бязбожнікаў — брыдота, тым больш тыя, якія складаюць яе з падступнасьцю.
Ілжывы сьведка загіне, а чалавек, які кажа, што ведае, будзе гаварыць заўсёды.
Сьведка хлусьлівы згіне, а чалавек, які слухае, будзе гаварыць заўсёды.
Чалавек бязбожны дзёрзкі тварам сваім, а праведны трымае проста шлях свой.
Чалавек бязбожны ўпарты абліччам сваім, а пра́вы разумее шлях свой.
Няма мудрасьці і няма розуму і няма вады — насуперак Госпаду.
Няма мудрасьці, і няма розуму, і няма ра́ды насуперак ГОСПАДУ.
Каня рыхтуюць на дзень бітвы, але перамога — ад Госпада.
Каня рыхтуюць на дзень бітвы, але перамога — ад ГОСПАДА.
