Ёва 26 разьдзел
Кніга Ёва
Пераклад Яна Станкевіча → Пераклад Васіля Сёмухі
І адказаў Ёў, і сказаў:
І адказваў Ёў і сказаў:
«Як ты памог нясілу, як выбавіў плячо нямоцнага!
як ты дапамог бясьсіламу, падтрымаў мышцу нямоглага!
Як ты парадзіў нямудраму і мудрых падумкаў шмат азнайміў!
Як раду ты даў ня мудраму і як ва ўсёй поўніцы растлумачыў!
Каму ты азнайміў гэтыя словы, і чый дых выходзіў зь Цябе?
Каму ты казаў гэтыя словы, і чый дух выходзіў зь цябе?
Рэфаімы дрыжаць пад водамі і жывучыя ў іх.
Рэфаімы трымцяць пад водамі, і тыя, што жывуць у іх.
Аголены шэоль перад Ім, і ня мае закрыцьця загуба.
Апраметная аголена прад Ім, і няма покрыва Авадону.
Ён расьцягнуў поўнач над пусьцінёю, павесіў зямлю на нічым.
Ён расхінуў поўнач над пустатою, павесіў зямлю ні на чым.
Ён зьвязуе воды ў булакох Сваіх, і булак ня ськепіцца пад імі.
Ён заключае воды ў аблоках Сваіх, і воблака не расьсядаецца пад імі.
Ён дзяржыць відзеньне пасаду, расьцягнуў над ім булак Свой.
Ён паставіў трон Свой, расхінуў над ім воблака Сваё.
Рысу правёў над зьверхам вады аж да граніцаў сьвятла зь цемняю.
Рысу правёў над паверхняю вады, да межаў сьвятла зь цемраю.
Стаўпы нябёс дрыжаць а жахаюцца ад вайцяньня Ягонага.
Слупы нябёсаў дрыжаць і жахаюцца ад грозьбы Ягонай.
Сілаю Сваёй сьцішыў мора і розумам Сваім паразіў Рагаба.
Сілаю Сваёю хвалюе мора і розумам Сваім змагае ягоную дзёрзкасьць.
Ветрам Ягоным нябёсы прыбраны; рука Ягоная схармавала ўцякаючага гада.
Ад духу Ягонага — цудоўнасьць неба; рука Ягоная ўтварыла борздага скарпіёна.
Вось, гэта часьці дарогаў Ягоных; і як мала мы чулі празь Яго! А гром магутнасьці Ягонае хто можа ўцяміць?»
Вось, гэта частка шляхоў Ягоных; і як мала мы чулі пра Яго! А гром магутнасьці Ягонай хто можа зразумець?
