Иоавъ мовил царю, абы престал плакати Авесалома. Людие паки прияша Давыда. Послал ест царь по колено Іюдино. Семей просит о милость. Мифивозеф стретил царя, и бысть брань племеном о цари.
1 Возвестиша же сее Іоаву, иже царь плачеть и жалуеть сына своего Авесалома.
2 a И обратися победное веселие въ плачь того дня всемъ людемъ, слышаша бо людие в той день, иже царь плачеть сына своего.
3 И уклонишеся вси, и не хотеша вниити во градъ в той день, якоже егда уклоняются бежащие з бою.
4 Царь же Давыдъ прикрилъ главу свою и возпи гласомъ великимъ, глаголя: «Сыну мой, Авесаломе! Авесаломе, сыну мой милый!»b
5 Тогда вниде Іоавъ къ царю в домъ и рече: «Посрамотилъ еси днесь лица всехъ слугъ твоих, ониже высвободили и соблюли живот твой и животъ всехъ сыновъ твоих, и дщеръ твоих, и женъ твоих, и меншиць твоихъ.
6 Любиши ненавидящих тебе и ненавидиши любящихъ тя. Ныне тое уведех, иже неласкавъ еси на воеводы своя и на слугы своя. Се, воистинну днесь позналъ есм, иже раднейший был бы еси тому, абы насъ всех погубили, токмо Авесалом самъ абы остал живъ.
7 Протож ныне въстань и выйди, и молвъ к людемъ веселе, и учини имъ досить. Иначей, се, присегаю тобе Господемъ Богомъ, естъли же не выйдеши к людемъ, не останеть с тобою ани един в сию нощъ, и будет тобе то горшее, нежли вси речи злыи, еже приходили суть на тя от младости твоея и до сего дня».
8 Тогда въсталъ естъ царь и сяде при вратахъ, и возвестиша всем людемъ, иже царь седить при вратех. Тогда прииде все множество людей предъ царя; мужи же Ізраилеви розбегошеся во грады своя.
9 И прехуся вся вся племена людей Ізраилевыхъ, глаголюще: «Царь Давыдъ избавилъ насъ от руку Филистымъскыхъ, и той высвободил насъ от всехъ враговъ нашихъ; и се, ныне мусилъ утечи из земли для Авесалома.
10 Авесаломъ пакъ, егоже помазали есмо были собе на ц[а] рство, в бои забитъ естъ. Сего ради доколе молчимо и медлимо и не приведемо възадъ царя?»
11 И прииде речь сия всего Ізраиля къ царю Давыду. Тогда послал ест царь Давыдъ къ Садоху и ко Авиафару, ереом, глаголя: «Речите къ старейшинамъ сыновъ Іюдиных, глаголюще: “Почто последнии хощете быти привести царя вашего в домъ свой?” Слова бо всего Ізраиля приходять къ царю, иже хотять и привести опять до дому его».
12 *И всказалъ ест царь к ним, глаголя: «Тако будете молвити от мене к людемъ Іюдинымъ:*c Братия моя, вы есте кость моя и тело мое есте; и почто ж хощете быти последнии къ уведению царя до земли его?
13 Амасе пакъ, воеводе Авесаломову, тако рците от мене: Се, ты еси кость моя и тело мое; сия да учинит ми Богъ и сия да приложить, естъли же не будешъ у мене воеводою надо всимъ войскомъ моимъ по вся дни живота моего на месте Іоавове!»
14 И наклонилъ естъ царь таковыми словы сердца всехъ людей Іюдиныхъ к собе, якобы серце единаго мужа; и послали суть по царя, глаголюще: «Навратися к намъ ты и вси отроци твои».
15 И навратился естъ царь Давыдъ, и приде къ Іоръдану. Вси же мужи Іюдины приидоша въ Галгалу стретити царя и превести его чересъ Іоръданъ.
16 Тогда поспешилъ естъ Семей, сынъ Ераовъd, сына Еминина, от Ваурима и изыйде с людми Іюдиными на стретение царю
17 съ тысещем мужей от племеня Веньа минова, и Сиба, рабъ от дому Саулова, съ пятнадесетми сынми своими и съ двадцетми отроки; и вступивши до Ерданя, шли суть пред царемъ бродомъ.
18 И перевели челядь цареву, и учинили по всемъ повелением его. И паде Семей предъ царем на лице свое на землю, егда ся был перепровадил Іоръданъ,
19 и рече к нему: «Господи мой, царю! Не имей ми за зло и ни воспоминай проступки раба твоего тое, внегда шолъ еси зъ Ерусалима,e и ниже держи сего на сердци своемъ;
20 се бо я ныне, рабъ твой, сознаваю грехъ мой, и протожъ въ первыхъ от всего дому Іосифова днесь пришолъ есми на стретение тобе, господину моему царю».
21 Тогда рече Ависай, сынъ Сарвиин: «Еда ли за таковые слова не имат забитъ быти Семей, онже злоречилъ естъ помазаннику Господьню?»
22 Рече Давыдъ: «Что мне и вамъ, сынове Сарвиины? Чему противитеся мне ныне и хощете, абы забитъ былъ днесь мужъ во Израили? Еда ли не знаете сего, иже я ныне якобы знову учиненъ есмъ царемъ надъ людми Израилевыми?»
23 И рече царь къ Семею: «Не умреши». И клялся ему о том.
24 Мифивозефъ теже, сынъ Енафинъ, сына Саулова, изыйде въ стретение царю, не умывши ногъ своихъ, и не острыгши брады своея, и не изоправши ризъ своих от того дня, в оньже вышолъ былъ царь изъ Ерусалима, даже и до того, в оньже паки навратился ест с миромъ.
25 И внегда стретился съ царемъ, рече ему царь: «Мифивозефе, чему не вышол еси былъ за мною?»
26 Онъже отвеща царю и рече: «Господине нашъ, царю! Рабъ мой Сиба погордел мною. Реклъ есми ему: “Оседлай мне осла, да еду за царемъ”, понеже хромъ есмъ на ноги рабъ твой.
27 И еще к тому обжаловалъ мене, раба твоего, предъ тобою, господиномъ моимъ царемъ. Но ты, господи мой царю, якобы ангелъ Божий еси;f учини, еже любо естъ пред очима твоима,
28 понеже и дом отца моего повинен былъ смерти пред господином моим царемъ, ты пак посадил еси мене, раба твоего, за столомъ своим, посреди всехъ пирующих за нимъ.g Сего для не имам с чего виноватити тебе и ниже могу к тому вопияти на господина моего царя».
29 И рече к нему царь: «Что дармо глаголеши? Вже естъ утвержено, еже рекохъ: ты а Сиба розделите наполы имение».
30 Тогда отвеща Мифивозефъ царю: «Да и все имение возметь Сиба, не жаль ми того, егда господинъ мой царь навратился естъ с миромъ в домъ свой».
31 Берзелай пакъ Галаадицкийh, старый вельми, от Роелима, онже был первей перевезъ царя черес Іоръданъ и готовъ былъ съ царемъ и далей ити,
32 и был естъ той Берзелай велми старый, яко во осмидесяти летехъ, и той додавал естъ царю спижи, внегда стояше з войскомъ вне, былъ бо естъ мужъ богатый велми.
33 И рече царь къ Берзелаеви: «Пойди со мною, и будешъ отпочивати безъ страху въ Ерусалиме».
34 Отвеща же Берзелай къ царю: «Азъ толико летъ имамъ, быхъ пакъ ишолъ съ царем.
35 У восмидесяти летехъ есми днесь, еда ли я могу розознати во встехъ моих, что естъ сладкого или что ест горкого. Могу ли ся тежъ я, рабъ твой, кохати в потравахъ или в питьяхъ царскихъ и послухати гудебъ и певцовъ царевыхъ? К чему ж быхъ былъ у господина моего царя? Толико къ обтяжению его.
36 Мало далей еще да выпровадить тебе рабъ твой за Еръданъ. Не требую я, господине мой царю, отдания сего,
37 но молю ти ся, да навратится рабъ твой в домъ свой, и да умру во граде своемъ и погребуся подле гробу отца моего и матки моея. И се естъ рабъ твой, Хамаанъ, сынъ мой, да идеть с тобою, господине мой царю, и учини ему добро, якоже любо тобе будеть».
38 И рече к нему царь: «Да идеть тогда со мною Хамаанъ, и уделаю ему добро, якоже ты усхощеш; и все, елико пожадаеши от мене, дамъ тобе».
39 Внегда же прейдоша вси людие Іоръдан, и царь с ними, постояли суть. И поцаловал ест царь Берзелая, и благослави и, и навратися Берзелай в домъ свой.
40 Царь же Давыдъ иде въ Галгалу, и Хамаанъ с нимъ. И приведоша царя назадъ вси людие Іюдины, мужей же Ізраилевых не было с ними, толко половица.
41 Тогда потомъ собравъшися вси мужи Ізраилевы къ царю, рекли суть ему: «Чему тебе украдоша братия наша, сыны Іюдины, и перепровадиша царя и домъ его чересъ Іоръданъ, и всехъ мужей, иже беша с ним?»
42 И отвещаша вси сыны Іюдины къ мужемъ Ізраилевым: «Понеже близший ест намъ царь, нежели вамъ. И чему ж про сее гневаетеся? Еда ли нам пришло что от царя ясти или пити, или дары неякии дал ли намъ?»
43 И рекоша мужи Ізраилевы къ сыномъ Іюдинымъ: «Вдесятеро насъ болши естъ у царя, нежели васъ, и мы есмо первороженныи, а прото болей прилежить к намъ царь, нежли к вамъ. Прочто есте намъ кривду уделали и не поведели напредъ, абыхомъ теже были с вами привели царя?» Сынове пакъ Іюдины твердую отповедь дали суть мужемъ Ізраилевымъ.
a Ераміі, 48.
b Ad marginem: Выше, 18[:33].
c Тэкст паміж зорачкамі адсутнічае як у ЦСБ, так і ў Вульгаце.
d 3 Царстваў, 2[:8].
e Ad marginem: Выше, 16[:10].
f Ad marginem: Выше, 14[:17]; Эсфіры, 15[:16].
g Ad marginem: Выше, 9[:7].
h 3 Царстваў, 2[:7].
Знайшлі памылку ў тэксце? Вылучыце яе і націсніце:
Ctrl + Enter
Вторыи Царствъ, 19 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.