Вторы Царствъ 23 Вторыи Царствъ 23 разьдзел

¹ Сия суть слова последняя, еже глаголал естъ Давыдъ, сынъ Іесеовъ; рече мужъ, емуже заслюбено естъ о Христе, Бога Іяковля, избранный гудець псалмов в людехъ Ізраилевыхъ:

² «Духъ Господень молвилъ естъ мною, и слово Его языком моимъ глагола.

³ Богъ Ізраилевъ мне глаголалъ естъ: “Силный Ізраилевъ, онъже владееть надъ людми, справедливый, онже обладает в боязни Божией, —

⁴ яко светъ зори, егда усходить солнце рано безъ мрачности, и яко для дождя ростеть трава от земли”.

⁵ А ниже естъ таково племя мое и домъ предъ Богом, абы со мною учинилъ смолву вечную и во всехъ речахъ крепкую и утверженую? Все воистинну спасение мое и вся воля моя от Него, а ниже естъ что во мне, ежебы с Него не пошло.

⁶ Грешници же вси изторгнены будуть, яко терние, егоже не могуть в руце взяти;

⁷ пакли же кто усхощеть доткнутися его, мусить приступити в зелезных рукавицахъ съ оружиемъ и огнем спалити е даже въ попел...»

⁸ Сия имена были мужемъ силнымъ, воемъ Давыдовым. Давыдъ седяй на престоле царскомъ наймудрейший, князь же межи треми найсильнейшими былъ естъ Есваанъ: той былъ якобы наймладъший червякъ древа, онъже осмъсотъ мужей поразилъ естъ единымъ гнаниемъ.

⁹ По томъ Елиазаръ, сынъ дяди Давыдова, Агоитский, межи треми найсильнейшими, онъже былъ естъ съ Давыдомъ, егда ругалися Филистымляне войску Ізраилеву и зъехалися были к бою;

¹⁰ и внегда сынове Ізраилеви изыйдоша на брань, сталъ естъ Елиазаръ на спици и билъ естъ Филистымлянъ, доколе могъ руками и мечемъ рушати. И учинилъ ест Господь спасение великое в той день, и людие Ізраилевы, иже были утекли предъ Филистымляны, навратилися воспять и побрали с побитыхъ зброю и користь многу.

¹¹ По сем же Елиазарови былъ естъ третий найсильнейший воинъ, именем Семмай, сынъ Аггеевъ от Арары; собралися бо были опят Филистымляне на становища своя, и было ту поле, посеяно сочевицею. И егда побегоша людие Ізраилевы предъ Филистымляны,

¹² сталъ естъ той воинъ Семмаа посреде поля и боронилъ имъ, и поразилъ Филистымлянъ. И учинилъ естъ Господь Богъ избавление великое людемъ Ізраилевымъ в той день.

¹³ Предъ тымъ теже были иныи три мужи силънии выбраны от тридцети, ониже были пришли къ Давыду во время жатвы до пещеры Одолямъски; войско же Филистымское лежало того часу в долине Волотовъ,

¹⁴ а Давыдъ былъ на осторожи, и станы Филистымъския были тогда около Вифлеома.

¹⁵ И захотелося Давыдови велми пити воды от кладезя, иже былъ естъ въ Вефлиоме, и рече Давыдъ: «О, абы ми кто далъ напитися воды от того кладезя, иже естъ у Вефлиоме во вратахъ!»a

¹⁶ И тогда сии три мужи, силнии его, пробившися скрозе войско филистымское, набрали суть воды от кладезя того, еже былъ естъ во Вефлиоме у вратъ, и принесли ю къ Давыду. А онъ не восхотелъ пити ея, но принесе ю и излия предъ Господемъ Богомъ,

¹⁷ глаголя: «Не дай ж ми того милостивый Богъ, абыхъ ю пилъ, понеже сии мужи выдали были животы своя для ее на погибель, и тако пилъ быхъ ю въместо крови ихъ». И для того не хотелъ естъ Давыдъ пити воды тое. И сее учинили сут три воини его пресилнии.

¹⁸ Ависай пакъ, братъ Іоавовъ, сынъ Сарвиинъ, былъ воинъ единъ от тыхъ трех мужей силныхъ; то ест той Ависай, онже воздвиже копие свое противу тремъстомъ мужей и поразилъ ихъ;

¹⁹ сей славнейший и болший былъ ест межи тыми треми силными воины, и былъ над ними якобы князь, но к тым первым тремъ найсильнейшимъ воином не прировнался.

²⁰ И Ваания, сынъ Іоадовъ, мужа пресилнаго чюдных делъ от Капселя, той убилъ дву мужей Моавъскихъ силъныхъ, якобы львовъ, и онъ теже ступилъ и забил лютого посреди ямы, егда былъ снегъ великий.

²¹ Онъ также убилъ естъ мужа Египтянина, мужа велми дивнаго: той имеаше в рукахъ своихъ копие, Ваания же прииде к нему с кийкомъ, и выкрутилъ моцию своею копие з руку Египтянина, и забилъ и его жъ копиемъ.

²² Сее учинилъ естъ Вааниа, сынъ Іоадовъ. И сей теже был славный межи треми мужми силъными,

²³ ониже были выбраны от тридцети силныхъ, но не былъ естъ тако силный, яко первыи найсильнейшии три воины Давыдовы. И уделалъ ест его Давыдъ собе тайнымъ советником уха своего.

²⁴ Имена пакъ тыхъ мужей силных, ихъже имел естъ царь Давыдъ тридцеть и седмъ, сия суть: Азаель, братъ Іоавовъ, межи тридцетми мужми; Елиананъ, сынъ дяди царя Давыдова, от Вифлеома;

²⁵ Саммаа от Арарыи; Елихавъ от Ародия;

²⁶ Гелиисъ от Фальтии; Гиран, сынъ Акциесовъ, от Фекуя;

²⁷ Авиезеръ от Анатота; Мовонай от Узаты;

²⁸ Селмонъ Агоитскый; Махарай Метофацскый;

²⁹ Елефъ, сынъ Ваанасовъ, и той теже Метофацский; Ифай, сынъ Риваевъ, зъ Евеха от сыновъ Веньаминовыхъ;

³⁰ Ванай Фаратоницский; Гельдай от потоку Гааса;

³¹ Ави-Атонъ Арбахитский; Азамавефъ от Веронима;

³² Елиава от Савонима; сынове Ясенови два — Енатанъ и Наранъ; 33 Самманъ з Нороды; Гаианъ, сынъ Сараевъ; Иаранъ Арохитский;

³⁴ Елефелехъ, сынъ Аазваевъ, сына Махациова; Гелиам, сынъ Ахитофелевъ, Елоницский;

³⁵ Есрай з Кармелю; Фарай от Арбия;

³⁶ Гааль, сынъ Нафанов, от Совая; Вомней з Гаддия;

³⁷ Сеилехъ зъ Аммона; Нарай Верохитскый, мужъ, носящий оружие Іоавово, сына Сарвиина;

³⁸ Гирай Етрейский; Гаребъ, онъ теже Етрейский;

³⁹ Урия Еффейский. Всехъ сихъ мужей силныхъ было естъ тридцеть и седмъ.