Вторы Царствъ 4 Вторыи Царствъ 4 разьдзел

¹ Зведалъ же естъ Езвозефъ, сынъ Саулов, яко убиенъ бысть Авенеръ въ Хевроне, и улякнулся, и спустил руце свое, и вси людие Ізраилевы засмутилися суть.

² И беста тогда два властелина надъ разбойниками съ сыномъ Сауловымъ; имя единому — Ванаа, и другому — Рехавъ, сынове Реммоновы Верофитскаго, от поколения Веньаминова,a понеже і градъ Верофъ причтенъ естъ межи поколение Веньаминово.

³ И утекоша Верофитяне въ Гефаимъ, и быша тамъ приходы даже до того часу.

⁴ Былъ же ест Енафе, сыну Саулову, сынъ хромый ногами, понеже въ пяти летехъ былъ естъ, внегда прибежалъ посолъ з войска Ізраилева, поведаючи, иже убитъ естъ Саулъ и Енафа, и взявши и, пестунья его бежала с ним, и егда поспешала, утекаючи, упала естъ и зламала ему ногу, и охроме отроча, емуже имя бе Мифивосеф.

⁵ Тогда пришедъше сынове Реммонови Верофитъскаго, Рехавъ и Ванаа, вниидоша ополудни в домъ Езвозефовъ, онже в то время спаше на ложи своем; и вратная дому его, опалаючи пшеницу, уснула была.

⁶ И вземъши по снопу пшеници, вошли суть во храмину тайне и проклали и в дыменаb Рехавъ и Ванаиc, братъ его.

⁷ Внегда бо вошли были в домъ, и се, Езвозефъ спаше на ложи своем во храмине; они же, ранивши, забили суть и, и вземши главу его, шли путемъ по пустыни всю нощь тую.

⁸ И принесоша главу Езъвозефову къ Давыду въ Хеврон, и рекоша къ царю: «Се глава Езвозефова, сына Саулова, врага твоего, онже искалъ естъ безглавия твоего; и далъ ест Господь Богъ господину нашему царю отмщение днес надъ Сауломъ и надъ семенемъ его».

⁹ Отвеща же Давыдъ Рехаву и Ванаи, брату его, сыном Реммона Варофитскагоd, и рече: «Живъ естъ Господь, Онъже изорвалъ душу мою от всего злого!

¹⁰ Понеже того онъ мне тую новину поведилъ, иже убитъ ест Саулъ, и мнелъ, ижбы ми ся тымъ полюбилъ. Азъ иняхъ и убихъ и во граде Сицелеху, емуже мусилъ есми дати даръ за новину;

¹¹ многымъ более тута ныне, иже людие злии убили суть мужа невиннаго в дому на ложи его, где спаше. Прото възыщу крови его от руку ваших и погублю васъ от земля».

¹² И повеле Давыдъ слугамъ своимъ, и убили суть их, а объсекавши руце и нозе имъ, повесиша е надъ рибникомъ въ Хевроне. Главу же Езвозефову, вземше, похоронили ю во гробе Авенерове въ Хевроне.