Ёва 11 разьдзел
Кніга Ёва
Пераклад Антонія Бокуна → Пераклад Васіля Сёмухі
І адказаў Цафар з Наамы, і сказаў:
І адказваў Сатар Нааміцянін і сказаў:
«Ці ж таму, хто шмат гаворыць, нельга адказаць, або ці чалавек гаваркі апраўдаецца?
хіба на мноства слоў нельга даць адказу, і хіба чалавек шматслоўны мае рацыю?
Ці ж пустая гаворка твая прымусіць людзей маўчаць, і ня будзе каму асароміць цябе?
Пустаслоўе тваё ці ж прымусіць маўчаць мужоў, каб ты глуміўся, і ня было каму прысароміць цябе?
Бо ты сказаў: “Слушная рада мая, і чысты я ў вачах Тваіх”.
Ты сказаў: меркаваньне маё правільнае, і чысты я ў вачах Тваіх.
Але калі б Бог прамовіў слова, і адкрыў вусны Свае да цябе,
Але калі б Бог загаварыў і растуліў вусны Свае дзеля цябе
і адкрыў табе таямніцы мудрасьці, што вышэй за ўсякае разуменьне! І ты даведаешся, што Бог забыўся пра беззаконьні твае.
і адкрыў табе таямніцы мудрасьці, што табе ўдвая больш належала перацерпець! Дык вось ведай, што Бог дзеля цябе некаторыя з тваіх беззаконьняў аддаў забыцьцю.
Ці можаш ты сьцяміць глыбіні Божыя, і ці можаш дайсьці да межаў Усемагутнага?
Ці можаш ты дасьледаваньнем знайсьці Бога? Ці можаш цалкам спасьцігнуць Усеўладнага?
Бо Ён — вышэйшы за неба, і што ты зробіш? Ён — глыбейшы за пекла, і як ты нешта будзеш ведаць?
Ён вышэйшы за нябёсы, — што можаш зрабіць? глыбейшы за апраметную, — што можаш даведацца?
Даўжэйшая за зямлю мерка Ягоная і шырэйшая за мора.
Даўжэйшая за зямлю мера Ягоная і шырэйшая за мора.
Калі Ён праходзіць, хто Яго спыніць? Калі ставіць на суд, хто запярэчыць Яму?
Калі Ён прыйдзе і замкне каго-небудзь у кайданы і паставіць на суд, дык хто адхіліць Яго?
Бо Ён ведае марнасьць чалавечую і бачыць злачынствы, і ўсё заўважае.
Бо Ён ведае людзей манлівых і бачыць беззаконьне, і ці ж пакіне яго без увагі?
І чалавек пусты стане разважлівым, хоць і нараджаецца ён, як асёл дзікі.
Але пусты чалавек мудруе, хоць чалавек нараджаецца падобна дзікаму асьляняці.
Калі ты ўмацуеш сэрца тваё і да Яго ўзьнясеш рукі твае,
Калі ты ўправіш сэрца сваё і працягнеш да Яго рукі твае,
калі беззаконьне, што ў руцэ тваёй, ты адкінеш і ня будзе месца няпраўдзе ў намёце тваім,
і калі ёсьць загана ў руцэ тваёй, а ты выдаліш яе і не дасі беззаконьню жыць у намётах тваіх,
тады ты падымеш аблічча тваё без правіны, і будзеш моцны, і ня будзеш баяцца.
дык падымеш незаплямлены твар твой і будзеш цьвёрды і ня будзеш баяцца.
Бо ты забудзешся на гора тваё, і ўзгадаеш пра яго, як пра дождж, што мінуў.
Тады забудзеш гора: як пра ваду, што працякла, будзеш успамінаць пра яго.
І жыцьцё тваё будзе як сьвятло апоўдні, і цемра заясьнее, як сьвітаньне.
І ясьней за полудзень пойдзе жыцьцё тваё; прасьветлішся, як раніца.
І будзеш ты пэўны, бо маеш надзею, і глянеш наўкола, і будзеш спаць спакойна.
І будзеш спакойны, бо ёсьць надзея; ты аслонены і можаш спаць у бясьпецы.
Будзеш адпачываць, і ніхто ня будзе палохаць цябе, і многія будуць шукаць аблічча твайго.
Будзеш ляжаць, і ня будзе застрашніка, і многія будуць ласьціцца да цябе.
А вочы бязбожных сасьлепнуць, і ня будуць яны мець прытулку, і надзея іхняя — стогн душы».
І вочы беззаконьнікаў растануць, і прыстанішча прападзе ў іх, і надзея іхняя шчэзьне.
