Ёва 35 разьдзел
Кніга Ёва
Пераклад Антонія Бокуна → Пераклад Васіля Сёмухі
І адказаў Элігу, і сказаў:
І гаварыў далей Эліуй і сказаў:
«Што ты лічыш слушным, калі ты сказаў: “Праведнасьць мая большая, чым у Бога”?
ці лічыш ты справядлівым, што сказаў: «я праўдзівейшы за Бога»?
Бо ты сказаў: “Што за карысьць мне і што я атрымаю з гэтага, чым калі б я грашыў?”
Ты сказаў: «якая карысьць мне? і які прыбытак я меў бы перад тым, як калі б я і грашыў?»
Я адкажу табе словамі, і сябрам тваім з табою.
Я адкажу табе і тваім сябрам з табою:
Паглядзі на неба і пабач; паглядзі на аблокі, яны вышэйшыя за цябе.
зірні на неба і глядзі; падзівіся на воблакі, яны вышэй за цябе.
Калі ты саграшыш, што зробіш ты Яму? І калі грахі твае памнажаюцца, чым ты зашкодзіш Яму?
Калі ты грэшыш, што робіш ты Яму? і калі злачынствы твае памнажаюцца, што прычыняеш ты Яму?
А калі будзеш праведны, што дасі Яму? Або што Ён атрымае з рукі тваёй?
Калі ты справядлівы, што робіш Яму? альбо што атрымлівае Ён з рукі тваёй?
Чалавеку, падобнаму да цябе, ліхота твая [шкодзіць], а праведнасьць твая [патрэбна] сыну чалавечаму.
Бязбожнасьць твая ў чалавеку, як ты, і справядлівасьць твая ў сыне чалавечым.
Ад мноства прыгнятальнікаў яны галосяць, з прычыны [цяжкага] рамяна моцных.
Ад мноства прыгнятальнікаў стогнуць прыгнечаныя і ад рукі моцных лямантуюць;
Але [ніхто] ня кажа: “Дзе ж Бог, Які стварыў мяне, Які дае сьпевы ўначы,
але ніхто ня кажа: дзе Бог, творца мой, Які дае песьні ўначы,
Які вучыць нас болей, чым жывёлаў зямных, і больш, чым птушак нябесных, робіць нас мудрымі?”
Які вучыць нас больш, чым жывёл зямных, і настаўляе на розум нас болей, чым птушак нябесных?
Там яны лямантуюць, але Ён не адказвае ім з прычыны пыхлівасьці злачынцаў.
Там яны лямантуюць, і Ён не адказвае ім, з прычыны гонару ліхіх людзей.
Толькі марноты ня слухае Бог і ня бачыць Усемагутны.
Але няпраўда, што Бог ня чуе і Ўсеўладны не глядзіць на гэта.
Хоць ты сказаў, што ня бачыш Яго, разгляд [справы] — перад абліччам Ягоным, і ты чакай на Яго.
Хоць ты сказаў, што ты ня бачыш Яго, але суд прад Ім, — чакай яго.
І цяпер, калі не палае гнеў Ягоны, Ён не зважае зашмат на нягоднасьць.
А сёньня, таму што гнеў Ягоны не наведаў яго і ён не спазнаў яго ва ўсёй строгасьці,
Надарма Ёў адчыніў вусны свае і множыць прамовы бяздумныя».
Ёў і адкрыў лёгкадумна вусны свае і безразважна раскідае словы.
