Лукаша 9 разьдзел

 

 

І склікаўшы дванаццаць, даў ім сілу і ўладу над усімі дэманамі, і лекаваць ад хваробаў,

 

Паклікаўшы ж усіх дванаццацёх, даў ім моц і ўладу над усімі чартамі і аздараўляць ад хворасьцяў.

і паслаў іх зьвеставаць Царства Божае і ацаляць хворых

 

І паслаў іх навучаць аб Царстве Божым і аздараўляць хворых.

і сказаў ім: нічога не бярэце ў дарогу: ні кія, ні торбы, ні хлеба, ні срэбра, і ня майце па дзьве вопраткі;

 

І сказаў ім: нічога не бярэце на дарогу; ні кія, ні торбы, ні хле́ба, ні срэбра, і каб двух вопратак ня ме́лі;

і ў які дом увойдзеце, там заставайцеся і адтуль выпраўляйцеся ў дарогу;

 

і ў які дом увойдзеце, там заставайцеся і стуль ідзе́це ў дарогу;

а калі дзе ня прымуць вас, дык, выходзячы з горада таго, абцярушэце і пыл з вашых ног у сьведчаньне на іх.

 

і калі дзе́ ня прымуць вас, то, выходзячы з таго ме́ста, абтрасе́це і пыл з ног вашых у сьве́дчаньне на іх.

Яны пайшлі і праходзілі селішчамі, зьвястуючы і ацаляючы ўсюды.

 

І, пайшоўшы, праходзілі па сёлам, апавядаючы эвангельле і ўсюды аздараўляючы.

Дачуўся Ірад тэтрарх пра ўсё, што рабіў Ісус, і зьдзіўляўся: бо адны казалі, што гэта Ян паўстаў зь мёртвых;

 

Ірад жа чацьвертаўладнік чуў пра ўсё, што дзе́ялася ад Яго, і ня це́міў: бо адны казалі, што гэта Іоан устаў з мёртвых;

другія — што Ільля зьявіўся; а тыя, што адзін з старавечных прарокаў уваскрэс.

 

другія, што Ільля зьявіўся, а іншыя, што адзін з старадаўных прарокаў уваскрос.

І сказаў Ірад: Яну я адцяў галаву; а хто Гэты, пра Якога я чую такое? І стараўся ўбачыць Яго.

 

І сказаў Ірад: Іоана я сьцяў; хто ж гэты, аб якім я чую такое? І стараўся ўбачыць Яго.

Апосталы, вярнуўшыся, расказалі Яму, што яны зрабілі; і Ён, узяўшы іх з Сабою, адасобіўся ў пустэльнай мясьціне, непадалёк ад горада, называнага Бэтсаідаю.

 

Апосталы, вярнуўшыся, расказалі Яму, што яны зрабілі, і Ен, узяўшы іх з Сабою, пайшоў самотна ў пустыннае ме́йсца ме́ста, называнага Віфсаідаю.

Але людзі, даведаўшыся, пайшлі за Ім: і Ён, прыняўшы іх, гутарыў зь імі пра Царства Божае і ацаляў тых, каму было патрэбнае ацаленьне.

 

Але народ, даве́даўшыся, пайшоў за Ім; і Ен, прыняўшы іх, вёў з імі гутарку аб Царстве Божым і, каму гэтага трэба было, аздараўляў.

А дзень пачаў хіліцца да вечара. І прыступіўшы да Яго, дванаццаць казалі Яму: адпусьці людзей, каб яны пайшлі ў навакольныя селішчы і вёскі начаваць і дасталі ежы; бо што мы тут у пустэльнай мясьціне.

 

Калі ж дзе́нь зачаў зыходзіць, дык прыступілі да Яго дванаццаць і гаварылі Яму: адпраў народ, каб яны пайшлі ў вакалічныя сёлы і вёскі начаваць і дасталі е́сьці, бо мы тут у пустым ме́йсцы.

Але Ён сказаў ім: вы дайце ім есьці. Яны сказалі: у нас няма больш за пяць хлябоў і дзьве рыбіны; хіба што, нам трэба пайсьці купіць ежы на ўвесь гэты люд.

 

Але Ен сказаў ім: вы дайце ім е́сьці. Яны сказалі; у нас няма бале́й за пять хлябоў і дзьвюх рыб; хіба нам пайсьці купіць е́жы для ўсіх гэтых людзе́й?

Бо іх было каля пяці тысяч чалавек. Але Ён сказаў вучням Сваім: пасадзеце іх радамі па пяцьдзясят.

 

Бо іх было каля пяцёхтысячаў душ. Але Ен сказаў вучням Сваім; рассадзіце іх радамі па пяцьдзесят.

І зрабілі так, і пасадзілі ўсіх.

 

І ўчынілі так, і рассадзілі ўсіх.

А Ён, узяўшы пяць хлябоў і дзьве рыбіны і паглядзеўшы на неба, дабраславіў іх, пераламаў і даў вучням, каб раздаць людзям.

 

Ен жа, узяўшы пяць хлябоў і дзьве́ рыбы і паўзіраўшыся ў не́ба, багаславіў іх, паламаў і даў вучням, каб раздалі народу.

І елі і наеліся ўсе: і рэшты кавалкаў набралася ў іх дванаццаць кашоў.

 

І е́лі і насыціліся ўсе́; і набралі недае́дкаў дванаццаць карабоў.

Аднаго разу, калі Ён маліўся ў адасобленым месцы, вучні былі зь Ім, Ён спытаўся ў іх: за каго ўважаюць Мяне людзі?

 

І сталася, як маліўся самотна, і вучні былі з Ім, Ен спытаўся ў іх: за каго лічыць Мяне́ народ?

Яны сказалі ў адказ, за Яна Хрысьціцеля, а некаторыя — за Ільлю: а іншыя кажуць, што адзін з старавечных прарокаў уваскрэс.

 

Яны сказалі ў адказ: за Іоана Хрысьціцеля, а іншыя за Ільлю; другія ж кажуць, што адзін з старадаўных прарокаў уваскрос.

А Ён спытаўся ў іх: а вы за каго ўважаеце Мяне? Адказаў Пётр: за Хрыста Божага.

 

Ен жа спытаўся ў іх: а вы за каго лічыце Мяне́? І адказаў. Пе́тр: за Хрыста Божага.

Але Ён строга загадаў ім нікому не казаць пра гэта,

 

Але Ен строга загадаў ім нікому не гаварыць аб гэтым,

сказаўшы, што Сын Чалавечы мае шмат адпакутаваць, і быць адкінутым старэйшынамі, першасьвятарамі і кніжнікамі, і быць забітым, і на трэйці дзень уваскрэснуць.

 

сказаўшы, што Сын Чалаве́чы мусіць многа выцярпець мук; і адцураюцца ад Яго старэйшыны, архірэі і кніжнікі, і будзе забіты і на трэці дзе́нь уваскрэсьне.

А да ўсіх прамовіў: калі хто хоча ісьці за Мною, адрачыся ад сябе і вазьмі крыж свой і ідзі за Мною;

 

Да ўсіх жа сказаў: калі хто: хоча йсьці за Мною, няхай адрачэцца ад самога сябе́, няхай возьме крыж свой і йдзе́ за Мною.

бо, хто хоча душу сваю захаваць, той страціць яе: а хто страціць душу сваю дзеля Мяне, той захавае яе,

 

Бо хто хоча душу сваю спасьці, загубіць яе́; а хто загубіць душу сваю дзеля Мяне́, той спасё яе́.

бо што карысьці чалавеку здабыць увесь сьвет, а сябе самога загубіць, альбо пашкодзіць сабе?

 

Бо якая карысьць чалаве́ку здабыць уве́сь сьве́т, а сябе самога загубіць, ці пашкодзіць сабе́?

бо хто пасаромеецца Мяне і Маіх слоў, таго Сын Чалавечы пасаромеецца, калі прыйдзе ў славе Сваёй і Айцовай і сьвятых анёлаў.

 

Бо хто паўстыдаецца Мяне́ і Маіх слоў, таго Сын Чалаве́чы паўстыдаецца, калі прыйдзе ў славе Сваёй і Айца і сьвятых Ангелаў.

Кажу бо вам па праўдзе: ёсьць сярод тых, што стаяць тут, такія, якія ня зьведаюць сьмерці, а ўжо ўгледзяць Царства Божае.

 

Праўду кажу вам: ёсьць некаторыя з тых, што тут стаяць, якія не спазнаюць сьме́рці, пакуль ня ўбачуць Царства Божага.

Пасьля гэтых словаў, дзён праз восем, узяўшы Пятра, Яна і Якава, узыйшоў Ён на гару памаліцца.

 

Сталася ж дзён праз восем пасьля слоў гэтых, узяўшы Пятра, Іоана і Якава, узыйшоў Ен на гару памаліцца,

І калі маліўся, выгляд аблічча ў Яго зьмяніўся, і вопратка ў Яго зрабілася белая, бліскучая.

 

і сталася, як Ен маліўся, выгляд аблічча Яго зьмяніўся, і вопратка Яго сталася бе́лая, блішчастая.

І вось, два мужы гутарылі зь Ім, якія былі Майсей і Ільля:

 

І вось двое людзе́й гутарылі з Ім, а былі гэта Майсе́й і Ільля:

зьявіўшыся ў славе, яны казалі абодва пра зыход Ягоны, які яму належала зьдзейсьніць у Ерусаліме.

 

зьявіўшыся ў славе, яны гаварылі аб сьме́рці Яго, што ме́ўся споўніць у Ерузаліме.

Пётр і астатнія зь ім змораныя былі сном: але прачнуўшыся, угледзелі славу Ягоную, і двух мужоў, што стаялі зь Ім.

 

Пётр жа і быўшыя з Ім былі апанаваны сном; прабудзіўшыся ж, убачылі славу Яго, і двох мужаў, стоячы з Ім.

І калі яны адыходзілі ад Яго, сказаў Пётр Ісусу: Настаўнік! добра нам тут быць: зробім тры палаткі, адну Табе, адну Майсею і адну Ільлю, — ня ведаючы, што казаў.

 

І калі тыя адыходзілі ад Яго, сказаў Пётр Ісусу: Настаўнік! добра нам тут быць: зробім тры палаткі: адну Табе́, адну Майсе́ю і адну Ільлі, — ня ве́даючы, што кажа.

Калі ж ён казаў гэта, наплыло воблака і асланіла іх; і спалохаліся яны, калі ўвайшлі ў воблака.

 

Калі ж ён гаварыў гэтае, сталася хмара і агарнула іх; і перепалохаліся, як увайшлі ў хмару.

І быў з воблака голас, які мовіў: Гэты ёсьць Сын Мой Любасны; Яго слухайце.

 

І быў з хмары голас гаворачы: Гэты ёсьць Сын Мой улюблены; Яго слухайце.

Калі быў гэты голас, застаўся Ісус адзін. І яны змоўчалі і нікому не казалі ў тыя дні пра тое, што бачылі.

 

І калі быў голас гэты, апынуўся Ісус адзін. І яны маўчалі і нікому не гаварылі ў тыя дні, што бачылі.

А на другі дзень, калі яны сыйшлі з гары, сустрэла Яго шмат людзей.

 

І сталася назаўтрае, як яны зышлі з гары, сустрэла Яго вялікае множства народу.

Раптам нехта зь людзей усклікнуў: Настаўнік! малю Цябе зірнуць на сына майго, ён адзін у мяне:

 

І вось не́йкі чалаве́к з народу крыкнуў: Вучыцель: малю Цябе́! Глянь на сына майго; ён адзін ў мяне́:

яго вярэдзіць дух, і ён раптам ускрыквае, і курчыць яго, так што пускае пену; і ледзьве адступае ад яго, змучыўшы яго;

 

і вось дух бярэ яго, і ён ураз жа крычыць, і ірве́ць яго з пе́най; і ле́дзь адступае ад яго, змучыўшы яго;

я прасіў вучняў Тваіх выгнаць яго, і яны не маглі.

 

я прасіў вучняў Тваіх выгнаць яго; і яны не маглі.

А Ісус адказваючы, сказаў: о род няверны і разбэшчаны! дакуль буду з вамі і буду цярпець вас? прывядзі сюды сына твайго.

 

Ісус жа адказваючы сказаў: о, род няве́рны і распусны! дакуль буду з вамі і буду цярпе́ць вас? Прывядзі сюды сына твайго.

І калі той яшчэ ішоў, дэман кінуў яго на зямлю і пачаў калаціць; але Ісус загразіў нячыстаму духу, і ацаліў падлетка, і аддаў яго бацьку ягонаму.

 

Калі ж той яшчэ йшоў, дух кінуў яго і затрос; але Ісус прыкрыкнуў на нячыстага духа і аздаравіў хлопца, ды аддаў яго бацьцы яго.

І ўсе зьдзіўляліся зь велічы Божай. А калі ўсе зьдзіўляліся з усяго, што гаварыў Ісус, Ён сказаў вучням Сваім:

 

І ўсе́ дзівіліся ве́лічы Божай. Калі ж усе́ дзівіліся ўсяму, што чыніў Ісус, Ен сказаў вучням Сваім:

пакладзеце вы сабе ў вушы словы гэтыя: Сын Чалавечы будзе аддадзены ў рукі чалавечыя.

 

палажэце сабе́ ў вушы словы гэтыя: Сын Чалаве́чы будзе выданы ў рукі чалаве́чыя.

Але яны не зразумелі слова гэтага, і яно было замкнута ад іх, так што яны ня ўцямілі яго; а спытацца ў Яго пра гэтае слова баяліся.

 

Але яны не зразуме́лі слова гэтага, і яно было закрыта ад іх, каб яны ўцямілі яго; а папытацца ў Яго пра гэтае слова баяліся.

І прыйшло ім на думку: хто б зь іх быў большы?

 

Прыйшла ж ім думка: хто б з іх быў большы?

А Ісус, бачачы помысел сэрца іхняга, узяўшы дзіця, паставіў яго перад Сабою

 

Ісус жа, бачучы помыслы іх сэрца, узяўшы дзіцё, паставіў яго перад Сабою

і сказаў ім: хто прыме гэтае дзіця ў імя Маё, той Мяне прымае; а хто прыме Мяне, той прымае Таго, Хто паслаў Мяне; бо, хто з вас найменшы за ўсіх, той будзе вялікі.

 

і сказаў ім: хто прыйме гэтае дзіцё у імя Маё, той Мяне́ прыйме, а хто прыйме Мяне́, той прыйме Паслаўшага Мяне́; бо хто з вас ме́ншы за ўсіх, той будзе вялікі.

Пры гэтым Ян сказаў: Настаўнік! мы бачылі чалавека, які імем Тваім выганяе дэманаў, і забаранілі яму, бо ён ня ходзіць з намі.

 

Пры гэтым Іоан сказаў: Настаўнік! мы бачылі чалаве́ка, іме́ньнем Тваім выганяючага чартоў, і забаранілі яму, бо ён ня ходзіць з намі.

Ісус сказаў яму: не забараняйце; бо хто ня супроць вас, той за вас.

 

І сказаў яму Ісус: не забараняйце; бо хто, ня проці вас,той за вас.

А калі набліжаліся дні ўшэсьця Ягонага ад людзей, Ён захацеў ісьці ў Ерусалім,

 

І сталася, як набліжаліся дні забраньня Яго, умацавалася аблічча Яго ісьці ў Ерузалім,

і паслаў вястуноў перад абліччам Сваім: і яны пайшлі і ўвайшлі ў селішча Самаранскае, каб падрыхтаваць для Яго;

 

і паслаў пасланцоў прад абліччам Сваім; і яны пайшлі і ўвайшлі ў сяло Самаранскае, каб прыгатаваць для Яго;

але там ня прынялі Яго, бо Ён меў выгляд вандроўніка ў Ерусалім.

 

але там ня прынялі Яго, бо аблічча Яго было йдучы ў Ерузалім.

Бачачы гэта, вучні Ягоныя, Якаў і Ян, сказалі: Госпадзе! ці хочаш, мы скажам, каб вагонь сышоў зь неба і вынішчыў іх, як і Ільля зрабіў?

 

Бачучы ж вучні Яго, Якаў і Іоан, сказалі: Госпадзі! ці хочаш мы скажам, каб агонь зыйшоў з не́ба і зьнішчыў іх, як і Ільля зрабіў?

Але Ён, зьвярнуўшыся да іх, забараніў ім і сказаў: ня ведаеце, якога вы духу;

 

Але Ен, зьвярнуўшыся да іх, забараніў ім і сказаў: ня ве́даеце, якога вы духа;

бо Сын Чалавечы прыйшоў ня губіць душы чалавечыя, а ратаваць. І пайшлі ў іншае селішча.

 

бо Сын Чалаве́чы прыйшоў ня губіць душы людзкія, але спасаць. І пайшлі ў другое сяло.

Сталася, што калі яны былі ў дарозе, нехта сказаў Яму: Госпадзе! я пайду за Табою, куды б Ты ні пайшоў.

 

І сталася, як яны былі ў дарозе, не́хта сказаў Яму: Госпадзі: я пайду за Табою, куды б Ты ні пайшоў.

Ісус сказаў яму: лісы маюць норы, а птушкі нябесныя — гнёзды; а Сын Чалавечы ня мае, дзе прыхіліць галаву.

 

Ісус сказаў яму: лісіцы маюць норы, і птушкі нябе́сныя гнёзды; а Сын Чалаве́чы ня мае дзе́ галаву прыкланіці.

А другому сказаў: ідзі за Мною. Той сказаў: Госпадзе! дазволь мне сьпярша пайсьці і пахаваць бацьку майго.

 

А другому сказаў: Ідзі за Мною. Той сказаў: Госпадзі! дазволь мне́ пе́рш пайсьці і пахаваць бацьку майго.

Але Ісус сказаў яму: пакінь мёртвым хаваць сваіх мерцьвякоў; а ты ідзі, зьвястуй Царства Божае.

 

Але Ісус сказаў яму: пакінь уме́ршым хаваць сваіх нябожчыкаў; а ты йдзі, ды абвяшчай Царства Божае.

Яшчэ другі сказаў: я пайду за Табою, Госпадзе! але сьпярша дазволь мне разьвітацца з хатнімі маімі.

 

Яшчэ іншы сказаў: Я пайду за Табою, Госпадзі! Але пе́рш дазволь мне́ папрашчацца з хатнімі маімі.

Але Ісус сказаў яму: ніхто, хто паклаў руку сваю на плуг і азіраецца назад, не надзейны для Царства Божага.

 

Але Ісус сказаў яму: ніхто не спасобен да Царства Божага, хто, узлажыўшы руку сваю на плуг, аглядаецца назад.