Лукаша 3 разьдзел

 

 

А ў пятнаццаты год праўленьня Тыверыя кесара, калі Понцій Пілат начальнічаў у Юдэі, Ірад быў тэтрархам у Галілеі, Піліп, брат ягоны, — тэтрархам у Ітурэі і Траханіцкай вобласьці, а Лісаній — тэтрархам у Авілінеі,

 

У пятнаццаты ж год панаваньня Тывэрыя ке́сара, калі Понці Пілат гаспадарыў у Юдэі, Ірад быў чацьвертаўладцаю ў Галілеі, Піліп, брат яго, чацьвертаўладцаю ў Ітурэі і Траханіцкай краіне, а Лісані чацьвертўладцою ў Авілене́і;

пры першасьвятарах Ганьне і Каяфе, быў голас Божы да Яна, сына Захара, у пустыні.

 

пры архірэях Ганьне і Кайафе, быў голас Божы да Іоана, сына Захаравага, у пустыні.

І ён пайшоў па ўсіх навакольлях Ярдана, прапаведуючы хрышчэньне пакаяньня на дараваньне грахоў,

 

І ён праходзіў па ўсіх ваколіцах Іорданскіх, прапаве́дываючы хрышчэньне пакаяньня дзеля адпушчэньня грахоў,

як напісана ў кнізе слоў прарока Ісаі, які кажа: «голас таго, хто кліча ў пустыні: падрыхтуйце шлях Госпаду, простымі зрабеце сьцежкі Яму;

 

як напісана ў кнізе слоў прарока Ісаі, які кажа: голас клікаючага ў пустыні: прыгатуйце шлях Госпаду, простымі зрабёце сьце́жкі Яму;

кожны дол хай напоўніцца, і кожная гара і пагорак хай абнізяцца, крывізны выпрастуюцца, і няроўныя дарогі зробяцца гладкімі;

 

усякі дол няхай напоўніцца, і ўсякая гара і ўзгорак няхай зьнізяцца, крывулі выпрастуюцца і няроўныя шляхі зробяцца гладкімі;

і ўбачыць кожная плоць ратунак Божы».

 

і ўгле́дзіць усякае це́ла спасе́ньне Божае (Ісая 40:3-5).

Ян люду, што прыходзіў хрысьціцца ў яго, казаў: выродзьдзе яхідніна? хто намовіў вас уцякаць ад будучага гневу?

 

І казаў Іоан народу, які прыходзіў хрысьціцца ў яго: плод ехідніны! хто перасьцярог вас, каб уцякалі ад будучага гне́ву?

прынясеце ж плады годныя пакаяньня, і ня думайце гаварыць самі сабе: «бацька ў нас Абрагам»; бо кажу вам, што Бог можа з камянёў гэтых узьвесьці дзяцей Абрагаму;

 

Зрабе́це ж годныя пакаяньня плады і ня думайце гаварыць сабе́: „бацька ў нас Аўраам“; бо кажу вам, што Бог можа з каме́ньняў гэтых падняць дзяце́й Аўрааму.

ужо і сякера пры корані дрэваў ляжыць: бо ўсякае дрэва, якое ня родзіць добрага плоду, сьсякаюць і кідаюць у вагонь.

 

Ужо і сяке́ра ля караня дрэваў ляжыць; усякае дрэва, што плоду добрага ня прыносе, зрубаецца і кідаецца ў вагонь.

І пыталіся ў яго людзі: што ж нам рабіць?

 

І спытаўся ў яго народ: што ж нам рабіць?

Ён сказаў ім у адказ: у каго дзьве адзежыны, той дай таму, хто ня мае; і ў каго ёсьць ежа, рабі тое самае.

 

Ен жа сказаў ім у адказ: у каго дзьве́ адзе́жыны, той дай таму, хто ня мае; і каго ёсьць е́жа, рабі тое ж.

Прыйшлі і мытнікі хрысьціцца і сказалі яму: Настаўнік! што нам рабіць?

 

Прыйшлі і мытнікі хрысьціцца і сказалі яму: вучыцель! што нам рабіць?

Ён адказваў ім: нічога не патрабуйце больш вызначанага вам.

 

Ен жа адказаў ім: нічога не бярэце больш таго, што назначана вам.

Пыталіся ў яго таксама і воі: а нам што рабіць? І сказаў ім: нікога ня крыўдзіце, не паклёпнічайце, і задавольвайцеся сваёй платай.

 

Пыталіся ў яго таксама і ваякі: а нам што рабіць? І сказаў ім: нікога ня крыўдзьце, не абмаўляйце і здавальняйцеся свае́ю платай.

А калі люд быў у чаканьні, і ўсе думалі ў сэрцах сваіх пра Яна, ці ня Хрыстос ён, —

 

Калі ж народ быў у недаўме́ньні, І ўсе́ думалі ў сэрцах сваіх аб Іоане, ці ня Хрыстос ён, —

Ян усім адказваў: я хрышчу вас вадою, але ідзе Мацнейшы за мяне, у Якога я няварты разьвязаць рэмень на абутку; Ён будзе хрысьціць вас Духам Сьвятым і вагнём;

 

Іоан усім адказаў: я хрышчу вас вадою, але йдзе́ Дужэйшы за мяне́, у каторага я ня варты разьвязаць раме́нь абуцьця: Ен будзе хрысьціць вас Духам Сьвятым і агнём;

гарфа Ягоная ў руцэ Ягонай, і Ён ачысьціць гумно Сваё і зьбярэ пшаніцу ў засекі Свае, а салому спаліць вагнём непагасным.

 

лапата Яго ў руцэ Яго і Ен ачысьціць гумно Свае́ і пазьбірае пшаніцу ў сьвіран свой, а салому спаліць агнём неўгасімым.

Шмат чаго іншага зьвеставаў ён народу, павучаючы яго.

 

Многа і другога прапаве́дываў ён народу, навучаючы яго.

А Ірад тэтрарх, дакараны ім за Ірадыяду, жонку братавую, і за ўсё, што зрабіў Ірад благога,

 

Ірад жа чацьвертаўладца, дакараны ім за Ірадзіяду, жонку брата яго, Піліпа, і за ўсё, што Ірад зрабіў благога,

дадаў да ўсяго іншага і тое, што ўвязьніў Яна ў цямніцу.

 

дадаў да ўсяго іншага і тое, што пасадзіў Іоана ў вязьніцу.

А калі ахрысьціўся ўвесь народ, і Ісус, ахрысьціўшыся, маліўся, — адчынілася неба,

 

І сталася, як хрысьціўся ўве́сь народ, і Ісус хрысьціўшыся маліўся, — адчынілася не́ба,

і Дух Сьвяты сышоў на Яго ў цялесным вобразе, як голуб, і быў голас зь нябёсаў, які прамовіў: Ты Сын Мой любасны; Цябе Я ўпадабаў!

 

і Дух Сьвяты зыйшоў на Яго ў цяле́сным выглядзе, як галуб, і быў голас з не́ба гаворачы: Ты Сын Мой Улюблены; цябе́ ўпадабаў Я.

Ісус, пачынаючы Сваё служэньне, быў гадоў трыццаці, і быў, як думалі, сын Язэпаў, Іліеў,

 

Ісус, пачынаючы Свае́ служэньне, быў гадоў трыццацёх і быў, як думалі, сын Язэпаў, Іліяў,

Мататаў, Левіінаў, Мэлхіеў, Янаеў, Язэпаў,

 

Матфанаў, Ле́віяў Мэльхіяў, Іоанаў, Язэпаў,

Мататыеў, Амосаў, Навумаў, Ясьлімаў, Нагееў.

 

Матафіяў, Амосаў, Навумаў. Ясьлімаў, Наге́еў,

Маатаў, Мататыеў, Сэмяіеў, Язэпаў, Юдаў,

 

Маафаў, Матафіяў, Саме́йяў, Язэпаў, Юдзін,

Ёананаў, Рысаеў, Зарававэлеў, Салатыілеў, Нірыеў,

 

Іоананаў, Рысаеў, Зарававэлеў, Салафіілеў, Нірыеў,

Мэлхіеў, Аддзіеў, Касамаў, Элмадамаў, Іраў,

 

Мэльхіеў, Адзіеў, Касамаў, Ялмадамаў, Іраў,

Ёсіеў, Эліезэраў, Ёрымаў, Мататаў, Левіінаў,

 

Есіяў, Еліязэраў, Іярымаў, Матфатаў, Ле́віін,

Сымонаў, Юдаў, Язэпаў, Ёнанаў, Іліякімаў,

 

Сымэонаў, Юдзін, Язэпаў, Іоананаў, Еліакімаў,

Мэлеаеў, Маінанаў, Мататаеў, Натанаў, Давідаў,

 

Мэлеаеў, Маінаінаў, Матафаеў, Натанаў, Давідаў,

Ясэеў, Авідаў, Ваозаў, Салмонаў, Наасонаў,

 

Іясе́еў, Авідаў, Ваозаў, Салмонаў, Наасонаў.

Амінадаваў, Арамаў, Ісромаў, Фарэсаў, Юдаў,

 

Амінадаваў, Арамаў, Ясромаў, Фарэсаў, Юдзін,

Якаваў, Ісакаў, Абрагамаў, Тараў, Нахораў,

 

Якаўлеў, Ісаакаў, Аўраамаў, Фарын, Нахораў,

Сэрухаў, Рагаваў, Фалекаў, Івераў, Салаў,

 

Сэрухаў, Рагаваў, Фалекаў, Яве́раў, Салін,

Каінанаў, Арфаксадаў, Сімаў, Ноеў, Ламэхаў,

 

Каінанаў, Арфаксадаў, Сімаў, Нояў, Ламе́хаў,

Матусалаў, Інохаў, Ярэдаў, Малелеілаў, Каінанаў,

 

Матусалаў, Янохаў, Іарэдаў, Малеляілаў, Каінанаў,

Іносаў, Сітаў, Адамаў, Божы.

 

Еносаў, Сіфаў, Адамаў, Божы.