Выхад 35 разьдзел

 

 

І зьбер Масей усю грамаду сыноў Ізраелявых, і сказаў: «Гэта словы, што расказаў СПАДАР чыніць іх:

 

І сабраў Майсей усё супольства сыноў Ізраілевых і сказаў ім: вось, што наказаў Гасподзь рабіць:

"Шэсьць дзён рабіце работу, а сёмага дня мае быць у вас сьвята, сыбота супачынку СПАДАРУ; кажны, хто будзе рабіць у яе работу, памрэць.

 

шэсьць дзён рабеце працу, а дзень сёмы павінен быць у вас сьвяты, субота спачыну Госпаду; кожны, хто будзе рабіць у яе працу, аддадзены будзе сьмерці;

Не паліце агню ў вусіх гасподах сваіх у дзень сыботы».

 

не запальвайце агню ва ўсіх селішчах вашых у дзень суботні.

І сказаў Масей усёй грамадзе сыноў Ізраелявых: «Гэта тое слова, што расказаў СПАДАР, кажучы:

 

І сказаў Майсей усяму супольству сыноў Ізраілевых: вось тое слова, што наказаў Гасподзь, кажучы:

"Вазьміце ад сябе дар СПАДАРУ; кажны ахвотнага сэрца хай прынясець аброк СПАДАРУ: золата, срэбла а медзь,

 

зрабеце ад сябе ахвяраваньні Госпаду: кожны паводле руплівасьці няхай прынясе ахвяраваньне Госпаду, золата, срэбра, медзь,

І воўну васільковую а пурпуровую а чырвовую, і цянюсенькае палатно, і казіную поўсьць,

 

воўну блакітнага, пурпуровага і чырванёнага колеру, і вісон, і казіную воўну,

І скуры баранія чырвоныя, і скуры барсуковыя, і дзерва акацу,

 

Аўчыны барановыя чырвоныя і аўчыны сінія, і дрэва сітым,

І аліву да сьветача, і пахі на алей памазаньня й да пахнючага кадзеньня,

 

і алей у сьвяцільню, і пахошчы на алей памазаньня і на духмяныя дымленьні,

І камяні оніксу, і каменчыкі ўсаджаныя на наплечнік а нагруднік".

 

камень анікс і камяні ўстаўныя на эфод і нагруднік.

І кажны з вас мудры сэрцам хай прыдуць і зробяць усе, што расказаў СПАДАР:

 

І кожны з вас мудры сэрцам няхай прыйдзе і зробіць усё, што загадаў Гасподзь:

"Вітальню а будан яе а пакрыцьце яе, кручкі яе а дошкі яе, нашулкі яе, стаўпы яе а падстаноўкі яе,

 

скінію і покрыва яе і века яе, гакі і брусы яе, жэрдкі яе, слупы яе і падножжы яе,

Скрыню а нашулкі яе, века а запінаху запоны,

 

каўчэг і жэрдкі яго, века і заслону для загароды,

Стол а нашулкі яго а ўсі судзіны яго, і хлябы Выкладу,

 

стол і жэрдкі яго і ўсе прылады яго, і ахвярныя хлябы,

І сьветач да сьвяценьня із судзінамі яго, і лянпы яго, і аліву да сьвяценьня,

 

і сьвяцільні для асьвятленьня з прыладамі яго, і лампады яго і алей для асьвятленьня,

І аброчнік да кадзеньня а нашулкі яго, і алей памазаньня і пахнючыя кадзеньні, запону да ўходу вітальні,

 

і ахвярнік для дымленьняў і жэрдкі яго, і алей памазаньня, і духмяныя дымленьні, і заслону на ўваходзе ў скінію,

Аброчнік усепаленьня а крату мядзяную да яго а нашулкі яго а ўсе судзьдзе яго, мыцельнік а падложак яго,

 

ахвярнік цэласпаленьня і рашотку медную для яго, і жэрдкі яго і ўсе прылады яго, умывальнік і падножжа яго,

Заслоны панадворку, стаўпы яго а падложкі іх і запону ля ўходу ў панадворак,

 

заслоны двара, слупы яго і падножжы іх і заслону на ўваходзе ў двор,

Кольле вітальні а кольле панадворку а паварозкі іх,

 

калы скініі і калы двара і вяроўкі іх,

Адзецьці службовыя да служэньня ў сьвятыні а сьвятыя адзецьці Аарону сьвятару а адзецьці сыном ягоным да сьвятарстваваньня"».

 

вопратку службовую на служэньне ў сьвятыні і сьвяшчэнную вопратку Аарону сьвятару і вопратку сынам ягоным дзеля набажэнства.

І вышла ўся грамада сыноў Ізраелявых ад Масеявага віду.

 

І пайшло ўсё супольства сыноў Ізраілевых ад Майсея.

І прыходзіла кажная людзіна, каторую прынукала да гэтага сэрца, і кажны, каторага захочаваў дух ягоны, і прыносілі аддзелены дар СПАДАРУ на рабеньне будану збору, і на ўсе служэньне яго, і на сьвятыя адзецьці.

 

І прыходзілі ўсе, каго вабіла да таго сэрца, і ўсе, каго схіляў дух, і прыносілі ахвяраваньні Госпаду на ўладжваньне скініі сходу і на ўсе патрэбы яе і на сьвяшчэннае адзеньне;

І прыходзілі мужы із жонкамі, усі ахвотнага сэрца прыносілі ўносьніцы а завушніцы а жуковіны а кралі, і ўсялякія залатыя рэчы, кажны хто нахінаў нахінаньне золата СПАДАРУ.

 

і прыходзілі мужы з жонкамі, і ўсе па схільнасьці сэрца прыносілі пярсьцёнкі, завушніцы, бранзалеты і падвескі, усялякія залатыя рэчы, кожны, хто хацеў прыносіць золата Госпаду;

І кажны, у каго была воўна васільковая а пурпуровая а чырвовая, цянюсенькае палатно й казіная поўсьць, скуры баранія, хварбаваныя на чырвана, і скуры барсуковыя, прыносіў іх.

 

і кожны, у каго была воўна блакітнага, пурпуровага і чырванёнага колеру, вісон і казіная воўна, аўчыны барановыя чырвоныя і аўчыны сінія, прыносілі іх;

І кажны, хто падыймаў дар срэбла а медзь, прыносіў гэты дар СПАДАРУ; і кажны, у каго знайшлося дзерва акаца прыносілі на ўсялякую работу служэньня.

 

і кожны, хто ахвяраваў срэбра, альбо медзь, прыносілі гэта ў дарунак Госпаду; і кожны, у каго было дрэва сітым, прыносіў гэта на ўсякую патрэбу скініі;

І кажная жонка, мудрая сэрцам, прала сваімі рукамі й прыносіла пражу васільковага, пурпуровага а чырвовага колеру й цянюсенькае палатно.

 

і ўсе жанчыны, мудрыя сэрцам, пралі сваімі рукамі і прыносілі прадзіва блакітнага, пурпуровага і чырванёнага колеру і вісон;

І ўсі жанкі, каторых прынукала сэрца мудрасьцю, пралі сваю казіную поўсьць.

 

і ўсе жанчыны, якіх вабіла сэрца, якія ўмелі прасьці, пралі казіную воўну;

А князі прыносілі камень онікс а каменчыкі, усаджаныя ў наплечнік а нагруднік,

 

а князі прыносілі камень анікс і камяні ўстаўныя на эфод і нагруднік,

І пахі, і аліву да сьветача, і да алею памазаньня, і на пахнючыя кадзеньні.

 

і пахошчы таксама, і алей у сьвяцільню і на складаньне алею памазаньня і на духмяныя дымленьні;

Бо кажны мужчына й жонка із сыноў Ізраелявых, каторых захочавала сэрца іхнае прынесьці на ўсялякую работу, якую СПАДАР Масеям расказаў зрабіць, прыносілі самахвотны дар СПАДАРУ.

 

і ўсе мужы і жонкі з сыноў Ізраілевых, якіх вабіла сэрца прынесьці на ўсякую справу, якую Гасподзь праз Майсея загадаў зрабіць, прыносілі дабраахвотны дарунак Госпаду.

І сказаў Масей сыном Ізраелявым: «Глядзіце, СПАДАР гукнуў наймя Бецал-эля, сына Ура Гуранка, з плямені Юдзінага,

 

І сказаў Гасподзь сынам Ізраілевым: глядзеце, Гасподзь прызначыў менавіта Вэсэлііла, сына Урыі, сына Ора, з племя Юдавага,

І напоўніў яго Духам Божым, мудрасьцю а кемнасьцю а веданьням а ўсялямім рамяством,

 

і напоўніў яго Духам Божым, мудрасьцю, розумам, ведамі і ўсялякім умельствам

І выдумляць мастацтва, рабіць у золаце а срэбле а медзі,

 

складаць узорыстую тканіну, рабіць з золата, срэбра і медзі,

І ў рэзаньню каменьня да ўсаджаньня, і ў рэзаньню дзерва, і рабіць усялякую мастацкую работу.

 

і рэзаць камяні, каб устаўляць іх, і рэзаць дрэва, і рабіць усякую адмысловую працу;

І здольнасьць вучыць даў у сэрца ягонае а Аголява Агісамашонка, з плямені Дановага.

 

і здольнасьць вучыць заклаў у сэрца яго, яго і Агаліява, сына Ахісамахавага, з племя Данавага;

Ён напоўніў іх мудрасьцю сэрца, рабіць усялякую работу ґравэра а мастака а вышываньніка на васільковай, пурпуровай, чырвовай тканіне і на цянюсенькім палатне, і ткача, усялякую работу робячага й мастацтва выдумляючага».

 

Ён напоўніў сэрца іх мудрасьцю, каб рабіць усякую працу разьбяра і ўмелага ткача і вышывальніка па блакітнай, пурпуровай, чырванёнай і вісоннай тканіне, і ткачоў, якія робяць усялякую працу і складаюць каштоўную тканіну.