Втораго закону 17 Втораго закону 17 разьдзел

¹ Не будете приносити Господу, Богу вашему, агнеца или тельца, на немже ест посквернение или неякий недуг, понеже мерзска сиа суть пред Господем, Богом вашим.a

² Естъли же знайдены будуть во градехъ ваших, еже Господь, Бог вашъ, дасть вам, мужъ или жена, чиняще злая предъ лицем Господа, Бога вашего и преступующе заветъ Его,

³ кланяющеся богом чужим, солнцу, месецу и всем звездам небесным, якоже заповедах вам —

⁴ и сее было бы поведено, тогда пытайтеся о том пильне, и доведавшися правды, якоже слышали есте, иже безаконие сее сталося ест в людехъ Ізраилевыхъ, —

⁵ выведете мужа того или жену, еже презлое тое дело учинили суть, и камением побиете их пред враты градовыми.

⁶ Сведецством дву или трехъ светковъ да загинеть, онже ест виненъ, никтоже да не умираеть сведецствомъ светка единого.b

⁷ Руце светковъ найпервей будуть убиати ихъ, потом руце всехъ людей камение на нь метати будут, да от[ъ]имете злое от среды себе.

⁸ Естъли же бы ся домышляли есте трудный и омылный суд быти межи кровию и кровию, межи тяжею и тяжею, межи прокажениемъ и прокажениемъ, и видели бы есте, ано судьи, иже седять во вратехъ ваших, не сровнаваются в речахъ своих, востаньте и идите на место, еже избереть собе Господь Богъ,

⁹ и пришедши ко жерцем от поколения Левгиева и к судьям, седящим на месте том в то время, и спытаете их, ониже укажут вам судъ правый.

¹⁰ И учините вся, елика рекуть вам жерци и вчители места того, и навчать васъ по закону Божием.

¹¹ И придержатися будете розсужения их, не уклоняющеся ни направо, ни налево.

¹² Ктож бы пакъ погорделъ и не хотелъ послухати приказаниа жерцева, предстоащего в ты часы во службе Божией, и не хотел бы престати на осужении судей, да убитъ будеть человек той и от[ъ]имете злое от Ізраиля.

¹³ И вси людие, услышавши, боятися будуть, и никтоже погордить потом.

¹⁴ Егда вниидете в землю, юже Господь, Бог вашъ, дасть вамъ, и владети будете ею, и речете: “Поставмо над собою царя, яко иные околичные народы имають”,

¹⁵ того поставите, егоже избереть Господь от братии вашей. Не будете мощи от иного поколения человека учинити собе царемъ, онже не естъ братъ ваш.

¹⁶ И егда поставлен будеть, да не умножить собе коней и да не возвратить людей во Египетъ, имея много конъникъ, понеже заповеда вамъ Господь Богъ, абы есте не навращалися путемъ тымъ въ Египетъ.

¹⁷ Не будет имети царь вашъ много женъ, абы не превратили мысли его, ани теже злата и сребра много сбирати будет.

¹⁸ И егда сядеть на престоле царства своего, да выпишеть собе книги закону Божия, возмя перепись от жеръцевъ Левгиева роду,

¹⁹ и да имать и предъ собою и чтет в нихъ по вся дни живота своего, да ся навчить бояти Господа, Бога своего, и хранити заповеди и суды Его, и чиновъ посвятныхъ, еже в законе Господа Бога написаны суть.

²⁰ И да не превозносится серце царево в гордости надъ братию свою, сыны Ізраилевы, и ниже уклонится направо или налево, да за многи лета царствовати будет онъ и сынове его по немъ надъ людми Ізраилевыми.