Втораго закону 33 Втораго закону 33 разьдзел

¹ Сее естъ благославение, имъже благославилъ Моисей, человекъ Божий, сыны Ізраилевы предъ смертию своею.

² И рече: «Господь от Синаи прииде от Сеира вышелъ естъ к намъ, явися от горы Фаранъ и с Нимъ светыхъ тысеще! Въ десници Его огненый законъ.

³ Возлюби людей. Вси сынове в руку Его суть и приближающиеся к ногамъ Его приимуть от навчения Его.

⁴ Законъ заповедалъ намъa Моисей в достоание множеству сыновъ Яковлевыхъ,

⁵ и будеть у найсправедлившего царь, внегда соберутся князи людей поколеней Ізраилевыхъ.

⁶ Буди живъ, Рувиме, а не вмирай, и пребуди в маломъ числе”.

⁷ Сие естъ благославение Іудино: “Послушай, Господи, гласа Іудина и в люде его воведи и. Руце его будуть воевати за него и помощникъ его будеть противу врагомъ его”.

⁸ Левгиеви теже рече: “Совершение твое и наука твоя естъ от мужа святого, егоже скусилъ еси искушениемъ и осудилъ еси у Воды Пререкания,

⁹ онже рече отцу своему и матери своей: “Не знаю васъ, и братии своей, не вемъ о васъ, и сыновъ своихъ”, яко не веде о нихъ. Сии соблюли суть слова Твоя и сохранили заветъ Твой,

¹⁰ суды Твоя о Іякове и закон Твой, Ізраилю. Возложиши темианъ во ярости Твоей и всясозжения на требникъ Твой.

¹¹ Благослави, Господи Боже, крепость его и дела руку его приими. Порази хребетъ враговъ его и ненавидящие его да падуть и не востануть”.

¹² Веньаминови же рече: “Возлюбленный Господень жити будеть в Немъ со впованием, яко во чертозе целый день пребудеть и межи рамены Его отпочинеть”.

¹³ Іосифови такожъ рече: “Со благославениемъ Господьнимъ земля его, со овощевъ небесныхъ и с росы небесное, и съ бездны, еже под нимъ естъ,

¹⁴ и з яблокъ плоду солнечного и месецевого,

¹⁵ от верху старыхъ горъ, и от яблокъ узъгорковъ вечныхъ,

¹⁶ и от житъ земли и от исполнения ея. Благославение Того, Онже указался естъ в купине, да приидеть на Іосифа и на главу посвященнаго посреди братии его.

¹⁷ Яко первороженного тельца краса его и яко рогъ единорогов рози его, имиже возметати будеть и бити языки даже до конца земли. Сие естъ множество Ефраимово, и сие суть тысещи Манасиины”.

¹⁸ И Зевулону рече: “Веселися, Зевулон, о исходе твоемъ, а Ізахаръ в домехъ своихъ!

¹⁹ Людей соберуть на гору и ту будуть приносити требы правды Тии розводнение морское будуть ссати, яко млеко, и приимуть поклады, сокритые в пескохъ”.

²⁰ И Гадовиb теже рече: “Благославенъ в розширении Гадъ! Яко левъ, отпочивати будеть. Взялъ мысцу и верхъ и узрелъ князство свое,

²¹ иже в части его былъ навчитель положенъ, онже пребылъ со князми людей и навчал правды Господьни, и судъ его со людми Ізраилевыми”.

²² Данови же рече: “Данъ, львик младый, и потечеть щедре от Васана”.

²³ И Нефталимови рече: “Нефталим обилие приимет и наполнится благославения Господьня, море и страну полуденную обдержить”.

²⁴ Асерови теже рече: “Благославенъ еси въ сынехъ своихъ, Асеръ! Любишися братии своей, омочиши у волей ногу свою,

²⁵ железо и медь обувь твоя. Яко дни младости твоея, тако и старость твоя.

²⁶ Несть богъ иный, яко Богъ найпростейшего. Той, Онже воступилъ естъ на небо, будеть помощникъ твой.

²⁷ Велеможностию Его преходять облакове и житие Его естъ наверху и подъ рамены вечными. Вывержеть врага твоего предъ лицемъ твоимъ и речеть: “Сотрися ту!”

²⁸ Жити будуть людие Ізраилевы, надеющеся на Господа, и сами едины.c Око Яковлево в земли пшеници и вина, и небеса спустять ему росу.

²⁹ Благославенъ еси ты, Ізраилю! Кто подобенъ тобе в людехъ? Ты спасаешися о Господи, щитъ помощи твоея и оружие хвалы твоея естъ Господь, Богъ твой. Запрут тебе врази твои, ты же на шие их наступиши».