Псалтыр 127 псалом — Пераклад Л. Дзекуць-Малея → Біблія Скарыны (Бразгуноў)

Псалтыр 127 псалом

Псалтыр
Пераклад Л. Дзекуць-Малея → Біблія Скарыны (Бразгуноў)

Песьня ўзыходжаньня. Салямонавая.Калі ня Госпад будуе дом, дарэмны стараньні будаўнічых; калі ня Госпад места пілнуе, дарэмна вартуе старожа.

Дарэмна для вас, што рана ўстаецё, позна кладзецёся й хлеб ваш ясьцё ў тузе: Свайму ўмілаванаму ў сьне Ён дае.

Вось ад Госпада дар: гэта дзеці, нагарода Яго — плод чэрава.

Быццам стрэлы ў магутнай руцэ, гэтак — сыны маладыя.

Шчасьлівы той чалавек, што імі напоўніў каўчан свой.

Ня будуць яны асаромлены, як з ворагамі гутарку ў вароцех павядуць.