Выслоўяў Саламонавых 11 разьдзел

Кніга выслоўяў Саламонавых
Пераклад Яна Станкевіча → Пераклад Чарняўскага 2017

 
 

Хвальшывая вага — агідна СПАДАРУ, але супоўны камень — любата Яму.
 
Агіднасць для Госпада — вага падманная, а дакладная вага — воля Яго.

Прыйдзе пыха, і прыйдзе сорам, але ізь сьціплымі — мудрасьць.
 
Прыходзіць пыхлівасць — прыйдзе і ганьба; а ў пакорлівых — мудрасць.

Беззаганнасьць пасьцівых будзе весьці іх, але папсаванасьць выступнікаў зьнішча іх.
 
Чыстасардэчнасць справядлівых будзе накіроўваць іх, а падкопы крывадушных загубяць іх.

Багацьце не даець карысьці ў дзень гневу, але справядлівасьць вывальняе ад сьмерці.
 
У дзень гневу не дапаможа багацце, а справядлівасць выратуе ад смерці.

Справядлівасьць беззаганных раўнуе дарогу іхную, але ў нягоднасьці сваёй паваліцца нягодны.
 
Справядлівасць чыстасардэчнага будзе кіраваць яго дарогай, а бязбожнік загіне ў сваёй бязбожнасці.

Справядлівасьць пасьцівых вывальняе іх, але нягоднасьць выступнікаў злове іх.
 
Справядлівасць справядлівых вызваліць іх, а несправядлівыя будуць захоплены ўласнымі падкопамі.

Як нягодны чалавек памірае, спадзева загіне, і надзея несправядлівых гіне.
 
Калі памрэ бязбожнік, ніякай надзеі ў яго больш не будзе; а чаканне багацця загіне.

Справядлівы вывальнены зь немарасьці, і луча нягодны замест яго.
 
Справядлівы будзе вызвалены ад беднасці, а на месца яго трапіць бязбожнік.

Вуснамі падлыжніка гіне прыяцель ягоны, але ведаю справядлівага будзе вывальнены.
 
Крывадушнік вуснамі падманвае сябра свайго, а справядлівыя будуць вызвалены ведамі.

З дасьпеху справядлівых цешыцца места, і як гінуць нягодныя — вяселіцца.
 
У час росквіту справядлівых радуецца горад, а ў час пагібелі бязбожнікаў будзе пахвала.

Дабраславенствам пасьцівых места павышаецца, але вуснамі нягодных бурыцца,
 
Дабраславеннем справядлівых узвысіцца горад, а вусны бязбожнікаў разбураць яго.

Хто грэбуе прыяцелям сваім; у тога не стаець розуму, але людзіна разумная маўчыць.
 
Хто пагарджае сябрам сваім, той бедны на разважлівасць, а разважлівы чалавек будзе маўчаць.

Язычнік адкрые тайну, але верны дух пакрывае справу.
 
Хто ходзіць перашэптваючыся, выяўляе таемнае, а верны душою ўтоіць справу.

Ідзе няма парадаў, люд упадае, але помач ад шмат параднікаў.
 
Дзе няма парадку — народ загіне, а збаўленне там, дзе шматлікія парады.

Ліха будзе таму, хто паручыўся за чужніка, але бясьпечны, хто ненавідзе рукаемства.
 
Той будзе вынішчаны ліхам, хто за другога ручаецца; хто ненавідзіць паручыцеляў, той будзе агароджаны ад небяспекі.

Пасьцівая жонка заховуе пасьцівасьць, а дужы заховуе багацьце.
 
Паслужлівая жанчына знойдзе славу, а дужыя набудуць багацце.

Дзее добра душы сваёй людзіна міласэрная, але немарасьце цела свае неміласьціўны.
 
Міласэрны чыніць дабро душы сваёй, а бязлітасны мучыць самога сябе.

Нягодны робе ашукаю работу, але сяўбіт справядлівасьці — праўдзівая заплата.
 
Бязбожнік робіць ілжывую справу, а для таго, хто сее справядлівасць, — пэўная ўзнагарода.

Справядлівасьць да жыцьця, а хто жанецца за ліхам — да свае сьмерці.
 
Надзейны чалавек рыхтуецца да справядлівасці, а прыхільнік ліха — да смерці.

Агіда СПАДАРУ крутадушныя сэрцам, але зычлівасьць Яго да пасьцівых у дарозе сваёй.
 
Агіда для Госпада — сэрца крывадушнае, а ласка Яго — да тых, хто ходзіць прама.

Можна паручыцца, што ліхадзей ня будзе непакараны, насеньне ж справядлівых будзе вывальнена.
 
Вядома, ліхі чалавек не будзе беспакараны, а нашчадкі справядлівых збавяцца.

Залатая жуковіна ў лычу сьвіньні — харошая жонка без разважнасьці.
 
Залатое кольца ў лычы свінні — гэта прыгожая, але неразумная жанчына.

Жаданьне справядлівых — адно дабро, спадзева нягодных — гнеў.
 
Пажаданне справядлівых — толькі дабро, чаканне бязбожнікаў — абурэнне.

Ё шчодры, і дадаецца яму, а другі лішне ашчадны, адылі галее.
 
Адны дзеляцца ўласным і становяцца багацейшымі, а другія, што занадта беражлівыя, заўсёды ў беднасці.

Дабрадзейная душа ўесца; і хто даець піць, таму дадуць.
 
Будзе насычана душа, якая дабраслаўляе; і хто напоіць другіх, той сам таксама будзе напоены.

Хто задзержуе збожжа, таго клінець люд; але дабраславенства на галаву таго, хто прадаець.
 
Хто хавае сваё збожжа, той праклінаецца ў народзе, а на галаву тых, якія прадаюць збожжа, — дабраславенне.

Хто ўлегліва шукае дабра, шукае зычлівасьці; але хто шукае ліха, да тога яно прыйдзе.
 
Хто настойліва шукае дабра — шукае ласкі [Божай], а хто шукальнік ліха — да таго яно і прыйдзе.

Хто спадзяецца на свае багацьце, упадзець; але, як зяленіва, справядлівыя заквітуць.
 
Хто спадзяецца на багацці свае, загіне, і, як зялёны ліст, будуць расці справядлівыя.

Хто бурае дом свой, таму спадзець вецер, і дурны будзе слугою мудраму сэрцам.
 
Хто турбуе дом свой — атрымае вятры, а хто бязглузды — будзе слугою мудрага.

Плады справядлівага — дзерва жыцьця, і мудры прыдбаець душы.
 
Плод справядлівага — дрэва жыцця; і хто мудры — прыцягвае душы.

Вось, справядлівы будзе мець адплату на зямлі, пагатове нягоднік а грэшнік.
 
Калі справядліваму адплачваецца на зямлі, тым больш бязбожніку і грэшніку.