Яна 17 Паводле Яна 17 разьдзел

¹ Так прамаўляў Ісус; і, падняўшы вочы Свае да неба, сказаў: «Ойча, прыйшла гадзіна: праслаў Сына Твайго, каб і Сын Твой праславіў Цябе,

² як Ты даў Яму ўладу над кожным целам, каб усім, каго Ты даў Яму, Ён даў ім жыццё вечнае.

³ А гэтае жыццё вечнае ў тым, каб пазналі Цябе, адзінага праўдзівага Бога, і Таго, Каго Ты паслаў, Ісуса Хрыста.

⁴ Я праславіў Цябе на зямлі, завяршыў справу, якую Ты Мне даў, каб зрабіў;

⁵ а цяпер праслаў Мяне Ты, Ойча, у Цябе Самога славаю, якую Я меў у Цябе перш, чым паўстаў свет.

⁶ Я аб’явіў імя Тваё людзям, якіх Ты Мне даў са свету. Яны былі Твае, і Ты іх Мне даў, і яны збераглі слова Тваё.

⁷ Цяпер яны пазналі, што ўсё, што Ты Мне даў, гэта ад Цябе ёсць.

⁸ Бо словы, якія Ты Мне даў, Я перадаў ім, і яны іх прынялі, ды праўдзіва пазналі, што Я ад Цябе выйшаў, і яны ўверылі, што Ты Мяне паслаў.

⁹ Я за іх прашу, не прашу за свет, але за тых, якіх Ты Мне даў, бо яны — Твае,

¹⁰ і ўсё Маё — Тваё, і Тваё — Маё; і Я ў іх праслаўлены.

¹¹ Я ўжо не ў свеце, але яны ў свеце, Я ж іду да Цябе. Ойча Святы, у імя Тваё захавай тых, якіх Мне даў, каб былі яны адно, як і Мы.

¹² Калі Я быў з імі ў свеце, Я захоўваў іх у імя Тваё, тых, якіх Ты Мне даў, і ўсцярог, і ніхто з іх не загінуў, толькі сын загубы, каб споўнілася Пісанне.

¹³ А цяпер іду да Цябе і гавару гэта на свеце, каб яны радасць Маю поўную мелі ў сабе.

¹⁴ Я перадаў ім слова Тваё, і свет іх зненавідзеў, бо яны не са свету, як і Я не са свету.

¹⁵ Не прашу, каб іх узяў са свету, але каб іх захаваў ад ліха.

¹⁶ Яны не са свету, як і Я не са свету.

¹⁷ Асвяці іх у праўдзе Тваёй; Слова Тваё ёсць праўда.

¹⁸ Як Ты Мяне паслаў у свет, і Я іх паслаў у свет,

¹⁹ і за іх Я прысвячаю Сябе Самога, каб і яны былі асвечаны ў праўдзе.

²⁰ Я не толькі за іх прашу, але і за тых, што праз словы іх павераць у Мяне,

²¹ каб усе былі адно; як Ты, Ойча, ува Мне, а Я ў Табе, каб і яны былі ў Нас, каб свет уверыў, што Ты Мяне паслаў.

²² І славу, якую Ты Мне даў, Я перадаў ім, каб яны былі адно, як і Мы адно,

²³ Я ў іх, і Ты ўва Мне так, каб былі ў адзінстве дасканалымі, і каб свет пазнаў, што Ты Мяне паслаў ды палюбіў іх, як і Мяне палюбіў.

²⁴ Ойча, хачу, каб тыя, якіх Ты Мне даў, былі са Мной там, дзе Я, каб бачылі славу Маю, якую Ты Мне даў, бо Ты Мяне палюбіў перад стварэннем свету.

²⁵ Ойча справядлівы, свет Цябе не пазнаў, але Я Цябе пазнаў, і яны пазналі, што Ты Мяне паслаў,

²⁶ і Я з’явіў ім імя Тваё, і з’яўляю, каб любоў, якою Ты палюбіў Мяне, у іх была, і Я ў іх».